Bibeli Luayãtaalá Yáasiↄ 20

20

1 Vɛ̃ɛ ì to wà gↄ̃ láanipↄ ũ,

í gbãa ì ń da yãbↄlɛu,

gbɛ̃́ pↄ́ tò à a dɛ ↄ̃nↄ vĩo.

2 Kía palaaá nↄ̀ↄmusu pũnaaɛ,

gbɛ̃́ pↄ́ aà pↄ fɛ̃̀ɛ̀ azĩa kpà gaiɛ.

3 Lɛdaa lɛkpaau sai ì to wàↄ bɛɛɛ vĩ,

faasaideↄ ìↄ kãa ḿpiiɛ.

4 Màade lí sapa a gↄↄo,

tó à gɛ̀ bua pↄkɛkɛgↄↄ, ìli pↄe eo.

5 Gbɛ̃nazĩna sↄ̃ yã́ dɛ lán ísiwaɛ,

wɛzɛ̃na mɛ́ a tↄa dↄ̃.

6 Gbɛ̃́ daside ì a gbɛ̃kɛkɛanɛ́ yã'o,

ãma bↄa gbɛ̃́ náaidewa zĩ'ũ.

7 Gbɛ̃́ pↄ́ ì yãkɛ a zɛ́wa mɛ́ maa,

báaaden nɛ́ pↄ́ à gà à ń tóↄ ũ.

8 Kía zↄ̃lɛa a yã́kpalɛkɛkĩi

ì vãi píi dↄ̃ a wɛ́ guu à plɛkↄ̃u.

9 Démɛ a fↄ̃ o a nↄ̀sɛ yãe vĩo

á kú duunasai wásawasaɛi?

10 Kiloolɛa vãi ń gbɛ̃blezaao,

Dii za beeↄu píiɛ.

11 Baa kↄ̃̀ↄ'oa guu wì dↄ̃ nɛ́wa,

tó aà yãkɛa maa mɛ́ a dↄ̀ↄ vĩ.

12 Swã́ pↄ́ wì yãmaò ń wɛ́ pↄ́ wì gu'eoo

Dii mɛ́ ń kɛ́ píi.

13 Tó ń ye ii, ńyↄ̃ gↄ̃ taaside ũɛ,

tó n wɛ́ i vĩo, blɛ a mↄma.

14 Pↄluna ì mɛ: I ka màao! I ka màao!

Tó à kàò aɛ, ì azĩa sáaukpa.

15 Vua saio, òso diɛ,

ãma bↄa yãfaade'onawa àao.

16 Tó gbɛ̃́ nibↄ fĩa dì a miwa,

ǹ aà ula si ǹyↄ̃ kũa tↄ̀ↄma ũ gbɛ̃́pi gɛ̃ɛ ũ.

17 Dìidiina pↄblea ìↄ nanɛ́,

gbɛzã sa ì gↄ̃ lɛ́u lán gbɛ̀kↄsↄwa.

18 Zɛ ń yã́o lɛdama musu,

yã́ gwa maamaa, ní gbasa zĩka.

19 Gbɛ̃pena ìↄ bɛ ń dãↄ asiioɛ,

ńsu yãalɛ ń yãbↄlɛn zↄ̃ↄdeoo.

20 Gbɛ̃́ pↄ́ a de ge a da kà,

aà filia a gawà gusia níiniiuɛ.

21 Túbiblea káau taasidↄ̃sai

líↄ báaa vĩ gbɛzão.

22 Ńsu vãi tↄsia làasookɛo.

Sↄ̃́a Diizi à n suaba.

23 Dii za kiloolɛa vãiuɛ,

gbɛ̃blezaa lí kaaàguo.

24 Dii mɛ́ ì gbɛ̃nazĩna kɛ̀sɛ dↄdↄ.

Kpelewa gbɛ̃́ a yã́ pↄ́ a kɛ zɛ́ dↄ̃i?

25 Wã lɛgbɛ̃a Luaɛ kai vĩ,

gbɛzã ńyↄ̃ làasookɛ lɛ́ pↄ́ ń kɛ̀wàpiwa.

26 Kía ↄ̃nↄna ì gbɛ̃vãiↄ plɛ

à ń ká gbɛu à ń kɛ kɛ́lɛkɛlɛ.

27 Dii filia ì gbɛ̃nazĩna làasoo pu,

ì aà nↄ̀sɛkpɛaↄ tàasika píi.

28 Gbɛ̃kɛ ń náaio mɛ́ kía dↄ̃̀anaↄ ũ,

gbɛ̃kɛkɛa ì aà kpala zɛdↄ.

29 Ɛ̀waasoↄ gbãa mɛ́ ń ĩ́andãbↄ ũ,

maezↄ̃ↄↄ mikã pua mɛ́ ń gawi ũ.

30 Gbɛ̃a pↄ́ ì gɛ̃ńgu ì vãi wolomá,

flã'ↄ̃ama ì gɛ̃ e za nↄ̀sɛkpɛau.