1 Kila heedi goó ⁄imba tuba, Yeesu ti Kristu, hikee ti nanku Iliitleemu. Kara kila heedi goó slaꞌa ayi, slime ina yoóti slai naw daa laqwali ha ayikee. 2 Dandiray ha khuana tuba, ha slaꞌana yaꞌay gu Iliitleemu, qatlay goó iliislaꞌane Iliitleemu, haa gi iliikona ilakaawa dosi. 3 Maꞌaana slaꞌamuu Iliitleemu, ti iliikooma ilakaawa dosi. Kara, ilakaawa dosi datii looiiba, 4 sa gimba, kila heedi hiĩ gu nanku Iliitleemu yoó kaba⁄i gimba gu tlaku gu khooroo. Taqaaqay haganoó ilii kaba⁄ana gimba gu khooroo, hari ⁄imba doori ga kone. 5 Wanaaba heedi gu hiidahhasa kaba⁄a gimba gu tlaku gu khooroo, ti hikaꞌa kilesi goó ⁄imba tuba, Yeesu ti Nanku Iliitleemu.

6 Yeesu Kristu, ina na heedi loi, naa khay hari maꞌay haa hari ceedee.* 5:6 maꞌay haa hari ceedee: Tiꞌii maꞌay hiidahhasi laqaruu gimba gu hiidawaraa da Yeesu baku hiinunqudisa dosi. Ceedee laqanta gwaaꞌaraa dosi. Harii amoo da hiidawaraa dosi baku hiinunqudisa dosi maꞌayge yaa tlaatleesi yondu gosi tiꞌii khoorooge. Kara hari gwaaꞌaraa dosi musalaabage yaa hiigaasi yonduki tiꞌii khoorooge. Ina yaati khayiiba hari maꞌay kilesi, slime yaati khay hari maꞌay haa ceedee. Kara, ina Muuna gu Iliitleemu noó ilatlatlay gimbaki, sa gimba Muuna gu Iliitleemu guti lou. 7 Maꞌaana, wanay tami goó ilatlatlawee, 8 ti Muuna gu Iliitleemu, maꞌay haa ceedee. Hhaã tami hingoóti ila⁄imbidiyay ilatlawa lenge. 9 Bere dandiray hoó ⁄imbana ilatlatlaw gu hida, ilatlatlaw gu Iliitleemu guti didiru hari khisla. Maꞌaana haã na ilatlawaraa da Iliitleemu tuba, ina yaa ilatlatlay Nankosi. 10 Kila heedi goó ⁄imba Nanku Iliitleemu, ina khui muuna gosii tuba, ilatlawatee dati loi. Kila heedi goóba iliipaꞌaru Iliitleemu, ina yoóti laqana tuba, ina beelaa Iliitleemu ti afaꞌafuusayi. Sa gimba ina yaa ⁄imbiiba ilatlawaraa da Iliitleemu giyaa ilatlatlay daqa Nankosii. 11 Ilatlawatee na nahaã tuba, Iliitleemu sindii hadisi slafimaa gu koraraa haa koraraa goóba hiifaakoo, kara, slafimaa hhakee wanay daqa Nankosii. 12 Kila heedi gu kooma Nanku Iliitleemu, hikee kona slafimaa hhanki gu koraraa haa koraraa goóba hiifaakoo. Ina guba Nanku Iliitleemu, hikee konaaba slafimaa hhanki gu koraraa haa koraraa goóba hiifaakoo.

13 Ana sangu handikiikima gimbaki sa unkuray, goó ⁄imbanee uma gu Nanku Iliitleemu, ma caahhadiri tuba, unkuray kontay slafimaa gu koraraa haa koraraa goóba hiifaakoo. 14 Kara, haã na ⁄atlimaa ga kone pandaa da Iliitleemuge tuba, bere ha firina idoo, ina goóay gi iliislaiye, hindi akhasi. 15 Kara ha khuana tuba, ina hindi akhasi firoo doori, idoo ga firiirine, teꞌesii dandiray ha khuana tuba, haã hheꞌesani haã slayni gimbakira gaã firini.

16 Wanta tlakwaroo doóba qaasa heedi segenge haa Iliitleemu, koraraa haa koraraa haa koraraa goóba hiifaakoo. Bere heedi arina hhia gosi yondiidi tlakwaroo da gwaaꞌaraa gooba, sugu firine daqa Iliitleemuge, ina Iliitleemu ki⁄isi heedikee amoo da slafimaage. Hiti teesaaqay sa hhakaꞌa goó yondiidee tlakwarotee. Teesaaqay see, wanta tlakwaroo doó qaasa heedi segenge haa Iliitleemu koraraa haa koraraa goóba hiifaakoo. Ana ha kaawaaba ambee firine Iliitleemu sa tlakwarotee. 17 Gimba sliimaa gu haaki gooba, ti tlakwaroo, teesaaqay see, wanta tlakwaroo daroóba khawaraa gwaaꞌaraa.

18 Dandiray ha khuana tuba, kila heedi hiĩ gu nanku Iliitleemu, ina yoó yondiidiyaaba tlakwaroo. Maꞌaana, Iliitleemu ina loi gu ga⁄ay nankosi, teesaaqay Biriisimoo gu hiidahhasiyaaba ilaqaꞌa. 19 Dandiray ha khuana tuba, dandiray ti yaꞌay gu Iliitleemu, khooroo goõ dagoómati tawaalimi ha Biriisimoo. 20 Kara, dandiray ha khuana tuba, Nanku Iliitleemu yaani khay, ina sandii hadisi dandiray waaway, ma caahhani Iliitleemu gu lou. Dandiray ha kona ilagaasa haa Iliitleemu gu lou, hari amoo da kooma ilagaasa haa Nankosi Yeesu Kristu. Hiĩ na Iliitleemu gu lou haa gu kooma slafimaa gu koraraa haa koraraa goóba hiifaakoo.

21 Yaꞌay koi gu digidakwi, hangu ga⁄aydee haa caacaahhamisu gu iliitleemamee.