Bibeli Luayãtaalá Salomↄↄ lɛ 4

Kía

1 Ń kɛfɛũ ma gbɛ̃na, ń kɛfɛũ fá!

N wɛ́ dɛ lán felen wɛ́wa n sálana fòou,

n mikã dɛ lán blè wiilaↄ pilaa Galada sĩ̀sĩwawa.

2 N swaa pua lán sã pↄ́ wà ń kãkɛ̃̀ɛlɛ

aa bↄ̀ zu'okĩi aalɛ suↄwa.

Aa kↄ̃sɛ̀ plapla píi,

a kee i pↄsɛ bↄo.

3 N lɛ́baa dɛ lán wↄ̃ↄtɛ̃n nian dowa,

n lɛ́ kɛfɛũ.

N gɛɛ dɛ lán gbɛafu pɛɛwa n sálana fòou.

4 N nↄɛ dɛ lán Davidi kalangawa.

Sɛngbao mɛ̀n ↄ̀aa sↄo looawà,

nɛgↄ̃naↄ gↄ̃kɛbↄɛ píi.

5 N yↄ̃́ dɛ lán tue nɛ́ sìa pↄ́ aalɛ pↄble sũmaavuↄ guuwa.

6 E gu àↄ gɛ́ dↄi,

e guwɛ àↄ gɛ́ kɛ̃́i,

má gɛ́ gbɛ̀sĩsĩ lí'ↄ gĩnanade musu,

má dɛdɛ sĩ̀sĩ tulaletidewa.

7 Ma gbɛ̃na, n gupii kɛfɛũ,

n gue sãa vĩo.

8 Ma nↄkpama,

to wà pila Libã gusĩsĩdewa

za Amana misonawa

ń Senii gbɛ̀ misonao ń Ɛɛmↄ gbɛ̀ misonao,

za nↄ̀ↄmusuↄ tòopiu,

za gbɛaantɛ̃naↄ gusĩsĩdepiu.

9 N yã́ ma sↄ̃ blè ma nↄkpama, ma báasɛ̃de,

wɛ́ pↄ́ n ma gwaò ma sↄ̃ blè

ń n ↄ̃nɛɛ pↄ́ mɛ̀ndoeo.

10 Ma nↄkpama, ma báasɛ̃de,

n yeamazi kɛ̀ zài,

n yeamazi namɛɛ dɛ vɛ̃ɛa,

n nísi gĩ namɛɛ dɛ pↄ́ gĩnanaↄla píi.

11 N lɛ́baa mↄ̀sɛ dɛmɛɛ lán zↄsapunawa.

Ma nↄkpama,

zↄ́ ń vĩo mɛ́ kú n lɛ́na zíɛ,

n pↄkasaↄ gĩ dɛ

lán Libã bùsu líkpɛ gĩwa.

12 Ń dɛ lán kaa pↄ́ wà a zɛtà

wà kilidàuwa.

Ma báasɛ̃de, ma nↄkpama,

ń dɛ lán bia pↄ́ wà kaa dàiwa,

lán nibↄna pↄ́ wà zɛtàɛ̀wa.

13 N lu pↄ́ↄá gbɛafuɛ

ń libɛ maaↄ ń ãyãlio ń naadilio

14 ń sũmaao ń fee bui gĩnanao

ń sinamↄ lío ń lí'ↄ gĩnanaↄ píi.

Zↄ̃go lí'ↄ ń aloe lí'ↄo ku we

ń pↄ́ pↄ́ a gĩ na dɛńlaↄ píi.

15 Kaa lↄ̀ↄn n ũ,

nibↄna í wɛ̃nide pↄ́ lɛ́ bↄ za Libã gusĩsĩdeu ũ.

Nↄɛ

16 Gugbãntoo ĩ́ana, fɛlɛ!

Gɛↄmidↄkĩi ĩ́ana,

káka su ma kaawa,

a pↄ́ↄ gĩ na i ligua,

ma yenzide i gɛ̃u,

i a libɛ nanaↄ ble.