Yang Yadwang Isinulat Ni JUAN
Patkaw Ang Pasanag Tung Kumpurming Magbasa
Atiing timpu pa ni Juan, may mga tumatalig ang pinaeyangan yang Espiritu Santo ta ikaya nirang maayen ang mamagparakaw̱utun yang Matinlung Balita tung mga tau (Efeso 4:11). Purisu namagliliw̱utun tung duma-rumang lugar ang para mamagparakaw̱utun tung mga tau duun. Kada lugar, kung alimbawa, may mga tumatalig duun, yang mga manigparakaw̱utun ang atia, duun da tung balay nira agpamagdayun. Yang may balay, durung kalelyag nirang mag̱asikasu tung mga bisita nirang atia ay agkaw̱ig̱en nirang mga putul nira tung ni Ginuung Jesus ang ya ra kay nag̱atuw̱ul na. Dispuis, kung tapus da nganing yang pagparakaw̱utun nira tung sasang lugar, mamagpanaw sing mamag̱angay tung dumang lugar. Piru baklu ra papanaway yang may balay, nag̱apakdulan da nira ta mga kaministiran nirang mamagpanaw (Mga Binuat-buatan 15:3; 3 Juan 5). Ug̱aring ilem, kumus may dumang mga manigtulduk ta belag̱an tama ang pamagliliw̱utun da ka ang para mamagparakaw̱utun da ka natetenged tung pag̱irintindien nirang atiang mali, ang kaisan duun da ka nag̱apanaw tung mga tumatalig. Purisu yay pagpakdul ta sasang prublima tung mga tumatalig ang kinaw̱utan da yang mga manigtulduk ang mga maning tia. Purisu ya ray natengeran na ang ti Juan naisip dang magsulat ang para magpaaman da tung mga tumatalig natetenged tung mga manigtulduk ang atia ang indi ra ilem padayunun nira tung mga balay nira (7-11).
1
Yang Intrada Yang Sulat (1-3)
1-2 Yuung nagsulat ti Juan ang pinakamaepet tung mga pamagmaepet-epet tani. Yang sulat ang atia, ipinaekelu ra tung nuyung sasang baw̱ay asan ang pinilik yang Dios, kasiraanamu ra ka yang mga ana mu.* 1-2 “sasang baw̱ay...mga ana mu.” Sasang bitalang pasig̱em ilem ang para indi ilem maintindian yang mga tau tung lua. Yang linegdangan yang baw̱ay, ya ra yang sam pundaan yang mga tumatalig ig yang mga ana na ya ra yang mga tumatalig mismu. Nag̱amaalamu yeen ta mupia gated parariuitang pag̱usuy tung kamatuuran ang liit tung Dios. Belag̱an ilem yuuy pagmaal tung numyu, kung indi, pati yang kumpurming natultul da ka tung kamatuuran ig pag̱usuy, ya ka, pamagmaal ka tung numyu. Yang nag̱ipagmaal yamen tung numyu ay natetenged ilem tung kamatuuran ang atiang durug kabuilu yang apiktar na tung yaten ig ya ra kay pag̱ineteg̱an yang mga isip ta ang asta tung sampa. 3 Yang gustuu ang yang Dios ang ya ray nagyaring Ama ta durua ni Jesu-Cristong yay pag̱aningen nang Ana Na, padayunanita ra nirang paitaan ta kaneeman nirang makabew̱ereng ang nunut da ka ta kaildaw nira ig paeyanganita ra ka nira ta paglimengan yang mga isip ta mintras pagpadayunita ra tung pagparanangeren ta tung kamatuuran may tung paggeregmaan tang magpurutul.
Yang Nag̱ikasadya Enged Yang Isip Ni Juan (4)
4 Durug sadya yang isipu atiing nabalitaanu ra ang yang mga pag̱urubraen yang mga kaarumanan ming duma asan uyun ang pisan tung kamatuuran ang katulad ka tung itinuw̱ul yang Ama tang Dios tung yaten.
