Luda yã takada kↄ̃n Bokobaru yão LAASUUDEE 1

LAASUUDEE

Yã píngi pãmɛ

1 Laasuude Dauda nɛ́, Yerusalɛmu kína yãn yɛ̀.

2 Ma laasuude ma bè:

Yã pã búgubugu,

yã pã búgubugu,

à píngi pãmɛ.

3 Bↄ́ àren gbɛ̃ntee è e anduna guu

nawɛ̃a kɛ̀ èe kɛɛ a zĩ píngi guua?

4 Kpàɛnↄ è gɛ̃tɛ, wurenↄ è su,

mↄde anduna ègↄ̃ kuu gurↄ píngimɛ.

5 Ɔfãntɛ̃ è bↄ, è gɛ̃,

è wã à ɛara à gá guu kɛ̀ è bↄn.

6 Ĩa è káka sↄↄmɛtɛ kpa,

è liara à su gu'igbãroo kpa,

ègↄ̃ ligaligaa àgↄ̃ gaa àgↄ̃ suu.

7 Swa píngi í ègↄ̃ kaa ísiaa guumɛ,

mↄde ísiaa è paro,

í pìnↄ è ɛara wà su swaa pìnↄ mìamɛ.

8 Pↄ́ píngi è ń kpasa,

kpasa pì yã gɛ̃̀ onala.

Gugwana è mↄ wɛ́ɛaro,

yãmana è swã paro.

9 Yã kɛ̀ kuu yãa bé eé ɛara àgↄ̃ kuu dↄ,

yã kɛ̀ wà kɛ̀ yãan weé ɛara wà kɛ dↄ.

À dufu kee kú anduna guuro.

10 Pↄ́kee kuu kɛ weé be:

Ǹ pↄ́ dufu ke gwaↄ́?

Auo! À gĩakɛ à kuu wa ã zaa zi kↄ̀.

11 Gbɛ̃ káakunↄ yã ègↄ̃ dↄ gbɛ̃ken dↄro.

Baa gbɛ̃ kɛ̀ aↄ̃égↄ̃ kuu ziaanↄ,

aↄ̃ yã é dↄ gbɛ̃ken ziakpɛɛ zĩro.

12 Ma laasuude ma kí blè Isarailinↄa Yerusalɛmu. 13 Ma mɛ̀ kpà yã kɛ̀ wèe kɛɛ anduna guu píngi tàasikɛnaa, má gwàgwa ↄ̃ndↄ̃'ↄ̃ndↄ̃ má è Luda zĩ pãsĩ dà gbɛ̃nteenↄnɛ aↄ̃ kɛ. 14 Ma yã kɛ̀ wèe kɛɛ anduna guu è píngi, à píngi nɛ́ pãmɛ, pɛna gukoriamɛ.

15 Pↄ́ kotina porona vĩro,

wè e wà pↄ́ kɛ̀ kuuroo naroro.

16 Ben má ò ma nↄ̀sɛ guu ma bè: Ǹ gwa! Ma ↄ̃ndↄ̃ↄ bíta dɛ gbɛ̃ kɛ̀ aↄ̃ kpata blè Yerusalɛmu ma ãanↄla ń píngi, ma ↄ̃ndↄ̃ kↄ̃n ma dↄ̃nao wɛ́ɛ bↄ̀ maamaa. 17 Ben ma mɛ̀ kpà ↄ̃ndↄ̃ asii dↄ̃naa lɛ mà yↄ̃nkↄkɛ kↄ̃n mìsaiyão asii dↄ̃, ben má è beee nɛ́ pɛna gukoriamɛ dↄ.

18 Ɔ̃ndↄ̃ bíta è mↄ́ kↄ̃n nↄ̀sɛyakana bítaomɛ,

wè yã'ↄ̃amma e ń dↄ̃na lɛ́mmɛ.