Santiago Karta Nermajad
Santiago
Imi Santiago-karta-nermajaddin, nanbal Jesús-e-urpa. Tenal Jesús-kannan-tullenonikidgin kep Santiago Jesúsgin-ibzhenoni Jesúsde Pab-Machi. Tenal Santiago kwenadgan-Jerusaléngin-pukmalad e-tummadga megwis. Tenal Pedro oturdaleged-neg-akar angel tar-onosgu, Santiagoje kaka-palmis e-wisgugal ega pél igi immal kus (Hechos 12.) Tenal Santiago-Pablo-uanaijadbal, Pablo immal imadi-kusbal (Hechos 21.) Tenal Santiago Judio-tule tegin Moisés-igalgin nuekwa nanedi-kus. Tenal Santiago karta nermasbal Judiojulmaladgin kwen chijul Moisés-igalgin nanegal (Hechos 15.)
Tenal Santiago kwenadgan-Judiomal-akne-akne-pukmaladga Pab-Purpa-Nuedbal iti-karta nermas, kwenadgan wisgumalgal igi naneenabmal. Tenal Santiago chogzhabaldo tule wilub-taklegeddin tule-chan-akar tani, Pab-Tummad-akar wedin kwen tanijul. Tegin kwenadgan yopígwadbi tule-takenabmal, melle akal-akal tule-takmalo. Tenal tule Pab Tummadgin penzhul-kunonikil, tenal tule Pab-chogzhadyob kwen nanejulil, wedin tule-kwen-pentajul Pab Tummad sapejul tulemal-oturdaked-akar abonolegal. Tenal tule Pab-chogzhad-pallí nanediil, kep taklenoniko we tuledin chunchunnad Jesucristogin ibzhenoni, tegin chunchunnad Jesucristo-abingasbal. Tegin Santiago chogzhabal tule turdakenabmal aga e-chunmaked abingemalgal, tegin Pab-ulpallí-nanemalgal. Tenal Santiago chogzhabal kwenadgan kwen wichulmal-choggu emalga igi pan neg-kune, al kwenadgan melle iktual-iktual chogmalo: “An pan keg-chulgu weob immal-imane.” Tenal tulemal Pab-itolegedbalbi unnimalo pan immal-imagal. Tegin Santiago tule-mani-ibgangin chunmasbal. Tegin Santiago chunmasbal kwenadgan wilediidbal pinnallégwadgin abin-purtigenabmal, tegin kwenadgan Pab-penzhulidgin Pabzhe-koledgin-naneenabmalbal. Pitomalgu.
1
1 Imi antin-Santiago, Pab Tummadga arpaged-tule tegin Pab-Jesucristoga arpaged-tulebal. Imi antin pemal-Judio-tule-chogambe-kakabogwad iti-napkin-pel-kwapa-pis-pis-mimilesbukwadga karta wis palmijii. Imi antin nued mai.
Kwenadgan igal-pulegangin abin-purtigedbal Pab-neggin olo-kurkin nikunonimalo
2 Jesúsgin-an-kwenamalad, imi pemalga igal-pulegan akal-akal nonikil, pemal yabli weligwal-itogenabmal. 3 Tenal pemal pato wismaldo, pemal-wilub-taklenonikil pedin chunchunnad Jesúsgin penzhul, tegin kep pe turdanoniko ukin-ukin abin-purtigal. 4 Tenal pe ibe-pulegangin ukin-ukin abin-purti-natapil, pemal Pabgin pinzheed-nikunoniko, tegin pe Pab-igal-mamikidbal pel-kwapa immal imanoniko, tegin pe Pabgin immal kwen napijul-kuo Pab-peigujiidyob nanegal.
5 Imi pemal ampa immal-kwen-wichulil immal imagal, pe Pab Tummadzhe ekisenabmal Pab pirkin-immal-wiis pe-imagal. Tenal pe Pabzhe immal-ekisnail, Pab penik kwen urwojul-kuo, tenal Pabdin pela-pela immal wisgugal pe-imanoniko.
6-7 Tenal pe Pabzhe immal-ekisnail, pe Pab-penzhulinab Pab immal-wisgugal pe-imanoniko. Tenal pe melle pinzhemalo, Pab Tummad tule-egin-pengumaladga immal uko. Tenal tule-Pab-pengumalad nigla-ka-purwa-koledbal-akpinnedyob kudimal. 8 Tenal tule-nigla-ka-akpinnedyob-kudimalad kusgu ilgwen kwen pinzhejulmal.
9 Kwenamalad, imi pemal tule-pollégwadga kudiil, Pab Tummad tule-tummadga pe-imajadbal pe weligwal itoged-wilubmal.
10 Tenal pemal-kwenamalad-mani-ibgan Pab-tule-pollégwadga-pe-imakedbal pe weligwal itoged-wilubmalmo. Tenal pe-manidin unnila tud-chunnedyob ku, pulejul pelgunoniko. 11 Imi tad pela-pela kaalil, tud-chagla tinkudo, e-turpa pél apatido, e-nugu-takleged pelgunonimogo. Tenal tule-mani-ibgan ampa tud-yopí tamalmo, imi mani-e-nikad nue-naojul pelgunonimogo.
