Bibeli Luayãtaalá Soũↄ 33

33

Lua táasilɛa

1 À gulakɛ Diiɛ gbɛ̃maaↄ,

à kũ̀ nↄ̀sɛpuadeↄ aà táasilɛɛ.

2 À Dii tↄbↄ ń domao,

à lɛsiɛ̀ ń mↄↄnao.

3 À lɛ̀ dafu siɛ̀,

à pↄ́ lɛ́ ń dↄ̃ao ń pↄna wiio.

4 Asa yã́ pↄ́ Dii ò sĩana vĩ,

a náai vĩ a yãkɛa píi guu.

5 A ye yãmaai ń yã́zɛdeo,

Dii gbɛ̃kɛ dṹnia pà.

6 Dii yã'oa mɛ́ musu kɛ̀,

aà lɛ́'ĩana mɛ́ musupↄↄ pɛ̀pɛ.

7 À ikàlɛ gudoũ, à gↄ̃̀ ísia ũ,

à íↄ kã̀aa, à gↄ̃̀ ísi ũ.

8 Dṹnia gbɛ̃́pii, à vĩakɛ Diiɛ,

gbɛ̃́ bɛ̃́ɛↄ píi, à misiilɛɛ̀.

9 Asa à yã'ò ↄ̃ dṹnia kɛ̀,

à yãdìlɛ ↄ̃ à gↄ̃̀ kálɛa.

10 Dii ì lɛ́ pↄ́ buiↄ kpàaĩ gboo,

ì kpa bùsudeↄnɛ ń yã́ pↄ́ aalɛ yáo.

11 Yã́ pↄ́ Dii zɛ̀ò ìↄ zɛa gíũgiũ,

yã́ pↄ́ aà pↄ gbà ìↄ ku gↄↄpii.

12 Báaaden bui pↄ́ Dii dɛ ń Lua ũ

à ń sɛ́ a pↄ́ ũↄ ũ.

13 Za musu Dii ì gugwa zĩ́lɛ,

ì gbɛ̃nazĩnaↄ e píi.

14 Za aà kúkĩi ì wɛpã

gbɛ̃́ pↄ́ kú dṹnia guuↄla píi.

15 Aàpi mɛ́ sↄ̃ dↄ̀ baadeɛ,

ì wɛsi ń yãkɛaↄlɛ píi.

16 Kía lí zĩble a zĩgↄ̃ dasikɛ yã́io,

zĩ̀kanae lí bↄ a gↄ̃sakɛ yã́io.

17 Sↄ̃́ náaikɛa à ń bↄ ɛɛ vĩ,

baa ń a gbãakɛo a fↄ̃ gbɛ̃́ suabao.

18 Dii wɛ́ pɛa a vĩakɛnaↄwa,

gbɛ̃́ pↄ́ an wɛ́ dↄ aà gbɛ̃kɛziↄ.

19 A ń bↄ ga lɛ́zĩ,

a ń gwa aafia nↄana gↄↄ.

20 Wá wɛ́ ìↄ dↄ Diizi,

ↄ̃mɛ wá Dↄnlɛde ũ, wá sɛ̀ngbao ũ.

21 Asa Dii ↄ̃ wá pↄ ì kɛwà na,

wá aà tↄ́ pↄ́ a kua adoa náai vĩ.

22 Dii, n gbɛ̃kɛ àↄ kúwanↄ

lá wá wɛ́ dↄnziwa.