1 E Adoni-Sedek, a hariki o Ierusalem, i longo a velengane Iosua i bolea a tanga e Ai, i rabalaki lobo e huriki a tahotanga turana a hariki ne ria, i manga a naro ri rata virihi a tanga e Ieriko turana a hariki vona. I longo e huriki a Gibeon ri rata a ngava dagi, ri made kamumu turane huriki a Israel. 2 E huriki a bakovi a ngatavine o Ierusalem ri mangenge hateka, a vuhuna a tanga e Gibeon i manga kunana a maka tanga ri tahoka a hariki. E Gibeon i dagi hateka, i rangia a tanga e Ai. E huriki a bakovi ri gao hateka na vabinga. E huriki a Ierusalem ri mangenge hateka ne ria. 3 Lakea e Adoni-Sedek i talo rike a ngava ne Hoham a hariki na tanga e Hebron, ne Piram a hariki na tanga e Iarmut, ne Iapia a hariki na tanga e Lakis, ne Debir a hariki na tanga e Eklon. 4 I taki e huriki a hariki nga i ta maea, “Mu valai mu tuhori mia, si gi vaubi turane huriki a Gibeon, a vuhuna ri rata a nivalemu ne Iosua turane huriki a Israel.” 5 Ra hariki ala lima nga, a hariki o Ierusalem, o Hebron, o Iarmut, o Lakis, o Eklon, ria a kabu ne Amor. Ri vadili palupu a tara na vabinga, ri vano ri pesi haluia a tanga e Gibeon, ri vaubi ne ria.

6 E huriki a bakovi o Gibeon ri talo rike a ngava lakea ne Iosua na mada o Gilgal, ri ta maea, “E huriki a hariki ne Amor na maka tanga na lolo, ri vadili vapopo ri valai pali ri gi vaubi turane mia. O valai malaviriri o tuhori mia, naha ni lohopile mia.”

7 E Iosua i longoa a ngava iea, i pesi rike turana a tara na vabinga vona, turana e huriki a bakovi hateka na maheto vona. Ri pe e Gilgal ri vano ri gi tuhori e huriki a Gibeon.

8 E BAKOVI DAGI i taki e Iosua i ta maea, “Naha ni mangenge vona e huriki nga. A habi ria pali na limamu. I uka tara viri ge rangi mua.” 9 E Iosua turane huriki a tara na nugumaheto vona ri laho na rodo, ri vano ri bele o Amor. E huriki a Amor ri turutu ne ria, lakea e huriki a Israel ri vakatubu a vabinga. 10 Na tahuna e huriki a Amor ri matai e huriki a tara na nugumaheto ne Israel ri valai, e BAKOVI DAGI i rata ria ri mangenge, i vakaviliha a niluhoi ne ria. Lakea e huriki a Israel ri ratapile e huriki a Amor iea o Gibeon, ri valili puru ne ria na dala tabukoi na tanga e Bet-Horon. Ri ratapile e huriki a Amor i puru lakea, i harena na tanga e Aseka e Makeda. 11 Na tahuna e huriki a Amor ri ha ramaia a dala na lolo i raga o Bet-Horon, e BAKOVI DAGI i vakaboru a vala-kedo, i padimate e huriki a Amor, i vano i harena o Aseka. E huriki ri mate na vala-kedo i kupo hateka na viri e huriki a Israel ri rabalaki na bainat.

12 Na parava iea e BAKOVI DAGI i tuhori e huriki a Israel ri ratapile e huriki a Amor. E Iosua i vasileki ne BAKOVI DAGI na matane huriki a Israel i ta maea,

A haro i uka ma i rolo malaviriri. I tabuli mavonga na hunu i manga a parava i taku. A nuverei na maki iea ni here na puhu ne Iasar.* E huriki ranga ri luhoia ta nuverei iea i tabuli na puhu na linge hosi. 14 I paru hosi i valai i harena mona i uka tara parava ge manga a parava iea. Ra maki iea i bele, a vuhuna e BAKOVI DAGI i longototoa a bakovi i ala taku, i tuhori e huriki a Israel na vabinga.

15 Muri e Iosua turane huriki a tara na nugumaheto vona ri hamule lakea na mada ne ria o Gilgal.

16 Pali re huriki a hariki nga ala lima ri ha, ri kapiloho na babe tara tabukoi na tanga e Makeda. 17 I ranga e huriki a bakovi ri matai ria ri vakalongo e Iosua na hini ri kapiloho vona. 18 Lakea e Iosua i taki e huriki a tara na nugumaheto vona i ta maea, “Mu kule a maka kedo dagi nga, mu tukaria a matana babe, mu ru ranga tagari ri gi matakaria. 19 Pali naha ni made tavula vona a hini nga. Mu ramai e huriki a pile mu vaubi turane ria. Naha ni matataro ria ri gi vano ri gi bele na tanga ne ria, a vuhuna e BAKOVI DAGI a Vure ne hita i taki pali bara si rangi ria.”

20 E Iosua turane huriki a Israel ri valili ne ria, ri rabalaki e huriki ala kupo. Pali i ranga ri ha, ri kapiloho na tanga ne ria. 21 Muri e huriki a tara na nugumaheto ri hamule lakea ne Iosua na mada e Makeda. I uka tara ne ria ge bole a vuranga. Muri e huriki a tahotanga o Kenan i uka ma ri ta hale tabu ne huriki a Israel.

