18
Yaamu gu Babilooni idoo digaa ilii hhamisi
1 Qatlay gimbakee giyaa ilii cati, hagi arimi malayika waku yaay ⁄eeti hhapeege yadaa rawaa gu rawgo. Ina yaa kona hiidahhasa da didiri, khooroo goõ dagagii cencuudisi ha wanqamee dosi. 2 Ina gi maahhi hari afoo da didiri tuba:
“Hiĩ huuiri! Hiĩ huuiri! Yaamu gu didiri gu Babilooni!
Inkoo hiti daqa da iliiꞌibinaa sataanimaiĩ.
Hiti daqa da iliiꞌibinaa gieeri paslaapasloo gu tlakwi, haa
hiti daqa da iliiꞌibinaa cira⁄oo sliimaa da tlakwi.
3 Sa gimba, hida gu hhapapu goõ hiĩ kitahhaniri
difaay da dihhi da kwayru gu slipalauuma dosi.
Watemi da khooroo yaa yondiidiri slipalauuma haa ina,
kara hida gu khooroo goó kirigimee haa goó naadiidimee,
hingii ndaqaruumidiri hari hacimaa gu hindaqaruumaa dosi.”
4 Da hheꞌesi, hagi akhasi afoo waka rawaa gu rawgo, kakanta tuba,
“Hida koi, ca⁄aaruu daqa dosaa,
hangu hhanti ilagaasiday haa tlakwaroo dosi,
haa maa hhanti slayday sagadahha daa khoca daqa dosii.
5 Sa gimba, tlakwaroo dosi dagaã upaimi hinti amoolaa daadi rawaa gu rawge,
ina Iliitleemu hiĩ ilakhuukhuꞌusi hukuruu tlakwaroo dosi.
6 Unkuray see saga yonditee, ina gooay idoo giyaa iliiyonditi daqa doogunay.
Sagay slarakhasidee waa cada, sa tlakwarotira giyaa yonditi daqa hida wa⁄age.
Qulu⁄uu gosiige sagay roogidee qada gu labaꞌasu waa cada gu hikiray sangwaay roogidi ina.
7 Saga qaydee labaꞌasu haa slahhaaꞌamee wa⁄a,
idoo ina gooay hingaa iliiduubidi, haa
idoo giyaa ilii ibiti ibinaa da hhaꞌaloo.
Sa gimba, ina hingoótii duubida muuna gosii tuba,
‘Ana haã ibiidi kitiĩ gooii malikiyaa pahha, ana ti mogombitoꞌoo gooba,
kara hamaa arimaaba gaiidimoo coko⁄o see!’
8 Teesaaqay, sagadadahhu gosi yaati khay baloo leẽ kilesi,
sagadadahhu gu gwaaꞌaraa, gaiidimoo haa qori.
Ina dagati hhamisi hari aslaa,
sa gimba, Looimoo Iliitleemu gu kooma ⁄uuru goõ,
ina naga hukuna.”
9 Watemi da khooroo gwaa yondiidee slipalauuma haa ina, haa hingigi ilagaasiri haa ibinaa dosi da hhaꞌaloo, maa ⁄aa⁄iyay haa gi gaiidiyay sa ina, gimaa ilii anee eehha gu ci⁄araa dosi. 10 Watemitee maati qadimidiyay segenge loii, sa tlaꞌamee da labaꞌasu gosi. Inay maa ⁄aa⁄iyay haa gi kaayay tuba,
“Laoo! Laoo, ye yaamu hhanki gu didiri gu Babilooni,
yaamu gu koomee ⁄uuru hari khisla!
⁄agitiru googi yanti khay qoomay gu saa lenge.”
