1 Aubarikadeen Dii ma gbɛ̀si ũ,

è zĩ̀kana dadamɛ,

è ma ↄↄ tòto kɛ zĩ̀kana yãnzi.

2 Àmbe ma utɛkii ũ, è gbɛ̃kɛɛ kɛmɛ,

à dɛ ma zɛki gbãaa ũ, è ma mì sí.

À dɛ ma sɛngbango ũ kɛ̀ mɛɛ̀ nazi,

è tó boriinↄ mì siɛmɛ.

3 Dii, bↄ́n gbɛ̃ntee ũ

kɛ̀ à yã ègↄ̃ dↄnguu?

Bↄ́n à ũ kɛ̀ nɛɛ̀ làakari dↄa?

4 Gbɛ̃ntee dɛ lán kàsa kpíi bàmɛ,

à wɛ̃̀ndi è gɛ̃tɛ lán ↄra bà.

5 Dii, ǹ musu naɛ ǹ pita,

ǹ ↄ kɛ kpiiinↄa lɛ aↄ̃ tɛ́sukpɛ bↄ.

6 Ǹ tó lou pí ǹ gbɛ̃nↄ fãakↄ̃a,

ǹ kà fã ń tɛ́ aↄ̃ lɛkↄ̃a.

7 Ǹ ↄ bↄ zaa musu ǹ ma kũ,

ǹ ma bↄ í bíta guu,

ǹ ma sí bori zĩ̀tↄnↄa.

8 Ɛgɛtona ń lɛ́ pà,

aↄ̃è ↄ pãɛ kↄ̃n lùsɛna pãao.

9 Luda, mɛ́ lɛ̀ dufu sínnɛ,

mɛ́ n táaki lɛ́ kↄ̃n mↄrↄ bà mɛ̀n kurideeo,

10 mmↄn kɛ̀ nɛɛ̀ tó kínanↄ zĩ̀ ble,

nɛɛ̀ n zↄ̀bleri Dauda bↄ fɛ̃ɛda pãsĩ lɛ́zĩ.

11 Ǹ ma sí ǹ ma bↄ bori zĩ̀tↄnↄ ↄzĩ,

ɛgɛtona ń lɛ́ pà,

aↄ̃è ↄ pãɛ kↄ̃n lùsɛna pãao.

12 Wa nɛ́gↄ̃gbɛ̃nↄ é fɛɛ ń gↄ̃kparɛkɛgurↄ

lán lí kɛ̀ nnaa mà bà,

wa nɛ́nↄgbɛ̃nↄ gↄ̃ dɛ

lán kíbɛ wesagba kɛ̀ wà zãa blèa bà.

13 Wa dↄ̃̀nↄ é pa kↄ̃n pↄ́ bori sãnda píngio.

Wa sãanↄ é kↄ̃ lɛo wàa do,

aↄ̃é ká bↄrↄ ũgbangba wa kpàsan.

14 Wa zùnↄ égↄ̃ dɛ nɛ́dandeenↄ ũ,

nↄ̀bↄɛna égↄ̃ kuuro,

lagona égↄ̃ kuuro,

wɛ̃nda'ↄ́ↄdↄna égↄ̃ kú gãalɛro.

15 Aubarikadeenↄn gbɛ̃ kɛ̀ aↄ̃ kuuna dɛ lɛɛnↄ ũ,

aubarikadeenↄn gbɛ̃ kɛ̀ Dii dɛ ń Luda ũunↄ ũ.