1 E BAKOVI DAGI i takia e Moses, “O vano o masia e Parao. Iau a ratea i gigitora, e huriki a bolekori vona ri gigitora, ga rata a maka nivakasiri na kurukurune ria. 2 Muri ma bara o tuverei polo ne huriki e tumu, e tubumu, a maka nivakasiri a rata virihi e huriki a Egipto vona. Lakea mua lobo bara mu lohoka vona, iau kunana e BAKOVI DAGI.”

3 Lakea e Moses e Aron ru lakea ne Parao ru takia, “E BAKOVI DAGI a Vure ne mia e huriki a Hibru i ta maea, ‘I balaka riva go longotaro a ngavagu, go marikoi ni longo mai iau? O taki e huriki a viri nau, ri gi vano ri gi kavurike iau. 4 Ioe go marikoi ne ria ri gi vano, kuduvi ga rudu a maka koa ri gi valai ri gi vonu vona a robo vomu. 5 Bara ri bebe lae vona a robo vomu, ri kavitagua a malala. A maki ni kani, a kai i uka ma i ratapile a vala-kedo, a maka koa bara ri ratapile ria ri vakalobo liu. 6 Bara ri vonu na ruma-hariki vomu, ri vonu na ruma ne huriki a bolekori a viri lobo vomu o Egipto. Hosi na tahuna ne huriki a gare ne mua, i valai i harena mona, a maka koa maea i uka ma ni matai.’ ” Muri e Moses i ngalakapulo, i pea e Parao i pagitala.

7 E huriki a bolekori ri takia e Parao, “I balaka riva a hini go longotaro a bakovi nga? Ngane ru habi a maregoa ne hita. O longo ne ria ri gi vano ri gi kavurikea e BAKOVI DAGI, a Vure ne ria. Ra ioe, i uka ma o masia e Egipto i hale liu pali?”

8 Muri e Moses e Aron ni tuli hamule ne Parao, i taki rua, “Mu vano mu vasileki ne BAKOVI DAGI, a Vure ne mua. Pali mu taki iau ngane, e rei ge vano?”

9 Lakea e Moses i koli, i ta maea, “Mia lobo mi gi vano turane huriki a gare, a bakovi, a ngatavine, e tune mia, a maka bulmakau, a sipsip, a meme, a vuhuna bara mi rata a nivasileki dagi ne BAKOVI DAGI.”

10 Lakea e Parao i ta maea, “I uka liu! A marikoi vona e huriki a ngatavine, a koma ri gi laho turane mua. I padi iau a mana pali, bara mu rata a naro hale ne mia. 11 Iau a marikoi! E huriki a bakovi kunana ri gi vano ri gi vasileki ne BAKOVI DAGI.” E Parao i ta lobo, muri e huriki a bolekori vona ri tono tala e Moses e Aron.

12 Muri e BAKOVI DAGI i takia e Moses, “O toto tala a limamu, o toto langa na robo e Egipto ge valai a maka koa, ri gi kani a maki ri tababana.” 13 Lakea e Moses i toto tala a kodo vona, lakea e BAKOVI DAGI i ratea a vilu i ngalu valai na nirikena haro na parava i taku, a rodo i taku. Na hatelanga a maka koa ri bele. 14  * Kap 9:2-3Ri valai ri toka na tabeke lobo ne Egipto, ri ratapile a maki. Ra maka koa ri kupo hateka. E huriki a Egipto i uka ma ri matai hosi a maka koa ge kupo hateka maea, muri i uka ma ri gi matai tabu. 15 Ri kavitagua a malala i katoki. Ri kani a maka varili, a pagana kai, a kanena kai i ratapile kaleva a vala-kedo. I uka liu tara maki ge goma ni gi matai tabu na robo e Egipto.

16 E Parao i malaviriri kunana i talo rike a ngava ne Moses e Aron ru gu valai vona. Lakea i taki rua i ta maea, “Iau a rata a naro hale ne BAKOVI DAGI, a Vure ne mua. A rata a naro hale ne mua. 17 A ngaru marua muru gu puga vuroki tabua a naro hale nau. Muru vasileki ne BAKOVI DAGI ne mua, muru takia ge rata vurokia a maki na matenga ri ratapile a robo nau.”

18 Ru pea e Parao, muri e Moses i vano i vasileki ne BAKOVI DAGI. 19 Lakea e BAKOVI DAGI i puloa a vilu dagi i rudua i pori valai na nirolona haro. I kave lakea na Dari Vururu a maka koa, i uka ma ni matai tabu o Egipto. 20 Pali e BAKOVI DAGI i ratea e Parao i gigitora, i uka ma i longo ne huriki a Israel ri gi vano.

21 Muri e BAKOVI DAGI i takia e Moses, “O toto rike na hunu a limamu, ge bele a uvo ge kavitagua e Egipto. Ra uvo iea ni hataki.” 22  * Sng 105:28; Kap 16:10Lakea e Moses i toto rikea na hunu a limana, i bele a uvo vatubi, i kavitagua e Egipto na parava i tolu. 23 E huriki a Egipto ri keri ni matai mule ria, ri made kunana na ruma. Pali a tabeke i made vona e huriki a Israel i uka ma i bele vona a uvo vatubi.

24 Muri e Parao i galea e Moses i takia, “Mu vano ngane mu vasileki ne BAKOVI DAGI ne mua. E huriki a ngatavine a koma, ria ranga, ri gi vano turane mua. Pali a maka bulmakau, a sipsip, a meme ge tabuli.”

25 Pali e Moses i koli, i ta maea, “I uka ma ge mavonga. A maki ngi ranga mi gi bole, bara mi habi ne BAKOVI DAGI, a Vure ne mia. 26 Mi gi bole lobo a maka sipsip a meme, bara mi vulaki ranga ge a nihabi ne BAKOVI DAGI a Vure. Pali mi gi vano taro, mi gi bele na murina nivasileki, mi gi pelekado a sipsip a bulmakau ge a nihabi ne BAKOVI DAGI.”

27 Pali e BAKOVI DAGI i ratea e Parao i gigitora, i uka ma i longo ne ria ri gi vano. 28 Lakea e Parao i takia e Moses, “Muru hataroa a tanga iea! Naha ni hamule valai! Marua muru pesi na matagu tabu, bara muru mate!”

29 E Moses i koli, i ta maea, “I manga a hini o taki, i uka ma miri gi valai tabu miri gi matai ioe.”