11 Hida goó kirigimee gu khooroo, maa ⁄aa⁄iyay haa gi ⁄isinay gaiidimoo gu didiri sa ina, sa gimba inkoo hhaku heedi gu kiriga kara khooslay gooina, 12 gu sahaabu, feesa, tle⁄eẽ gu kaari haa luulu. Kara hhaku heedi gu kirigima qayroo daa boo⁄imisi hari puteeri gu hhoi gu ⁄abakwi, qayroo gu hhoi gu kalay gu daahhiya, kalay gu da⁄adani haa daa boo⁄imisi hari puteeri gu hariiri. Kara wanaaba heedi gu kiriga khooslay daa boo⁄imisi hari khai doó uudi oine,* 18:12 khai doó uudi oine: Khai gu uudi ti aslayi gu khai gu muchungwa, mulimaaw haa mudiimu. ⁄aamu gu khai gu uudi kalay gooina gu qalamaasiya daa ⁄adaꞌadi, kara gu denu ba⁄ay ⁄aamu gu limaawu. Khaimoki dugoó kaꞌamisi sa bangasayi, bangasayi gosi gu hhou. khooslay sliimaa daa boo⁄imisi hari khadami gu daw haa khooslay daa boo⁄imisi hari khai gu kaari. ⁄aray, sikhimi haa tle⁄eẽ gu hhoi guri tlehhinay. 13 Hhaku heedi gu kiriga mudalasiini,† 18:13 mudalasiini: Ti khaimoo qafaa dosi konta tafu gu cuua, kara dagoó hiiroogi ⁄agooge. hiliiki,‡ 18:13 hiliiki: Ti khaimoo ⁄aamu gosi kona tafu gu cuua, kara dugoóyi roogi ⁄agooge, hiroó khay tafu gwaa cuuꞌu ⁄agooge. ufumba,§ 18:13 ufumba: Ti ongonoo da khaimoo waku da kooma tafu gu cuua, yondu gosi dagarooti ilaeehhimisi maraaige. marihaamu,* 18:13 marihaamu: Ti du⁄iya da kooma tafu gu cuua hari khisla, du⁄iyati dagaroo maakhi tuuꞌuna ma maydi tli⁄araa. ubaanii,† 18:13 ubaanii: Ti ongonoo doó tii⁄a da khai wakinay, bere hiĩ kaadi dagoótii slakhi aslaage hiraagi khayda tafu gu hhou. Yuꞌudii kitaabukii 5:8; 8:3. difaay, du⁄iya da seyituuni, gubaraa gu hhou haa ganoo. Kara hhaku heedi gu kiriga yakway, bee⁄u, faraasi haa kokoteenaaee, tongee haa ibinaa da hida see. 14 Hida goó kirigimee hiti kaayay tuba, “Idadu hhakira goõ gaa slaꞌade haa daa slahhaai ha muuna googi, hhaki hingii hhancooiri daqa doogaa. Idadu goõ gu dumbii doogi, hingii hhancooiri. Wanaaiiba, hagimaa kara slaydaaba coko⁄o see, koraraa haa koraraa goóba hiifaakoo!”
15 Teꞌesii hida goó kirigimee gwaa slawee hindaqaruumaa daqa dosaa, maati qadimidiyay segenge loii, sa tlaꞌamee da labaꞌasukee. Inay maa ⁄aa⁄iyay haa gi ⁄isinay gaiidimoo gu didiri. 16 Inay gi kaayay tuba:
“Laoo! Laoo, yaamu hhanki gu didiri,
gwaa daamaamisa qayroo daa boo⁄imisi hari puteeri gu hhoi gu ⁄abakwi, qayroo gu kalay gu daahhiya haa kalay gu da⁄adani,
kara hangaa ⁄alimaamita hari sahaabu, tle⁄eẽ gu kaari haa luulu!
17 Teesaaqay see,
hindaqaruumatee goõ daganti hhamisi hari qoomay gu coko⁄u kilesi!”
Hida goõ goó wariiqadimidee meeli, goó hhiyuumidee hari meeli, goó yondiidee meelige, kara haa hhakee goõ goó slaslawe peesay hari yondu giyoó yondiidiyee tlawa da didirige, maati qadimidiyay segenge loii. 18 Qatlay gimaa ilii anee eehha gu ci⁄araa da yaamu hhakee, inay maati ⁄aa⁄iyay hari khisla, tay kakaanay tuba, “Wanaaiiba yaamu wakinay gu didiri da yaamu hhankaa gooay gu didiri!” 19 Inay hingimaa iliikuꞌumisiyay ceceiya sagaiĩ koinay sa slahhaaꞌamee. Kara maa ⁄aa⁄iyay haa ma ⁄isiniri gaiidimoo gu didiru, tay kakaanay tuba,
“Laoo! Laoo, yaamu hhanki gu didiri,
gwaa hindaqaruudisee hida goõ, hari khooslay gosi,
hida goõ gu koomee meelaluu tlawa da didirige.
