1 Nad' ngoo lall' na' bish' ljwellchoki nonḻilall' Crístona' chzej' li', noolə ba wlej Chioza' gako' lall' nee len xiiṉo'ka'.* Noolə ba wlej Chioza' gako' lall' nee len xiiṉo'ka': beṉ'ka' nsed nagake' daa na Juanna' ka' zejin beṉ'ka' chdop chllag choe'la'ogake' Crístona' gana' bseḻee karta'. Na' ḻe chakid' le', na' aga toz nad' chakid' le' san len yog' beṉ'ka' ba nombia' daa nak dii ḻin. 2 Ḻe chakid' le' daa ba nombia'cho daa nak dii ḻi daa yoo ḻoo yic̱hjlall'do'choka' ṉaa, na' soalenan cho' toshiizi. 3 Chioza', beena' nak X̱acho, len Xiiṉe' Jesucrístona', gongake' ka gak wen c̱hecho, na' yiyesh'lall'gakile' cho', na' gongake' ka soacho mbalaz kwenc̱he zejch gombia'cho daa nak dii ḻi na' gaki ljwellcho.

4 Dii xen biba bizakid' ka wṉezid' baḻ xiiṉo'ka'† Baḻ xiiṉo'ka': beṉ'ka' nsed nagake' zejin beṉ'ka' chdop chllag choe'la'ogake' Crístona' gana' bseḻee karta'. chdagake' lo nez ḻi c̱he Chioza', kon ka na X̱achona' goncho. 5 Na' ṉaa, nia' le' chiyaḻ' gaki ljwellcho ganga. Dga nia' le' aga nakan dii zi' benicho, san dezd nechte wṉezicho dga. 6 Dgan yeḻ' chakina': goncho daa non Chioza' mandad. Na' dgan cheenile' goncho: soacho gakichone' na' ḻekzka' gaki ljwellcho kon ka ba benicho dezd nech.

7 Beṉ' zan beṉ' wxiye'ka' ba chda yell-lioni, na' bi chajḻe'gake' nan ba bid Jesucrístona' yell-lioni goke' beṉ' de beli chen. Beṉ'ka' bi chajḻe', ḻegaken' beṉ' wxiye'ka', beṉ'ka' chakzbangakile' Crístona'. 8 Wsak'gale kwenc̱he bi gakdadz llinna' ba benle, san yizi'le banez do ka nak daa chidoḻ'le.

9 Nottezə beena' yilaa nez ḻi c̱he Chioza' na' bich zejlene' daa bli' bsedi Crístona', bi zoalen Chioza'ne'. Na' beena' zejlen daa bli' bsedi Crístona', zoalen X̱acho Chioza'ne' na' ḻekzka' Xiiṉe'na'. 10 Shi no za' gana' zoale zidye'lene' le' dill' daa bi chidiḻin daa bli' bsedi Crístona', bi wleblene' ḻoo yoo lill-lena', ni bi wwaplene' chiox. 11 Ḻa' beena' chlebe'ne', chone' txen dii mala' chone'.

12 Dii zan dii cheenid' iṉia' le', per bi chaklallaa gona'n yishzə. San chbez' gat' latj yidkz' gana' zoale kwenc̱he ile'i ljwellcho na' we'cho dill', na' yiyoll yido soacho mbalaz.

13 Beṉ'ka' nak xiiṉ beṉ' bilo'na',‡ Xiiṉ beṉ' bilo'na': Lḻekzka' beṉ'ka' nsed nagake' zejin beṉ'ka' chdop chllag choe'la'ogake' Crístona' gana' zoa Juanna'. beena' wlej Chioza' gake' lall' nee, chwapgake' le' chiox.