22 Muri e Iosua i ta maea, “Mu talea a matana babe, mu tuli valai nau ra hariki nga ala lima.” 23 Ri vano ri tuli valai ra hariki o Ierusalem, o Hebron, o Iarmut, o Lakis, o Eklon. 24 Na tahuna e huriki ri bole lakea ne Iosua a hariki nga, e Iosua i gale palupu e huriki a Israel, i taki e huriki a ubu na tara i ta maea, “Mu valai mu pahatata a lohona a hariki nga.” Lakea ri pagitala valai, ri pahatata a lohone ria.

25 Lakea e Iosua i taki e huriki a Israel i ta maea, “Naha ni mangenge, naha ni loho paepae. Mu pesi tora, a vuhuna e BAKOVI DAGI bara i rata maea kunana e huriki a pile ne mua.” 26 Muri e Iosua i rabalaki e huriki a hariki nga, i vakatavore ria na kai i lima. Ri tavore mavonga i harena na haro i rolo.

27 Na malunga liu, e Iosua i taki e huriki a bakovi ri bole a podane ria, ri voro dili na babe ri kapiloho vona muga. Ri bole a maka kedo dagi ri kavitagua a matana babe. Ra maka kedo nga ri tababana vonga.

28 Na parava iea kunana e Iosua i bolea a tanga e Makeda, i nugutatea a hariki vona. I rabalaki lobo e huriki a tahotanga, i uka tara viri ge mahuri. A naro i rata virihi a hariki o Ieriko vona, i rata virihi tabua na hariki o Makeda.

29 Muri ne ria ri bolea a tanga e Makeda, e Iosua turana e huriki a Israel, ri pe a hini ngi ri lakea na tanga e Lipna, ri vakatubu a vabinga vonga. 30 E BAKOVI DAGI i tuhori ria, ri mulangi na vabinga ri bolea a tanga, ri tangotatea a hariki vona. Lakea e Iosua i rabalaki lobo e huriki a tahotanga, i uka tara viri ge mahuri. I ratea na hariki iea a naro i rata virihi a hariki o Ieriko vona.

31 Muri e Iosua turane huriki a Israel ri pea e Lipna, ri lakea o Lakis. Lakea i pesi haluia, i ratea vonga a vabinga. 32 E BAKOVI DAGI i tuhori ria, lakea na parava muri ri mulangi na vabinga, ri bolea e Lakis. E Iosua i uka ma i matataroa tara viri ge mahuri. I rabalaki lobo e huriki a tahotanga, i manga a naro i rata virihi e huriki a Lipna. 33 Muri e Horam a hariki na tanga e Geser, i valai ge kori e huriki a Lakis. Pali e Iosua i rangi tabua na vabinga turane huriki a tara vona. E Iosua i uka ma i matataroa tara viri ge mahuri. I rabalaki lobo e huriki.

34 Muri e Iosua turane huriki a Israel ri pe e Lakis, ri lakea o Eklon. Ri pesi haluia a tanga iea, ri vaubi ne huriki a Eklon. 35 Ri bolea na parava iea kunana a tanga e Eklon. E Iosua i rabalaki lobo e huriki a tahona i manga a hini i rata o Lakis.

36 Muri e Iosua turane huriki a Israel ri pea e Eklon ri lakea o Hebron, ri vaubi ne huriki a Hebron. 37 Ri bolea a tanga iea, ri rabalakia a hariki vona, turana e huriki a tahotanga, e huriki na maka tanga ri pesi tabukoi vonga. E Iosua i ratapile hatekea e Hebron i manga a hini i rata virihi e Eklon, i uka tara viri ge mahuri.

38 Muri e Iosua turana e huriki a Israel, ri lakea na tanga e Debir ri vaubi ne huriki a Debir. 39 Ri bolea a tanga iea turana a hariki vona, a maka tanga ri pesi tabukoi vona. Ri tangotatea a hariki, ri rabalaki lobo e huriki a tahotanga. E Iosua i ratea ne Debir, turana a hariki vona, a naro i rata virihi e Hebron, e Lipna turana a hariki ne rua.

40 E Iosua i bole a maka tanga na tabeke lobo, na tabeke mule puru ne Negev, na maka kupona na nirolona haro, na bilane Iordan. I uka ma i matataroa tara viri ge mahuri, i rabalaki lobo ria, turana e huriki a hariki ne ria. I rata manga a hini e BAKOVI DAGI a Vure ne Israel i takia vona. 41 E Iosua i bole lobo a maka robo, i tubu o Kades-Barnea na tabeke mule puru i lakea na tanga e Gasa tabukoi na lavu, i tubu na tabeke na malala ne Gosen i lakea na tanga e Gibeon na tabeke mule sike. 42 Na tahuna iea kunana, e BAKOVI DAGI a Vure ne huriki a Israel, i tuhoria e Iosua na vabinga, i rangi lobo e huriki a hariki nga, i bole a maka malala ne ria.

43 Muri e Iosua turane huriki a Israel, ri hamule na mada ne ria o Gilgal.