1 Sulemanu lɛdolɛ kɛ̀ kↄ̃n Igipiti kí Fili'aunao, à à nɛ́nↄgbɛ̃ sɛ̀ nↄↄ ũ à sùo Dauda wɛ́tɛn àton a bɛ kↄ̃n Dii uao kↄ̃n Yerusalɛmu bĩio bo à mì dɛ. 2 Gurↄ beeea wèe kpɛ́ bo Diinɛ kↄ̀ro, ben wègↄ̃ saa oo kpiii musu tãagbãgbãkiinↄa. 3 Sulemanu ye Diizi, à a de Dauda yãdiɛnanↄ kũna, mↄde è saa o gbãgbãkii pìnↄa, ben ègↄ̃ tuaetiti kpata gwe.

4 Ben à gàa saa o zaa Gibiↄ̃, zaakɛ gbãgbãkii pì bé à dɛ à kpaaanↄla. À sa'opↄ kɛ̀ wè ká tɛ́n à tɛ́ kũ ò gwe mɛ̀n wàa sↄↄro. 5 Gwen Dii bↄ̀ à mↄ̀zi nanaa guu gwãavĩ à bè: Ǹ pↄ́ kɛ̀ ń yezi wɛ́ɛ kɛma. 6 Ben Sulemanu bè: N gbɛ̃kɛɛ kɛ̀ n zↄ̀bleri ma de Daudanɛ maamaa, kɛ̀ à dɛnnɛ gbɛ̃ maa náanɛde nↄ̀sɛpuradee ũ yãnzi. N gbɛ̃kɛ bíta kɛ̀nɛ, ń tò mamↄma à nɛ́ e kí blee à gɛ̃ɛ ũ gbã̀a kɛ̀a. 7 Tia sa Dii ma Luda, n mamↄma n zↄ̀bleri kà kí ũ ma de Dauda gbɛ̀n. Nɛ́ féten ma ũ, má yãke gbá dↄ̃ro. 8 Mamↄma n zↄ̀bleri, má kú n gbɛ̃ kɛ̀ ń sɛ̀nↄ tɛ́. Aↄ̃ↄ pari, weé fↄ̃ wà ń naro wà ń lɛ́ dↄ̃ro. 9 Ǹ mamↄma n zↄ̀bleri gba ↄ̃ndↄ̃ↄ, lɛ màgae yã gↄ̃gↄ̃ n gbɛ̃nↄnɛ a zɛ́a, màgↄ̃ à maaa dↄ̃kↄ̃zi kↄ̃n à zaaao. Tó lɛnlo, dian mɛ́ kɛ nà mà yã gↄ̃gↄ̃ n gbɛ̃ pari daa pìnↄnɛ? 10 Yã kɛ̀ Sulemanu wɛ́ɛ kɛ̀ pì kɛ̀ Diinɛ, 11 ben à bènɛ: Zaakɛ yã kɛ̀ ń wɛ́ɛ kɛ̀n gwe, nɛ́ɛ wɛ̃̀ndi gbã̀a wɛ́ɛ kɛro ke auziki ke n ibɛɛnↄ gaa, séde yãgↄ̃gↄ̃na a zɛ́a dↄ̃nan ń wɛ́ɛ kɛ̀, 12 mɛ́ kɛ lán ń wɛ́ɛ kɛ̀ nà, mɛ́ n gba ↄ̃ndↄ̃ kↄ̃n wɛ́ɛzɛ̃ɛo. Gbɛ̃ kee kuu n ã ke n gbɛra kɛ̀ eégↄ̃ ↄ̃ndↄ̃ lán n bàro. 13 Mɛ́ pↄ́ kɛ̀ nɛ́ɛ wɛ́ɛ kɛro kpámma dↄ. Mɛ́ n gba auziki kↄ̃n gakuio píngi ai n wɛ̃̀ndi lɛ́n. Kína ke é ká n ũro. 14 Tó ń tɛ́mazi, bensↄ̃ ń ma yã'onnɛnanↄ kↄ̃n ma yãdiɛnanↄ kũna lán n de Dauda kũna nà, mɛ́ n wɛ̃̀ndi dↄnnɛ kↄ̃n mↄ̀kyakooo. 15 Ben Sulemanu vù, à è kɛ̀ nanaan á ò. Ben à tà Yerusalɛmu, à gàa à zɛ̀ Dii bà kuuna kↄ̃n Isarailinↄ àkpati aɛ, à sa'opↄ kɛ̀ wè ká tɛ́n à tɛ́ kũnↄ kↄ̃n kɛnnakↄ̃o sa'opↄnↄ ò gwe, ben à pↄnna pↄ́blee kɛ̀ a ìbanↄnɛ.

