1 Luda, ǹ dada kínanɛ à yãkpaɛ kɛ kↄ̃n yãpuraao,

ǹ tó kínɛ yã maaa kɛ lán nɛɛ̀ kɛ nà,

2 lɛ à dↄ n gbɛ̃nↄnɛ aɛ a zɛ́a,

à yã gↄ̃gↄ̃ talakanↄnɛ súusu,

3 kpiiinↄ é gbasa wà mↄ́ gbɛ̃nↄnɛ kↄ̃n aafiao,

sĩ̀sĩnↄ é tó aↄ̃gↄ̃ kú nnamana guu.

4 Kína é tó yã bↄ kↄ̃n talakanↄo nna,

eé takaaside nɛ́nↄ mì sí,

eé gbãamↄnnɛrinↄ dúgu zↄ̃.

5 Eégↄ̃ kuu lán ↄfãntɛ̃ ègↄ̃ kuu nà,

lán mↄvura ègↄ̃ kuu nà wɛ̃̀ kↄ̃n wɛ̃̀o.

6 Eégↄ̃ dɛ lán loumana buraa bà,

lán mↄdↄ kɛ̀ è kpá tↄↄtɛa bà.

7 Gbɛ̃ maaanↄ é ↄ tá a gurↄↄa,

nnamana égↄ̃ bíta ai mↄↄ tóngↄ̃ kuu dↄro.

8 Eé kí ble zaa ísia baa kɛ̀ kpa kↄ̃n baa kãa kpaao,

sɛna zaa Yuflatia ai gana anduna lɛ́a.

9 Borii kɛ̀ aↄ̃ↄ kú gbáa guunↄ é mↄ́ wà kúɛnɛ,

à ibɛɛnↄ é daɛ ń puua à aɛ.

10 Taasisi kína kↄ̃n ísia baa kínanↄ é tángba kpáa,

Seba kↄ̃n Sɛba kínanↄ é mↄ́ wà gba danɛ.

11 Kínanↄ é mↄ́ wà kúɛ à aɛ ń píngi,

bori píngi é zↄ̀ blenɛ.

12 Zaakɛ eé wɛ̃ndadee kɛ̀ aↄ̃ wiii dↄↄnↄ bↄmɛ,

eé takaasidee kɛ̀ aↄ̃ↄ dↄnlɛri vĩroonↄ mì sí.

13 Eé gbãasaideenↄ wɛ̃nda gwa,

eé takaasideenↄ bↄ gaa lɛ́zĩ.

14 Eé ń bↄ gbãamↄnnɛrinↄ ↄzĩ kↄ̃n gbɛ̃ pãsĩnↄo,

zaakɛ à ye ń arukwɛɛnaziro.

15 Luda kína dↄ̃ kↄ̃n aafiao!

Wàgↄ̃ à gbaa Seba bùsu vura,

wàgↄ̃ adua kɛɛnɛ yãana sai,

wàgↄ̃ sa maaa oonɛ gurↄ píngi.

16 Ǹ tó burapↄnↄ kɛ à bùsun maamaa,

à lánↄ gↄ̃ da sĩ̀sĩnↄ musu sí plɛ̀plɛ,

aↄ̃ nɛ́ i wà pia lán Lɛbanↄ lákpɛ bà,

aↄ̃ gbã lán kàbapu bà sɛ̃̀tɛ.

17 Ǹ tó à tↄ́ gↄ̃ kuu gurↄ píngi

lán ↄfãntɛ̃ bà,

bori píngi é aubarika e à gãzĩ,

wé à tↄ́ nnaa sí.

18 Aubarikadeen Dii Luda, Isarailinↄ Luda!

Àmbe è yãbↄnsaɛnↄ kɛ ado.

19 Wàgↄ̃ à tↄ́ gakuidee bↄↄ gurↄ píngi!

À tó à gakui da andunala píngi!

Aami! Aami!