1 Muga e BAKOVI DAGI i taki e huriki a Israel nahea ri gi bole ranga maki. A maki lobo ge nono. Pali e Akan i longotaroa a ngava iea, i panaho ranga maki. Lakea e BAKOVI DAGI i madihi a hatena ne huriki a Israel. E Akan e tune Karmi, e Karmi e tune Sapdi, e Sapdi e tune Sera na kabu ne Iuda.

2 E Iosua i made o Ieriko i rudu e huriki a bakovi ri lakea o Ai, ra tanga i pesi na tabeke na nirikena haro na tanga e Betel, tabukoi na tanga e Betaven. I taki ria ri gi lokovonga ri gi kasisia a tanga iea. Lakea e huriki nga ri vano, ri rata manga a ngava i taki e Iosua.

3 Muri ri hamule, ri vakalongoa e Iosua, ri ta maea, “Naha ni taki e huriki lobo ri gi lokovonga, a vuhuna a tanga i kiroko. O rudu kunana e huriki ri gi ala 2,000 o ge ala 3,000, ri gi lokovonga ri gi vaubi vona a tanga e Ai.” 4 Muri e huriki a nugumaheto ri ala 3,000 ri lokovonga. Pali e huriki a bakovi o Ai ri valili mule ne ria. 5 Ri tubu ni valili ne huriki a Israel na nihebi dagi na tanga dagi i harena o Sebarim.* E Sebarim a tanga ni ubikeve a kedo vona. Ri rabalaki e huriki ri ala ravulu tolu a polona i polotara (36) na dala lakea na lolo. Ni rata mavonga e huriki a Israel ri mangenge, i uka ma ri pesi tora.

6 E Iosua i longo a vuranga i bele ne ria, i dodo hateka i rape a maka varakia vona. I mahita ngalatudu tabukoi na Tava ne BAKOVI DAGI. E huriki a gare o Israel ranga ri mahita ngalatudu turana, ri tabuli mavonga i harena na haro i rolo. Ri vorotapa na gine ria a habulo, ge a kilakila ne ria ri dodo hateka. 7 Muri e Iosua i ta maea, “Bakovi Dagi, ioe a Vure muholi, i navai o bole valai mia koea na tabeke ne Iordan iea? O ngaru go habi mia na limane huriki a Amor ri gi ratapile mia? I navai i uka ma o taki mia mi gi made mule na tabeke lake ne Iordan? 8 Bakovi Dagi, e huriki a Israel ri mangenge ne huriki a pile, ri hamule pali. A ra ngava ga takia ngane? 9 E huriki a Kenan, e huriki a viri na robo iea bara ri longoa a velengana vuranga iea, ri pesi halui mia, ri rabalaki lobo mia. A ra go ratea go ratapile e huriki nga? Re huriki nga bara ri ta hale, ri biu a ramu.”

10 Lakea e BAKOVI DAGI i takia e Iosua i ta maea, “O pesi rike! I navai o mahita ngalatudu na malala? 11 E huriki a Israel ri rata a naro hale pali, ri longotaro a ngava dagi nau a ratea ne ria. Muga a hatekakari ria, nahea ri gi bole a maka maki o Ieriko. Pali ri longotaro a nitagu. Ri panaho pali a maki a taki ta ri gi ratapile. Ri tatami, ri ruhulolo turana a maka maki ne ria. 12 I mavonga e huriki a Israel i uka ma ri gi gao ri gi vaubi ne huriki a pile. Ri ha ne huriki a pile, a vuhuna ria kunana ri vakabele a vuranga ne ria. Ri panaho pali a maki a taki nahea ri gi bole. Mua i uka ma mu gu ratapile a maki nga, iau i uka ma ga made tabu turane mua.

13 “O pesi rike, o vano o kisi e huriki ri gi matapado, ri gi valai na matagu kuduvi, a vuhuna iau e BAKOVI DAGI a tahoka a ngava ne mua. E huriki a Israel ri panaho a maka maki ni tabari iau vona, a ngaru ri gi vuroki. Ge uka, e huriki a pile bara ri rangi mua na vabinga. 14 Na hatelanga kuduvi mu bele palupu. Iau ga pasitalea tara kabu, a maka kabu kiroko vona ri gi pagitala, ri gi pesi muri vona. Muri ga pasitalea tara kabu kiroko, a maka kabu kiroko liu vona ri gi pagitala, ri gi pesi muri vona. Muri ga pasitalea tara kabu kiroko liu, e huriki a bakovi vona ri gi pagitala ri gi pesi muri vona. 15 Muri ga vakasiria e rei a bakovi i panaho a maki ni tabari iau vona. Muri mu gutua na kanono turana a kabu vona, a maka maki vona lobo. Ra bakovi iea i rata a naro hale, i vakamaruhu e huriki a Israel. I longotaroa a ngava dagi iau e BAKOVI DAGI a rata turane ria.”

16 E Iosua i hadongo na hatelanga poko­poko i gale palupu a kabu takutaku ne Israel. I vakasiri a kabu ne Iuda i tahoka a maregoa. 17 Muri i vulaki talea na kabu ne Iuda a kabu ne Sera. Muri i vulaki tala tabua na kabu ne Sera a kabu ne Sapdi. 18 Muri e Iosua i vakapesi na tete e huriki a bakovi na kabu e Sapdi i gale talea e Akan. E Akan e tune Karmi, e tubune Sapdi, a hamone Sera, a kabu ne Iuda.

19 E Iosua i takia e Akan i ta maea, “O tugu, ngane o pesi na matane BAKOVI DAGI a Vure ne hita e huriki a Israel, o kavurikea. O vakalongo kavakava na maka maki o bole. Naha ni ruhuloloa nau tara maki.”

20 E Akan i koli i ta maea, “Muholi a rata a naro hale ne BAKOVI DAGI a Vure ne Israel. Ngane ga taki ioe vona a maki a ratea. 21 Na tahuna si vaubi si bole a maka maki o Ieriko, a matai a varakia kamumu o Babel, a tabekena silva a nimavana i 4 kilo, a tabekena gol a nimavana i 1 kilo. A ngaru hateka a maki nga a bole. A bole dili na kape nau a tanu na malala, a silva i tabuli polotano liu.”

22 Lakea e Iosua i rudu ranga bakovi ri nunu lakea na kape, ri matai a maka maki ri tabuli manga a hini i taki e Akan. A silva i tabuli polotano liu. 23 Ri bole a maka maki nga, ri valai ne Iosua ne huriki a Israel lobo. Ri ru na malala na matane BAKOVI DAGI.

24 E Iosua turana e huriki a Israel ri bolea e Akan turana a maka silva, a varakia, a tabekena gol, e huriki e tuna bakovi e tuna ngatavine, a maka bulmakau, a donki, a sipsip, a maka maki lobo vona, ri bole lakea na maloku ne Akor. 25 Lakea e Iosua i takia, “Ge a ra o habi a maregoa dagi ne mia? Ngane ioe tara, e BAKOVI DAGI ge habi a maregoa dagi vomu.”

Muri e huriki a Israel ri bole a maka kedo ri padimatea e Akan turana a kabu vona. Ri rungani turana a maka maki lobo ne ria. 26 Ri bole a maka kedo ri ru langa na podane Akan. Ra maka kedo nga ri tababana. Lakea e BAKOVI DAGI i lobo a nihatemadihi vona. I maea ni gale liu a hini nga, “A Maloku ne Akor.”† A pelegona e Akor e ‘maregoa’.