16 Zĩkea kaarua gↄ̃ↄn plaa kenↄ mↄ̀ Sulemanu kiia, aↄ̃ zɛ̀ à aɛ. 17 Aↄ̃ gbɛ̃ doo bè: Ǹ gaafaa kɛmɛ kí. Mapi kↄ̃n nↄgbɛ̃ kɛ̀o wá kú kpɛ́ dↄ̃nkↄ̃mmɛ. Ben ma nɛ́ ì wámbe wa plaa kpɛ́ pì guu. 18 À gurↄ aagↄ̃dee zĩ nↄgbɛ̃ pì nɛ́ ì se. Wámbe wa plaa kpɛ́ pì guu, gbɛ̃kee kúwao gwero. 19 Kɛ̀ nↄgbɛ̃ pì dàɛ a nɛ́gↄ̃gbɛ̃ pìa gwãavĩ, ben à gà. 20 Ben à fɛ̀ɛ gwãavĩ lezãndo, à ma nɛ́gↄ̃gbɛ̃ sɛ̀ ma saɛ gurↄↄ kɛ̀ mamↄma n zↄ̀bleri e ii oo, à dàɛ a saɛ, ben à a nɛ́ gɛ̀ kii sɛ̀ à dàɛmɛ ma saɛ. 21 Kɛ̀ ma vu kↄngↄ mà yↄ̃ kpá ma nɛ́a, ben má è gɛ̀. Kɛ̀ má gwà tíii, ben má è ma nɛ́nlo. 22 Ben nↄgbɛ̃ pì gbɛ̃ndoo bè: Ɛgɛɛmɛ! Ma nɛ́ bé à bɛ̃ɛ, n pↄ́ bé à gà. Ben nↄgbɛ̃ káaku bè: Ɛgɛɛmɛ! N nɛ́ bé à gà, ma pↄ́ bé à bɛ̃ɛ. Ben aↄ̃ↄe lɛokpakↄ̃a kɛɛ kína aɛzĩ.

23 Ben kína bè: Gbɛ̃ kɛ̀kii e bee a nɛ́ bé à bɛ̃ɛ, n pↄ́ bé à gà, bensↄ̃ gbɛ̃ kɛ̀kãa e bee, ɛgɛɛmɛ, n nɛ́ bé à gà, a pↄ́ bé à bɛ̃ɛ. 24 Ben kína bè: À mↄ́mɛ kↄ̃n fɛ̃ɛdaao. Ben wà mↄ̀onɛ. 25 Ben kína bè: À nɛ́ kɛ̀ bɛ̃ɛ zↄ̃kↄ̃rɛ plaa, à à kpadoo kpá gbɛ̃ dooa, é à kpadoo kpá dooa. 26 Nↄgbɛ̃ kɛ̀ a nɛ́ bɛ̃ɛ sↄ̃, nɛ́ pì kɛ̀nɛ wɛ̃nda, ben à bè kínanɛ: Kí, ǹ nɛ́ kɛ̀ bɛ̃ɛ pì kpáa, ǹton à dɛro. Ben à gbɛ̃ndoo bè: Wà à zↄ̃kↄ̃rɛ plaa, wa píngi wà korazi. 27 Ben kína yã mì dɛ̀ à bè: À nɛ́ kɛ̀ bɛ̃ɛ pì kpá nↄgbɛ̃ káakua. Àton à dɛro. À dan gwe. 28 Kɛ̀ Isarailinↄ yãkpaɛ kɛ̀ kína kɛ̀ pì mà, aↄ̃ vĩa kɛ̀nɛ, zaakɛ aↄ̃ↄ è Luda à gbà ↄ̃ndↄ̃ↄ à yã gↄ̃gↄ̃ a zɛ́a.