1 Muri, ri vore kudua a darilomu, ri bele na tabeke ne huriki a Gerasa. 2 E Isu i raga na aga, malaviriri kunana a bakovi tara i dili vona a hanitu i pagitala na murine huriki ri mate, i valai ge tagui e Isu. 3 Ra bakovi iea i mahita na murine huriki ri mate. I uka tara viri ge tuhaka ge kolotata tabu ia. A sen tara, i uka ma i karea. 4 Balaka kupo ni kolotata a limana a vahana, pali i rakudu a sen na limana, i rakudu a aen na vahana. I uka tara viri ge kinigao ge lakavua. 5 Na rodo a haro vakaroro, i laho lae na murine huriki ri mate, na maka lolo, i haloho lae, i pala mule a kulina na kedo.

6 Ra bakovi iea, na tahuna i mata basi, i masia e Isu, i nunu maia, i turume puru na ngalana, i kavurikea. 7  * Mrk 1:24A hanitu pololilo vona i gale dagi, i ta maea, “Isu, Tuna Vure Meli Liu. Go rata navai iau? Iau a nana ioe na matana Vure, naha ni ratapile iau.” 8 I gale dagi mavonga, a vuhuna e Isu i taki mugea i ta maea, “O pagitala vona a bakovi iea, ioe a hanitu kato.”

9 Lakea e Isu i nanea, “E rei a ramu?”

A bakovi i koli i ta maea, “A ragu e Tara, a vuhuna mi ala kupo.”* Na nita Grik a tara i manga ‘Legio.’ ‘Legio’ i manga a tara na nugumaheto ala 6,000. 10 Lakea e huriki a hanitu ri taki torea e Isu, nahea ge lili tala ria na tabeke iea.

11 A kabuna boro ri kakani tabukoi na dahana lolo. 12 Lakea e huriki a hanitu ri taki torea e Isu, ri ta maea, “O rudu mia lakea na kabuna boro, mi gi dili ne ria.”

13 E Isu i longo a ninana ne ria, lakea e huriki a hanitu ri pagitala vona a bakovi iea, ri dili na maka boro. Lakea a kabuna boro ri nunu puru na gali, ri page puru na darilomu, ri pasiri. A maka boro ri 2,000.

14 E huriki a matakari na boro ri ha, ri vakalongo lae e huriki na tanga, e huriki na robo viliha vonga. Lakea e huriki ri lokovonga ri gi matai a maki i bele. 15 Na tahuna ri bele ne Isu, ri masia ra bakovi i dili muga vona a tara na hanitu. Ri masia i made, i rodo a varakia, i kamumu a niluhoi vona, lakea ri mangenge. 16 E huriki ri matai, ri vakalongo e huriki ranga na maki i bele na bakovi ra i dili muga vona a hanitu, a maki i bele na kabuna boro. 17 Muri ri taki torea e Isu ge pe a tabeke ne ria, ge lakea na tanga tara.

18 Na tahuna e Isu i pesi, ta ge rike na aga, lakea ra bakovi i dili muga vona a hanitu, i takia e Isu i ngaru ni laho turana. 19 Pali e Isu i takia i ta maea, “I uka. O lakea na tanga vomu, o vakalongo a kabu vomu vona a maki dagi e Bakovi Dagi i rata virihi ioe vona. O vakalongo ria na hini i dodo ioe.” 20 Lakea a bakovi iea i vano, i vakatubu ni vakalongo o Dekapolis† A ngava e ‘Dekapolis’ na nita Grik i manga ‘a Tanga i Ravulu.’ a maka maki i rata vona e Isu. Lakea e huriki lobo ri longoa a nuverei vona ri turutu.

21 E Isu i vorekudu tabua a darilomu, i lakea na tabekena tara. Lakea e huriki ala kupo ri valai, ri pesi halui ia na dahana darilomu. 22 I bele vona tara matakari na roho na vaponga, a rana e Ierus. Na tahuna i masia e Isu, i lokovonga maia, i turume puru tabukoi na vahana. 23 Lakea i taki tora ia, i ta maea, “E tugu ngatavine i popote ge mate. A ngaru muholi ioe go valai, go ru langa a limamu vona, ge tavaga.”

24 Lakea e Isu i lokovonga turana. E huriki ala kupo ri muri vona, ri vakopekope halui ia. 25 A ngatavine tara, i pori vona a dara na pida i ravulu a polona i rua, i turane ria. 26 Ra ngatavine iea i matai pali e huriki a dokta, pali i bole a nimadihi dagi ne ria, i vakalobo liu pali a moni vona. Pali i uka ma i tavaga. I bele dagi vona a gilanga. 27 Na tahuna a ngatavine i longoa e Isu i bele vonga, i vano, i pesi turana e huriki, i laho valai muri, i padoi a varakia ne Isu, 28 a vuhuna i luhoi maea, “Iau ga padoi kunanea a varakia vona, bara tavaga.”

29 Na tahuna i padoi a varakia ne Isu, i malaviriri kunana i lobo ni tua a darana, i hataki a kakaina i lobo vona a gilanga. 30  * Luk 6:19E Isu i malaviriri kunana i hataki kilalea a nitora i pagitala vona. I ngalakapulo lakea ne huriki, i nana, “E rei i padoi a varakia nau?”

31 E huriki a murimuri vona ri ta maea, “O matai e huriki ala kupo ri vapopo halui ioe. Pali i navai o nana, ‘E rei i padoi a varakia nau?’ ”

32 Pali e Isu i tabana ni matakanea a viri i padoi a varakia vona. 33 Lakea a ngatavine i lakea ne Isu, i turume puru na ngalana, a vuhuna i lohoka vona i mahuri pali. I mangenge hateka, lakea i ta muholi, i vakalongoa vona a maki i ratea. 34  * Mrk 10:52; Luk 7:50; 17:19Lakea e Isu i takia a ngatavine, “O tugu, ioe o mahuri a vuhuna o luhoi tora iau. O vano na nivalemu, a gilanga vomu i lobo.”

35 E Isu i tabana ni ta, ri bele ranga bakovi. Ri valai na ruma ne Ierus, ra matakari na roho na vaponga, lakea ri ta maea, “Naha ni vakapae tabua a mari ni tovo. E tumu i mate pali.”

36 Pali e Isu i uka ma i longo mai a hini ri taki, lakea i takia e Ierus, i ta maea, “Naha ni mangenge. O luhoi tora iau.”

37 I taki e huriki lobo ri gi made vonga. E huriki ri muri vona kunana e Petrus, e Iakop, e Ioanes e turane Iakop. 38 Na tahuna ri bele na ruma na matakari na roho na vaponga, i matai e huriki ri tangi, ri haloho dagi. 39 I dili na ruma, i taki ria, “I navai mu tangi, mu haloho dagi? A sirula i uka ma i mate. I mahita kunana.”

40 Lakea ri nongo vakia. Pali i tono tala ria. I dili turana e tamana koma, e kinana koma, a murimuri vona ala tolu, ri lakea na hini i tabuli vona a podana sirula. 41  * Luk 7:14Lakea e Isu i nugua a limana, i ta maea, “Talita koum.” ‡ A ngava e ‘Talita Koum’ a nita Aram. I maea, “Sirula, a taki ioe o pesi rike.”

42 I malaviriri kunana, a sirula i pesi rike, i laho. A pida vona i ravulu a polona i rua. Na tahuna ri masia, ri turutu hateka. 43 I taki tora ria, nahea ri gi vakalongoa tara viri. Lakea i taki ria ri gi habi vona ranga maki ge kani.