Ikeruwang Surat i Pablo ki
TIMOTEO
Kepurisnan et Ikeruwang Surat ki Timoteo
Itueng ikeruwang surat i Pablo dut ki Timoteo na sembatung pemitua neng sengkeumuran eset mengengeradya ye eset mengeꞌ ketingtimungan et mengeꞌ mengengandel. Kesendalan itueng unang pemuunan neng suratan itue. Pinituanan i Pablo si Timoteo bekeꞌ pineenep apang megpelahyun eset pegsaksiꞌ et tibuuk neng ketentuan tudyu dut ki Jesus Kristo, sampay kepenggeran kumpet eset ketulduan neng pegmerganeng Kesuratan pasal et Menungang Abar bekeꞌ Lelaging Pinegsulutan. Epegpitua ye gasi na sukupen itueng kenyeng pegsusukuan bilang sembatung menunulduꞌ bekeꞌ mengengabar. Ginsan neng itue subaliꞌ ye buwaten misan ne ya kelabay et keliyutan bekeꞌ pegsungsang.
Maya gasi peamay-amay ki Timoteo pasal eset mengeꞌ kaya kepulusan pegdeꞌdawa na kaya meigbey, imbes mekeperaat eset mengeꞌ mengingingeg (Kapitulo 2:23). Eset ginsan itue, iperendem ki Timoteo pasal et sungtuhan et kebiyagan bekeꞌ kesadyaan i Pablo neng nesurat: pasal et pengandel ye, kesendalan ye, pegmerganan ye, sampay mengeꞌ kelelewan ye eset mengeꞌ ketiksaan.
Ketulduan et itueng Surat
Pemangling 1:1-2
Pegpeselamat sabab si Timoteo bekeꞌ mengeꞌ Peamay-amay 1:3-18
Menungang Sundalu i Jesus Kristo 2:1-7
Itueng Menungang Abar na Pegpeabar Ku 2:8-13
Pemitua bekeꞌ Peamay-amay 2:14—3:17
Mengeꞌ Diring Bebresen 4:1-18
Mengeꞌ Emuring Pemangling 4:19-22
1
Pemangling
1 Mewanan ki Pablo na ginerar et Empuꞌ na megmendyaring bibilinan i Jesus Kristo, apang mengabar pasal et biyag itinangeꞌ ne mekpetan tyu dut pekikisembatu tyu ki Jesus Kristo.
2 Eset ki Timoteo, na pegmerganen ku neng yegang. Meseʼt dimu teyen redyikiꞌ, ingasiꞌ, bekeꞌ kesenangan mewanan dut Empuꞌ Amaꞌ bekeꞌ ki Jesus Kristo na kityung Begerar.
Pegpeselamat Sabab si Timoteo bekeꞌ Peamay-amay Kenye
3 Megpeselematan ku dut Empuꞌ pegpeperuri kut kaya lang riridiꞌ et pusuꞌ, samat pegbuwaten et dakeng keupuꞌupuan, na daran pegrendemen ke eset dakeng pegpenelang eldew gebi. 4 Peggeay-geayen ku na mebiriꞌ ke apang meseraan itueng dakeng keenepan, lebi ne baꞌ merendeman ku dimung pegluhaꞌ eset pegparak tyu. 5 Diki ku melipatan itueng tantu mu neng pegandel, samat pegandel et upuꞌ mu neng si Luisa bekeꞌ si Eunise na dimung induꞌ. Netantu ku na masi nega tiban pegendelen mu itue. 6 Sabab et itue, pegperendem ku dimu na teyen megmendyaring melasig ke eset pegasip neng gerar na dimung neterima eset Empuꞌ, ganang negpenelanginan ku dimu bekeꞌ nedpen ku itueng dakeng mengeꞌ keremut eset dimung ulu. 7 Sabab binggey et Empuꞌ eset kityu Kenyeng Nakem. Bekeꞌ binggey et itueng Nakem Ye kityu pikiren na lein ketelawan, imbes binggey Ye kityu kepengyedian, tabang dut pegmerganan eseʼt iba tyu bekeꞌ pegeteng et diriꞌ.
8 Angkansa, kasiꞌ ileewaꞌ itueng pegpepesebanar pasal et Begerar tyu etawa itueng pegpirisu daken sabab et megsukuꞌ ku eset Kenye. Temed erapun mekibagiꞌ ke eset keliyutan sigun dut Menungang Abar, eset kebegbesagan et Empuꞌ. 9 Na nemawiꞌ bekeꞌ piniliꞌ eset kityu apang tyu megmendyaring Kenyeng pasek metignang taaw. Binuwat ye itue lein lang sabab eset mengeꞌ keradya tyu, imbes sabab eset kenyeng kepurisnan. Sabab mura nega tumagnaꞌ itueng timpu, pinanyap Ye ne ibgey Ye kityu itueng redyikiꞌ pebiyaꞌ ki Jesus Kristo. 10 Angkansa na tiban nebunayag lang Kenyeng redyikiꞌ ganang diminateng si Jesus Kristo neng Mememawiꞌ tyu. Nengindaag ya eset kepengyedian et kepeteyan, bekeꞌ pinebunayag itueng biyag na kaya seskeran pebiyaꞌ et Menungang Abar et Empuꞌ.
11 Ginerar et Empuꞌ aku bilang sembatung bibilinan bekeꞌ menunulduꞌ supaya ipebunayag itueng Menungang Abar. 12 Indyari itue sinebaban angkansa meketiksaꞌ ku et kwantin. Megsepantun gasi kaya pegleew itueng neinabu eset daken, sabab sukup na nekilala ku itueng dakeng pepengerapan, bekeꞌ netantu ku na meingetan Ye seked dut emuring Eldew itueng ipinengandel Ye eset daken. 13 Buwaten mu et sungtuhan itueng mengeꞌ banar neng ketulduan, na pegtulduꞌ ku eset dimu. Tumeteg ke eset pegpengandel bekeꞌ eset pegmerganan mu dut mengeꞌ iba mu, na tinerima tyu itue eset pekikipegsembatu tyu ki Jesus Kristo. 14 Eset tabang et Empung Nakem na megsesaleb eset kityu, ingetan mu ginsan itueng kebebenaran ipinengandel eset dimu.
15 Kaya neawam eset dimu na aku tinelikuran et agen ginsan neng mengengandel eset probinsiya et Asia, sampay ne de Pigelo bekeꞌ si Hermogenes. 16 Ingesinan teyen et Empuꞌ itueng kesengbenwa i Onesiporo, sabab mekansang neng timpu aku kenyeng pineksan. Kaya ye aku ipegleew, misan ne aku sembatung pinirisu. 17 Keberbenaran, pegdateng ye eset lungsud et Roma, ginees ye na tinulus aku seked na aku kenyeng mebiyanan. 18 Teyen ingesinan ya et Begerar eset Eldew et Kenyeng pegpeuliꞌ atue. Na nesewran mu banar na baꞌ enukwan ye aku pineruri eset lungsud et Epeso.