Bibeli Luayãtaalá Zia yã́ 5

Sã ń taala kooao

1 Ɔ̃ ma taala kooa è na gbɛ̃́ pↄ́ zↄ̃lɛa báawapi ↄplaau, wà yãkɛ̃̀wà kpɛ pla píi, wà a lɛ́ kũ̀kũ ń kã́n'ↄo lɛɛ sopla.* 2 Ɔ̃ ma malaika gbãade è, àlɛ kpàwakɛ ń lↄↄ gbãao à mɛ̀: Démɛ kà kã́n'ↄpiↄ gogoa à lápi pooi? 3 Asa gbɛ̃e ku luabɛ ge tↄↄlɛ ge tↄↄlɛ zíɛ a fↄ̃ lápi poo à gwao. 4 Ma ↄ́ↄlↄ̀ maamaaɛ, kɛ́ wi gbɛ̃e e à kà lápi poo gwaao. 5 Ɔ̃ gbɛ̃zↄ̃ↄpiↄ do òmɛɛ: Ńsu ↄ́ↄlↄo. Gwa, Yuda bui Nↄ̀ↄmusu† pↄ́ dɛ Davidi kpala pↄ́ vlãpà Kía ũ‡ zĩblè. A fↄ̃ kã́n'ↄ mɛ̀n soplapiↄ gogo, i lápi poo. 6 Ɔ̃ ma Sã§ è zɛa báapi guo, pↄ́ bɛ̃́ɛ mɛ̀n síiↄ̃piↄ ń gbɛ̃zↄ̃ↄpiↄ zãnguo. A dɛ lá wà aà kòlokpawa. A kↄ́ba sopla ń wɛ́o sopla,* Lua Nisĩna mɛ̀n sopla pↄ́ à ń zĩ́ dṹnia gupiiuↄ ũ. 7 À gɛ̀ lápi sì gbɛ̃́ pↄ́ zↄ̃lɛa báawapi ↄzĩ. 8 Kɛ́ à lápi sì, pↄ́ bɛ̃́ɛ mɛ̀n síiↄ̃piↄ ń gbɛ̃zↄ̃ↄ gbɛ̃ↄn baasↄo mɛ̀ndosaipiↄ kùlɛkulɛ Sãpi aɛ. An baade mↄↄna kũa ń vua tùu pↄ́ tulaletika a paio. Tulaleti piá Lua gbɛ̃́ↄ wabikɛaↄɛ.† 9 Aalɛ lɛ̀ dafu‡ sí aa mɛ̀:

N ka lápi sia ǹ kã́n'ↄpiↄ gogo,

asa wà n dɛ,

n gbɛ̃́ↄ bò Luaɛ ń n auo

bui píi guu, buiyã píi guu,

gbɛ̃́pii guu, bùsu píi guu.

10 N ń kpá kpalau

wá Lua gbàgbanaↄ ũ,§

aai kible tↄↄlɛ.

11 Ɔ̃ ma malaikaↄ è liaa báapizi ń pↄ́ bɛ̃́ɛpiↄ ń gbɛ̃zↄ̃ↄpiↄ dasidasi, an dasi kà ↄ̀aasↄsↄo lɛɛ ũma'ũma,* wa fↄ̃ ń lɛ́ dↄ̃o. Ma ń kↄ̃fĩ mà, 12 aalɛ o ń lↄↄ gbãao:

Sã pↄ́ wa dɛ̀ kà wà iko dↄ̃ɛ̀

ń àizɛɛo ń ↄ̃nↄo ń gbãao ń bɛɛɛo

wí aà táasilɛ wà aà tↄbↄ.

13 Ɔ̃ pↄ́ pↄ́ Lua kɛ̀ musu ń tↄↄlɛo ń tↄↄlɛ zíɛo ń ísia guuo píi, pↄ́ pↄ́ kú baama píiↄ, má mà aa mɛ̀:

Wàↄ bɛɛɛ ń gbãao dↄ̃

gbɛ̃́ pↄ́ zↄ̃lɛa báawaɛ ń São,

wíↄ ń táasilɛ wàↄ ń tↄbↄ gↄↄpii.

14 Pↄ́ bɛ̃́ɛ mɛ̀n síiↄ̃piↄ mɛ̀, ãmi. Ɔ̃ gbɛ̃zↄ̃ↄpiↄ wùlɛwulɛ aa misìilɛɛ̀.

*5:1 Isa 29.11, Eze 2.9-10

†5:5 Daa 49.9

‡5:5 Isa 11.1, 10

§5:6 Isa 53.7

*5:6 Zkl 4.10

†5:8 Soũ 141.2

‡5:9 Soũ 33.3, 98.1, Isa 42.10

§5:10 Bↄa 19.6, 1Piɛ 2.5, Zia 1.6

*5:11 Dan 7.10