Nag̱apaprusigir Nang Mamagpadayun Tung Paggeregmaan Nirang Magpurutul (5-6)
5 Kapurisu numanyan may sasang nag̱aingaluku tung numyu asan ang ta yaten ang tanan ang mga tumatalig maggeregmaanita enged ta ustu. Belag̱an ang mag̱aning ang yang nag̱isulatung atia sasang baklung katuw̱ulan, kung indi, ya ra kang lag̱i ay itinuw̱ul yang Dios tung yaten atiing primirung pagtalig ta tung ni Ginuung Jesus. 6 Maning taa yang kamtangan yang ustung paggeregmaen ang ita mag̱usuy tung kumpurming unu pay nag̱ituw̱ul na tung yaten. Utru si kung papagbilug̱un ta yang tanan ang nag̱ipanuw̱ul na tung yaten, ya ra ka man taang ipinagngel tung numyu atiing primirung pagtalig mi tung ni Ginuung Jesus ang ya ray dapat ang tumanen ta.
Nag̱apaamanan Na Natetenged Tung Mga Mandarayang Pamaglua (7-11)
7 Ag̱aningenamu ra yeen ta maning tia ay natetenged duru rang mga mandarayang namaglua. Yang nag̱itulduk nira tung mga tau ang ti Jesus unu belag̱an yang pag̱aningen ang Cristo ig indi ka unu nag̱ingtaung bilug. Kung tinu pay magtulduk ta maning tia yay sasang mandaraya ang pariu ta sistima yang sasang magpakigbatuk tung ni Ginuung Jesus tung uri ang yay magpa Cristo-cristo. 8 Purisu magbantayamu ta mupia tung mga sarili mi ug̱ud indiamu mawaraan yang pinakabedlayan mi, kung indi, marisibi mi ra ka enged yang maning pa tung sasang primyung nag̱ibaratu yang Dios tung numyu ang andang pisan ay buin na. 9 Kumpurming tinu pay indi ra pagpadayun tung dating nag̱itulduk yamen ang mga apustul sigun tung pagkabetang yang pag̱aningen ang Cristo, kung indi, ya rag pasubraay na, asan dag pagpaalawid tung Dios. Piru kumpurming tinu pay pagpadayun tung dating nag̱itulduk yamen yay pagpakigsasa tung pag̱aningen ang Ama durua yang pag̱aningen ang Ana ang yay paglinukutay tung pagkadios. 10 Kapurisu kung tinu pay magkaw̱ut asan tung numyu ang yang nag̱itulduk na belag̱an pariu tung dating nag̱itulduk yamen tung numyu natetenged tung pag̱aningen ang Cristo, indi mi ra ilem padayunun asan tung mga balay mi. Indi mi ka nganing sapten ang katulad ka tung pagsarapetan tang magpurutul. 11 Ay kipurki kung tinu pay magsapet tung nira ta maning tia, katimbang nang pagpakigdamay ra tung pag̱urubraen nirang atiang malain.
Yang Pagtapusan Yang Sulat (12-13)
12 Maskin duru pa rin ang gustuung ianing tung numyu, tinimbang-timbangu ra tung isipu ang indi ra ilem dayununung ipabtang tung sulat ang atia, kung indi, dakulung sarig̱u ang mangayaw ka enged asan tung numyu ug̱ud mag̱eremetanita rang magkeresen ug̱ud asan da mag̱ing bug̱us yang kasadyaan tang tanan.
13 Yang tanan ang mga kinasakpan yang sam pundaan tani ang pinagpilik da ka yang Dios ang katulad ka tung numyu pamagpakikumusta tung numyung sam pundaan asan.
Ya ra ilem tia ay masulatu tung numyu,
Juan ang pag̱aningen ang pagmaepet-epet
*1:1-2 1-2 “sasang baw̱ay...mga ana mu.” Sasang bitalang pasig̱em ilem ang para indi ilem maintindian yang mga tau tung lua. Yang linegdangan yang baw̱ay, ya ra yang sam pundaan yang mga tumatalig ig yang mga ana na ya ra yang mga tumatalig mismu.