2
Beyar beet shutsonat s'ayin ashuwotsn
1 Eshe gond jámo, dirsh jamo, ats dáro, okooro, konnari óóno wokiwere, 2 And shuwets na'auots ez gooro bo tewnfok'o itwere kashon eenfere it amish s'ayin wotts shayiri dano tewnwere. 3 2:3 Dub. 33:8 Tewnosh it falitwere «Doonzo tewd doo b́ wottsok'o shashwerte wotiyale.»
4 Mansh beyar beetk shúts wottso doonzo Iyesus maants t'inere, shútsanwere ashuwots gac'at bok'ztso, Ik'oknomó bín b́ marat'etsonat mangits k'awnts detstsoniye. 5 Doonzo Iyesus maants it t'iinet beyar beet shútsok'o Shayiri moo wotarr agewoshe, hank'on Iyesus Krstos weeron geneúshit shayiri wosho Ik'osh t'intsosh S'ayin Kahniyotsi wotitute. 6 2:6 Isa. 28:16 S'ayin mas'aafotse
«Hambe! marat'etsonat mang wotts
Tungúshatse shútsuwotsi kaatsde detset shuuts kup' S'iyonits beezitwe,
bín amanitwo b́jamon jitseratse»
etts aap'o guut'eyatniye b́ fa'oni. 7 2:7 Dub. 118:22 Eshe it amanirwotssh shútsan mangkee, amanerawwotsshomó
«Gmbi agirwots gac'at bojuuts shútso tungúshatse shutswotsi kaatsde detset shúts kúp'o b́ woti.»
8 2:8 Isa. 8:14-15 Ando aani
«Ashuwotsi gandit shútso,
hambe! ashuwotssh t'ug wotar dikit shúts s'aloni» etfe.
Bowere bí aap'tso amano bok'aztsosh dihitúne, shinonowere hansh beezekne.
9 2:9 Kesh. 19:5-6; Isa. 43:20-21; Iwi. 4:20; 7:6; 14:2; Tito 2:14; Isa. 9:2 Itmó t'alwotsere adits shááno maants iti s'eegts Ik'oko adits fino it nabitwok'o marat'ets shuwetswots, nugúso Kahniwots, Ik'o b́ tookosh woshb́dek'ts S'ayin ash itne. 10 2:10 Hos. 2:23 It bal Ik' ashuwotsiliye itteshi, andomó Ik' ashuwotsi woterte, yoots máác' k'ewo daatsatste b́ teshi, andomó máác' k'ewo daatsrte.
Ik' guutswots
11 T eshwotso! datsanatsere ibwotsnat ash datsi ashuwotsi it wottsotse kashonton kaareyiru meetsi tewnotse it wokitwok'o oona itsha etirwe. 12 Daneraka «Gond finirwotsiye» err itn bo oniyaloru dab Ik'o noon s'ilosh b́ weet aawots Ik' ash woterawwots it sheeng fino be'er Ik'o bo uditwok'o bo dagotse it beyor sheeng doyo it detsetwok'owa.
13 Doonzo Iyesus Krstossha err ashaatsere naashts jamwotssh alewere, dambaan bogt naash b́wottsotse naashi naashosh alewere. 14 Dats k'eezirwotssho alewere, bo gond finirwotsi sezosh, sheeng finirwotsi udosh naashi naashoke wosheekne. 15 Sheengo finar dartswots bodari aap'otse s'k bo etetwok'o it k'alo Ik'i shune. 16 Ik' guutswotskok'o wotar s'ayinon beewere bako it s'ayin beyo gondo bín ipoosh woshk'ayere. 17 Ash jamo mangiwere, amants eshwotsi shunere, Ik'o sharere, nugúso mangiwere.
Krstos gond bek'on ariyetso
18 Guutswotso itwere it doonz doonzosh mangiyon keewewere, it kewetwerere shengwotsnat doowwots s'uznsh b́ woterawo gondwotsshor keewewere. 19 Asho s'aato* 2:19 S'aato: Grikiwots noon keew keewon Deera Etirwo udoniye. b́daatsit, weeralon gondbek'o bíyats b́ bodor Ik'osha err b́ k'amitkawotiyale. 20 Gondo finar sezewo de'er it k'amiyal eegi úde it datsiti? Ernmó sheengo finar it eree gondo itbek'oor it k'amiyal Ik'oke údo daatsitute. 21 It s'egewwor manshe, b́ jafrats it sháitwok'o Krstos itsh gondo bek'osh ariyetso wotere. 22 2:22 Isa. 53:9 Bíwere eegoru morro fineratse, b́ noonotsnowere kooto keyatse. 23 2:23 Isa. 53:7 C'asheworowere aanidek't c'ayatse, gondo b́bek'orowere kááwon angshitwo Izar Izewersh b́ tooko oona! ett b́ imi bako sheeferatse. 24 2:24 Isa. 53:5 Morratse k'iron k'alewok'o k'alewon k'aleyar kááwon nobetwok'o bí b́ tookon b́ meetson no morro jitatse kur b́ dek'i, b́ gaawon kashwtserte. 25 2:25 Isa. 53:6 It t'afts mereerwotskok'o it dandefra it teshi, andomó it kashu jinirwonat kotirwok k'az aanertee.
2:3 2:3 Dub. 33:8
2:6 2:6 Isa. 28:16
2:7 2:7 Dub. 118:22
2:8 2:8 Isa. 8:14-15
2:9 2:9 Kesh. 19:5-6; Isa. 43:20-21; Iwi. 4:20; 7:6; 14:2; Tito 2:14; Isa. 9:2
2:10 2:10 Hos. 2:23
*2:19 2:19 S'aato: Grikiwots noon keew keewon Deera Etirwo udoniye.
2:22 2:22 Isa. 53:9
2:23 2:23 Isa. 53:7
2:24 2:24 Isa. 53:5
2:25 2:25 Isa. 53:6