Yuꞌudiyaa hari qoomay gu saa lenge
yaamu hhanki diginti hhamisi goõ.
20 Kara hagi akhasi afotira rawaa gu rawge,
kakaanta tuba, ‘Hhaꞌaluumida unkuray goó ibiidee rawaa gu rawge!
Hhaꞌaluumida hida gu Iliitleemu, ya⁄abimiisee haa tletimiisee!
Iliitleemu hiĩ hukumi yaamu hhakee,
sa gimbakira giyaa yondiidi daqa doogunay.’ ”
21 Da hheꞌesi, malayika leẽ gu kooma ⁄uuru gii oyi tlaa⁄a da didiri, hataꞌa pahha da saadiru, gigii lihhi waꞌay gu tlawa da didirige, tay kakaana tuba,
“Teesaaqay, Yaamu hhakee gu didiri gu Babilooni,
diginimaa ilii lihhi hari ⁄uuru waꞌay loii,
digimaa arinaaba kara.
22 Yaamu hhakeesii damaa akhasiyaaba kara afoo da raaꞌamiisee, mu⁄udiisee da pandaqway,
hiifahhamiisee da firimbabuu, haa afoo da parandaiĩ,
etaa digimaa kara akhasiyaaba waꞌay kosii.
Waꞌay kosii, etaa damaa arinaaba kara dakwidiisay gu kooma cirihhimaa paslaapasloo.
Gimati afoo da tlaa⁄a da saadiruu see,
etaa dagamaa akhasiyaaba kara.
23 Cencee da taa dagamaa arinaaba waꞌay kosii kara,
Afoo da khabimiisay haa da khabimiisoꞌoo
etaa dagamaa akhasiyaaba kara waꞌay kosii.
Yaamu gu Babilooni digimaati laqi taqay, sa gimba hida goó kirigimee teꞌesii, yaati hida gu deni haa gu tlakwi hari khisla.
Kara, sa gimba hida gu hhapapu goõ, digaa hiicoridi hari miislay gu yaamu hhakee gu didiri!”
24 Asunkuilee yaamu hhakeesii dagaa arimi ceedee da tletimiisee da Iliitleemu, da hida gu Iliitleemu
haa da hida goõ daa cu⁄i khoorooge sa gimba gu Kristu.
*18:12 18:12 khai doó uudi oine: Khai gu uudi ti aslayi gu khai gu muchungwa, mulimaaw haa mudiimu. ⁄aamu gu khai gu uudi kalay gooina gu qalamaasiya daa ⁄adaꞌadi, kara gu denu ba⁄ay ⁄aamu gu limaawu. Khaimoki dugoó kaꞌamisi sa bangasayi, bangasayi gosi gu hhou.
†18:13 18:13 mudalasiini: Ti khaimoo qafaa dosi konta tafu gu cuua, kara dagoó hiiroogi ⁄agooge.
‡18:13 18:13 hiliiki: Ti khaimoo ⁄aamu gosi kona tafu gu cuua, kara dugoóyi roogi ⁄agooge, hiroó khay tafu gwaa cuuꞌu ⁄agooge.
§18:13 18:13 ufumba: Ti ongonoo da khaimoo waku da kooma tafu gu cuua, yondu gosi dagarooti ilaeehhimisi maraaige.
*18:13 18:13 marihaamu: Ti du⁄iya da kooma tafu gu cuua hari khisla, du⁄iyati dagaroo maakhi tuuꞌuna ma maydi tli⁄araa.
†18:13 18:13 ubaanii: Ti ongonoo doó tii⁄a da khai wakinay, bere hiĩ kaadi dagoótii slakhi aslaage hiraagi khayda tafu gu hhou. Yuꞌudii kitaabukii 5:8; 8:3.