5
Mas'aafonat mereeron
1 5:1 Hzk'. 2:9-10; Isa. 29:11 B́ naashi jooratse beedek'tso k'ani kishatse, b́ gitse bootso bíats guut'etso shawat matabon togets mas'aafi k'odo tbek'i. 2 Melaki kup' iko k'áári eenon «Mahatebwotsi biishr k'odets mas'aafo wogosh bín geyitwo kone?» ett b́ keewfere t bek'i. 3 Ernmó daron wotowa datsatse wee datsoniyere dashe k'odets mas'aafo wogitwonat b́ gitso s'iilo bísh faletso konwor aali b́teshi. 4 K'odets mas'aafo wogitwonat b́gitso s'iilosh bodtso daatseyo b́k'aztsosh ayidek'at ti eepi, 5 5:5 Aze. 49:9; Isa. 11:1; 10 Manoor eenashwotsitsi iko «Eepk'aye, hamb Yhud jirotse wottso Dawit s'ap'o da'adek're, bí k'odets mas'aafonat shawat matabwotsi wogosh falitwe» bíeti taasha.
6 5:6Isa. 53:7; Zek. 4:10 Haniyere il naashi jooronat awd kashets azeetswots dagotse, eenashwots dagotsnowere shukeets mereer artso b́ need'efere tbek'i, mereran shawat k'alonat shawat ááwwotsi detsfe b́tesh, bo dats jamomaants wosheets Ik'i Shayirwotsiye. 7 Bí waat naashi jooratse beyirwo k'anikishatse mas'aafi k'odo k'aaú b́dek'i, 8 5:8 Dub. 141:2 mas'aafi k'odo b́ dek'or azeets kashets awdwotsnat hiye awd eenashwotsn mereero shinats bobaron bogúp'gup'i, ik ikon begeno detsfno bo teshi, mank'o S'ayinwots Ik' k'on wottso it'ano bín s'eents awntsi agelgiliyo detsfno boteshi. 9 5:9 Dub. 33:3; 98:1; Isa. 42:10 Handr duubo hank'o ett boduubi,
«N s'atson naar naarotse, noon keew jamotse,
jir jirotse, bí ashuwotsitse
Ashuwotsi Ik'osh keewosh,
nee n shukeetsotse
mas'aafi k'odo de'er
matabman bitsosh faltso k'osho konwor aaliye,
10 5:10 Kesh. 19:6; Bek'. 1:6 No Ik'oshowere kahaniwotsnat mengsto
bowotitwk'o woshrne,
datsatsnowere naashitúne.»
11 5:11 Dan. 7:10 Man maants ts'ilor naashi jooron, azeets kashetswotsnat eenashúwots gúúratse ay melakiwots k'ááro t shishi, bo ayonwere ay kumonat ay miliyeniyon tawetkne bo teshi, 12 een k'ááron,
«Shukeets mereero ango, gaalo, dantelfo, kúp'o, shúúts eeno, mangonat
údo dek'osh bísh geykee» boeti.
13 Daronat datsatse, datsoniyere dashe aats k'ari gitsotsi azeets jamo
«B́ naashi jooratse beyirwonat mererosh
udo, shúúts eeno, mangonat angon
Dúre dúren tuur dúrosh b́borfetso wotowe!» bo eree t shishiri.
14 Awd kashets azetswotswere «Amen!» boeti, hiye awd eenashwotswere bo baron gúp'gúp'at bosagadi.