5
Ating Nilulun neng Buuk bekeꞌ Ating Ibun neng Bibili
1 Pegketbes et itue e, aku, si Juan, nebiriꞌ ne pegekpetan et kewanan neng keremut et Empuꞌ, na Ya megearung dut metaas na eerungan tiꞌ, ating sembatung linulun neng buuk na maya surat pesembelaꞌsembelaꞌ. Na atin buuk maya pitung binedbed naꞌ maya tendaꞌ. 2 Nebiriꞌ ku gasi ating sembatung mekseg na dereakan et Empuꞌ na megabar et mebasag, kwan ye, “Sinu ating teupen neng megbabad et bedbed na tendaꞌ bekeꞌ mengledlad et linulun neng buuk?” 3 Segwaꞌ kaya misan sembatu dut langit, dut timbewʼt dunyaꞌ etawa dut seled dunyaꞌ na mekeukab etawa mekesiyek dut seled et itue e. 4 Siminyak ku neng siminyak sabab et kaya neng mebiyanan na meteup mengukab et linulun neng buuk etawa misan mekesiyek dut seled et itue e. 5 Indyari maya sembatung megurang negsugid daken, kwan ye, “Kas siyak! Birinaꞌ ating Leon mawaꞌ dut tutusan i Juda, ating Puun i Surutan Dabid tagnaꞌ, Ya in nengindaag. Ya ga ating mekebabad et pitung bedbed na tendaꞌ bekeꞌ Ya ga ating megepegukab et linulun neng buuk.”
6 Indyari nebiriꞌ ku sembatung taaw, dagbes ye samat sembatung Ibun et Bibili* 5:6 Ibun et Bibili - Ya ne nesurat itueng buuk inusalen “Bibili” samat pata et si Kristo neng negbiyag peuliꞌ teyeg kepeteyan bekeꞌ pinetaas et Empuꞌ, sabab si Kristo natey samat ating simayaꞌ sabab et mengeꞌ salaꞌ et mengeꞌ taaw., dagbes ye samat mawaꞌ ne sinumbaliꞌ. Itue e ne megetiyeg set pinegketngaaʼt mengeꞌ metaas na eerungan, na pelilibutan et epat neng pinendyari na biyagan bekeꞌ mengeꞌ megurang. Maya pitu tanduk ye bekeꞌ pitung mata ye, na atin mengeꞌ pitung Nakem et Empuꞌ na dinaak dut tawʼt sengketelingkepaʼt lungsud. 7 Nepekabiꞌ itueng Bibili ampaꞌ ye ne insiꞌ ating linulun neng buuk dut kewanan neng elima et ating megearung dut metaas na eerungan. 8 Indyari neisiꞌ ye ne ating buuk. Pegketbes ating epat neng pinendyari na biyagan bekeꞌ ating duwangpuluꞌ epat neng mengeꞌ megurang in nepekleb dye dut elepan et ating Ibun et Bibili. Tegsemba-sembatu kedye, megekpet dye et pegrengrangen bekeꞌ mangkuk neng bulawan na baha et kemengyan. Itue e mengeꞌ penelang et mengeꞌ mengengandel et Empuꞌ. 9 Memegkekanta dye et bagung kulilal, kwan dye,
“Keteup-teup ke ne mengisiꞌ et linulun neng buuk, megbabad et tendaꞌ et itue, bekeꞌ mengledlad et buuk,
sabab ikew tuꞌ sinimayaꞌ, angkan sabab et duguꞌ mu atin nilingkat mengeꞌ taaw apang lang ki Empuꞌ, taaw mawaꞌ dut kenye-kenyeng tutusan, bebresan, lungsud, bekeꞌ bangsa.
10 Binwat mu dye et sembatung pengmilikan bekeꞌ mengeꞌ pariꞌ supaya sumukuꞌ dut damen neng Empuꞌ,
sampay memegbeg dut sengkelingkepaʼt lungsud.”
11 Siminyek ku gasi, indyari nekingeg ku bebresen et ribu-ribu bekeꞌ laksaꞌlaksaꞌ neng mengeꞌ dereakan et Empuꞌ. Ampaꞌ dye ne pinelibutan ating metaas na eerungan bekeꞌ dut ating mengeꞌ pinendyari na biyagan bekeꞌ mengeꞌ megurang. 12 Nemegkanta dye et mebasag, kwan dye,
“Ating pinatey ne Ibun et Bibili, atin keteup-teup tumerima et kepengdyarian bekeꞌ kementirian, bekeꞌ kesesewran bekeꞌ kebesagan, kebentugan, kereklaan bekeꞌ pegdayew!”
13 Pegketbes nekingeg ku ginsan mengeꞌ pinendyari na biyagan nemegkanta, dut timbewʼt dunyaꞌ, dut seled dunyaꞌ, bekeꞌ dut sengkelingkepaʼt dagat, sampay ginsaʼt seled atin, kwan dye,
“Dut kenye na megearung dut metaas na eerungan, bekeꞌ dut ating Ibun et Bibili ibgey kenye ating kedeyewan, kebentugan, kereklaan, bekeꞌ kepengdyarian, daran-peraran.”
14 Ating epat neng pinendyari na biyagan nemegberes, et “Tantu Banar.” Indyari negpekleb ating mengeꞌ megurang bekeꞌ nemengempuꞌ ki Jesus.
*5:6 5:6 Ibun et Bibili - Ya ne nesurat itueng buuk inusalen “Bibili” samat pata et si Kristo neng negbiyag peuliꞌ teyeg kepeteyan bekeꞌ pinetaas et Empuꞌ, sabab si Kristo natey samat ating simayaꞌ sabab et mengeꞌ salaꞌ et mengeꞌ taaw.