A Raukea e Paulus i Here Lakea ne
Titus
A Nita Vakalohoka
E Paulus a apostolo i herea a raukea iea lakea ne Titus. I here palupu turana raukea i here mugea lakea ne Timoti.
I here na pida e 30 o e 35 muri ne Isu i mate.
Muga ne Paulus i herea ra raukea iea lakea ne Titus, e Paulus rua e Titus ru made palupu na bodu e Krit.
Ra raukea i here mugea lakea ne Timoti ru palupu. A maki i uka ma i palupu ra nitubu, a nilobona raukea. A raukea nga, turana ruana raukea i here muria e Paulus lakea ne Timoti, to ta na leho ni matakari e huriki a tara ne Kristo. Ra i maea ni gale ra raukea nga, “A Raukea ni Tuhori a Tara ne Kristo.”
Na parava e Paulus i pea e Krit, i takia e Titus ge made, ge matakari e huriki ri luhoi tora karaba. I taki tabua ge vulaki e huriki a matakari na tara ne Kristo na maka tanga lobo. Na nitubuna raukea, e Paulus i vakalohoka e Titus vona ra hini nga (1:5). Muri i takia e Titus ge pugaia o Nikopolis iea o Gris. E Paulus i takia e Titus ta a bakovi nga ala rua, e Atemas, e Tasisus, tara ne rua ge bole a murina na tahuna i pea e Krit.
1
E Paulus i Vakatubu ni Here
1-4 * Rom 1:7; 2Ko 8:23; Gal 2:3Iau, e Paulus, a herea a raukea iea i lakene vomu, o Titus. Iau a vora na Vure, a apostolo ne Isu Kristo. I rudu iau ga vakatora a niluhoi ne huriki a bakovi a ngatavine a Vure i vulaki ria. A tuveve ne ria a nita muholi, ri gi laho na narona Vure. Lakea bara ri pasimata ni bole a nimahuri vakaroro. Ra nimahuri vakaroro iea, a Vure i ta muholi vona hosi si gi bolea. A Vure i uka ma ia a viri ni tatami. A Vure, ra viri i korimule hita, i puka talea a nita muholi iea na parava i vulakia. Muri i ru na limagu, i vakuku iau ga vakalongo ne huriki. Titus, o manga e tugu muholi, a vuhuna o luhoi torea e Isu i manga iau a luhoi torea. A Vure, e Tamane hita, turane Isu Kristo, a bakovi i korimule hita, ru gu rata kamumu ioe, ru gu habi a nivalemu vomu.
A Matakari na Lotu
5 Iau a taparaki ioe iene na bodu e Krit, a vuhuna a ngaru ioe go vakalobo ranga leho i uka ma a rata ma. A ngaru go vulaki e huriki a bakovi ri gi matakari a lotu na tanga takutaku. I manga a hini a taki ioe vona hosi, 6 * 1Tim 3:2-7; 2Tim 2:24-26a matakari na lotu ge muri mai kunana a naro kamumu, bara ni keri ni padi virihia na naro hale. Ri gi tahoka e girihine ria i taku kunana. E tune ria ri gi luhoi torea e Kristo, ri gi ramai a naro kamumu, nahea ni gi padi virihi ria ni longotaro a ngava, ni laho viliha na ningaru hale na kakaine ria. 7 O bole kunana e huriki a bakovi kamumu, a vuhuna o lohoka vona, a matakari na lotu i matakari e huriki a tara na Vure. Ge muri mai kunana a naro kamumu, bara ni keri ni padi virihia na naro hale. Nahea ge tagege. Nahea ge hinihate. Nahea ge ia a bakovi ni ninu. Nahea ge ia a bakovi ni vaubi. Nahea ge ngaru hateka a mahala. 8 Ge matakari kamumu e huriki a mosi vona. Ge ngaru kunana a naro kamumu. Nahea ge rata tavula a maki. Ge ramai a niluhoi kamumu. Ge malamala, ge kiripiripi na matana Vure. Ge matakari kamumu a ningaru hale na kakaina. 9 Ge loho tata tora vona a vinara muholi, ra mete tovo e huriki vona. I mavonga, bara i kara ni vakatora a niluhoi ne huriki na ngava muholi. Bara i kara ni vakasiri ria, i varoru navai a niluhoi ne ria, re huriki ri tovo a ngava i vaperesi na ngava muholi.
10 * 1Tim 4:7O vulaki e huriki a bakovi kamumu, a vuhuna i kupo e huriki iene ri longotaro a ngava. Ri ta tavulavula, ri tami lae e huriki. I kupo hateka ne ria a Iuda, ri ta tora hateka ni pala a kulina viri. 11 * 2Tim 3:5-6; 1Pe 5:2O ta pupukari ria nahea ri gi ta, a vuhuna a ngava taminga ne ria i ratapile pali a niluhoi ne huriki a kabu ranga. Ri ngaru ni bole kunana a moni ne huriki. 12 Hosi a propet tara ne huriki a Krit i ta maea, “E huriki a Krit a bakovi na taminga. Ria a bakovi hale hateka ri manga a livoa. Ri rakoli kunana. A maki ri paki vona ni kani.” 13 * 2Tim 4:2A ngava iea i muholi, lakea a ngaru go tahate ria, ri gi pesi tora ni luhoi torea a Vure. 14 * 1Tim 4:7Nahea ri gi longo mai a nuverei tavula ne huriki a Iuda. Nahea ri gi longototo e huriki ri marikoi na ngava muholi.
15 A maki lobo i kamumu na matane huriki a bakovi kiripiripi. Pali e huriki a bakovi hale, i uka ma ri luhoi e Kristo, a maki lobo i hale na matane ria. A niluhoi ne ria i hale, i uka ma ri lohoka vona a ra maki i kamumu, a ra maki i hale. 16 * 1Ion 1:6; 2:4Re huriki nga ri taki ta ri lohoka na Vure. Pali a narone ria i vakasiri hita, i uka ma ri lohoka na Vure. I uka ma ri longototoa a Vure, i uka ma i kara ria ri gi ratea tara maki kamumu. Re huriki nga, a huluvonga.