Bibeli Luayãtaalá Isaia 19

Yã́ pↄ́ a Egipiↄ le

1 Yã́ pↄ́ Dii ò Egipi musun kɛ:

Gwa! Dii di lou kàsakasa kpɛ,

àlɛ mↄ Egipi.

An tã́aↄ lɛ́ lualua aà aɛ,

mɛ́ sↄ̃ a kɛ̃ Egipiↄgu.

2 Dii mɛ̀:

Má Egipiↄ kpakↄ̃a ń zĩo,

vĩ̀i ń dãunao, gbɛ̃́ ń gbɛ̃́o,

wɛ̃́lɛ ń wɛ̃́lɛo, kpala ń kpalao.

3 Egipiↄ nisĩna a naliwa,

má ń lɛkpaaĩ gboo.

Aa yãgbɛa tã́aↄ ń wɛlɛndeↄwa

ń gɛ̀sisinaↄ ń màsokɛnaↄ.

4 Má Egipiↄ na dii pãsĩↄnɛ ń ↄzĩɛ,

kía gbɛ̃wɛtãna mɛ́ aↄ dɛ ń kía ũ.

Ma Dii Lua Zĩgↄ̃de mámɛ má ò.

5 An swada í a ba,

swa'ɛpi a gↄ̃ gii, a bɛ̀lɛ a paa.

6 Egipi bùsu swa'ↄnaↄ gĩdↄ,

a í a láa, i wɛ́tↄↄna bↄ,

swa'ɛ feeↄ ń a wáaↄ vlã.

7 Niili dↄ̀ↄ a gↄ̃ náinai e a kãaawa,

bua pↄ́ wa kɛ̀ a gɛɛwaↄ giigaga,

aa gɛ̃ ń ĩ́anao, aaↄ ku lↄo.

8 Kpↄ̀wɛnaↄ ↄ́ↄlↄ,

táalukpanaↄ gↄ̃ wɛ̃nannↄ,

gbɛ̃́ pↄ́ aaì kokoa da Niili íuↄ gↄ̃ zeesai.

9 Wí a bùnwɛmbↄbↄnaↄ kṹ,

bàabaatãnaↄ gɛɛ a gↄ̃ kpá ń wɛ́i.

10 Zↄ̃ɛↄ pↄ a ya,

lakɛ̃naↄ nↄ̀sɛ a ↄ̃̀ↄkpa.

11 Zoã dↄaanaↄá sↄũↄnɛ,

Falaↄ̃ↄ ìwa ↄ̃nↄnaↄ lɛdama gbá vĩo.

Kpelewa aa fↄ̃ o Falaↄ̃ↄɛ

ↄ̃nↄnaↄn ń ũ, yãa kíabuiↄn ń ũi?

12 N ↄ̃nↄnaↄ gɛ̀ máɛ la?

Aa yã́ pↄ́ Dii Zĩgↄ̃de dìlɛ

à kɛ Egipiↄnɛ o wà mae?

13 Zoã dↄaanaↄá sↄũↄnɛ,

Nↄfu gbãadeↄ sã́sãaɛ.

An bùsu gbɛ̃zↄ̃ↄↄ lɛ́ ń gbɛ̃́ↄ liaa.

14 Dii làasoo kpaanla dà Egipiↄnɛ,

à liaa zĩ̀má an yã́ píi kɛa guu,

ↄ̃ aa gↄ̃̀ lán wɛ̃dɛna pↄ́ lɛ́ málɛmalɛ a pisiuwa.

15 Egipi mi ń a vlã́o,

a zaliↄ ń a nàalɛↄ,

a dↄaanaↄ ń a gbɛ̃́ kpɛɛↄ

an gbɛ̃e a fↄ̃ yãe kɛo.

16 Gↄↄ bee Egipiↄ aaↄ dɛ lán nↄɛↄwaɛ, vĩa a ń kṹ aa lualua Dii Zĩgↄ̃de ↄ pↄ́ looańla yã́i. 17 Yuda bùsu yã́ a di Egipiↄwa, gu i limá. Gbɛ̃́ pↄ́ wà Yudaↄ yã'òɛ̀ píi, sↄ̃ a kɛ̃ adegu yã́ pↄ́ Dii Zĩgↄ̃de zɛ̀ò à kɛnɛ́ musu.

18 Gↄↄ bee Egipi wɛ̃́lɛ mɛ̀n sↄoↄ Ɛbɛlu yã'o, aai zɛ ń Dii Zĩgↄ̃deo. Wɛ̃́lɛpiↄ do tↄ́n Ɛliↄpↄli. 19 Gↄↄ bee wa Dii gbagbakĩi bo Egipi guo, wa dↄngubↄ pɛ́lɛ Diiɛ Egipi bùsu zↄ̃lɛu. 20 Aↄ dɛ seela ń dↄnguo ũ Dii Zĩgↄ̃deɛ Egipi bùsuu. Tó aa wiipɛ̀ Diiwa gbɛ̃́ pↄ́ lɛ́ ń gyawiↄ yã́ musu, a suabana gbaɛnɛ́ à yã́sińnↄ, i ń bↄ. 21 Gↄↄ bee Dii a azĩa ↄlↄ Egipiↄnɛ, aai aà dↄ̃, aaiↄ zↄbleɛ ń sa'obↄↄ ń pↄ́wɛntio, aa lɛkɛwa, aai a fĩabo. 22 Dii a kpa Egipiↄzi. A kpáńzi, i ɛa ń gbã́gbã. Aa ɛa zɛ ń Diio, i ń wabikɛa sí, i ń gbã́gbã.

23 Gↄↄ bee zɛda a bↄ Egipi a gɛ́ Asili. Asiliↄ gɛ́ Egipi, Egipiↄ gɛ́ Asili, Egipiↄ ń Asiliↄ kúlɛ Diiɛ sãnu. 24 Isaili mɛ́ aaↄ dɛ bùsu ɛ̀fãaideↄ àaↄ̃de ũ ń Egipio ń Asilio dṹnia guo gↄↄ bee. 25 Dii Zĩgↄ̃de a báaadańgu à mɛ: Ɛ̀fãaideↄ ma gbɛ̃́ Egipiↄ ń Asili ma ↄgbɛↄ ń Isaili ma pↄvĩaↄ.

Isaia
<
19
>