12 Imi pe igal-pulegangin abin-purtijal, pega ib-nuedga kunoniko. Tenal Pab Tummad tule-e-pilalmaladga-kaka-ukchadyob, ilagwen-nadgu pe-otulogo, pega olo-kurkin uklejadyob.
Santiago chogzhagujad immalmal-nuegan pel-kwapa Pab-akar tani
13 Tenal pe iskuedgin arkwanbi-kualil, pe melle chogo: “Pab Tummad iskuedgin an-egwanbi-kunai.” Tenal Pab Tummad tule-kwen-cholpalmajul immal-akalogal. Tenal Pab immal-akaloed kwen wichul.
14 Tenal pe iskuedgin arkwanbi-kualil, pe aga tukin immal-akalobied-ulgin, pe iskuedgin arkwanbi-ta, pe aga tukin immal-akalobiedbal pe yardalenonijunno. 15 Al anmal peyedzhe immal-akalobiedbal, anmalga iskued nononiko. Tenal we iskued pinna-pinna tunkumaichunno, anmal-opurkwedzhe.
16 Jesúsgin-an-kwenamalad, an-pemal-pilalmalad, imi pemal melle yardalenonimalo immal-akalogal. 17 Imi immalmal-nuegan tegin immalmal-innikigwad-anmalga-uklejad pel-kwapa nikpa Pab-Tummad-akar tani.
Tenal Pab nikpa-neg-otaloged-e-ibed. Al Pabdin tule-egmalyob-chul. Tenal tule-egmaldin purpa-chichiganayob kwage-kwage natapmal. Tenal Pabdin kwen ogwalejul, tegin Pab pane-pane kwen akalgujulbal. 18 Tenal Pab Tummad e-chunchunnad-chunmakedbal anmal-otulos, anmal-inzhel Pab-pel-kwapa-immalmal-opinnijad-abalgin-kudigugal.
Tule Pab-chogzhad-yopí naneenabmal, tule ual Pab-kaka-itogedginbijul
19 Kwenamalad-an-pemal-pilalmalad, imi an pemalga wisgal chogdo: imi pemal kuakwa kudimalo pe nuekwa tule-itogal igi chog-dewa. Tenal pe melle yogsal-chogzha immal chogo, tegin pe melle yogasal tulegin urwebalo, tenal pemal nuekwa tule-itogenabgwel. 20 Tenal tule-urwemalal Pab-immal-nued-imabi-kunaid kwen imajulmal.
21 Al pemal pel-kwapa igal-iskana ebegenabmal, tule-immal-nunnu-pakal-yapaned-metedyob, tegin pemal igal-iskana-opulamadiid ebegenabmalbal. Tenal Pab-kaka-nuegan-pe-ulubgin-megnonikid pe tummarba-itojulidgin abingeenabmal. Tenal we kakapurwa-nuegan purpal kal nika pemal-abonogal.
22 Imi pemal melle pinche Pab-kaka-nuegan-itogedginbi nanemalo. Tenal pemal pinche Pab-kaka-nuegan-itogedginbi pe nanemalal, pega ib-nuedga kwen kunonikojul, pedin pinche aga tukin yardanai. Tenal pemal Pab-chogzhadyob pe naneenabmal.
23 Tenal pemal Pab-kaka-nuegan itogendo, tenal pe Pab-kaka-itojad-pallí kwen nanejulmal. Al pemaldin tule-purtigidgin-aga-wagal-takedyob kunanimal. 24 Tenal we tule aga purtigidgin wagal takchal, iche wis akpiridel, pato iges-nao e-wagal igi-takle. Al pemal Pab-kaka-choged-pallí kwen nanejulmalal, weob Pab-kaka igenonimalmogo.
25 Tenal tule Pab-igal-innikigwad-tule-ololcheedgin ukin-ukin kin pinzhenatapil, tegin Pab-igal kwen igeszhulbalil, tenal Pab-igalbal pél immal imakel, we tulega ib-nuedga kunoniko.
26 Imi pemal chogel: “An Pab-Jesúsbak-inniki-naneed-tule,” tenal pe wichul aga tukin kaka-iskanagin-chunmaked abingeel, pedin aga tukin yardanai. Al pemal Pab-Jesúsbak-naneed ibga kwen kunonikojul.
27 Tenal tule-Pab-Jesúsbak-immal-akalojulidgin-chwilidik-nanemaladdin nuskan-pabgan-nikchulmalad-akwed, tegin omegan-machered-tarbi-purkwismalad-akwed, tegin tule aga nuekwa taked melle iti-napkined-pinzheedgin aga tukin izhogal.