Bibeli Luayãtaalá Zelemii 10

10

Lua lɛɛũa ń tã́aↄ

1 Isailiↄ, à yã́ pↄ́ Dii lɛ́ oɛ́ ma.

2 À mɛ̀ ásu buipãleↄ ↄlɛsɛ

à bílikɛ seela pↄ́ ì bↄ musuwao.

Ásu to vĩa lí á kṹ láńwao.

3 Asa buipãleↄ fɛlɛkaayãá yãpãɛ.

Aaì lizↄ̃ sɛ̃u,

ↄ̃ sia ì ã́nɛ́ ń kpásagↄ̃nao.

4 Wì zãblewà ń ã́nusuo ń vuao,

ↄ̃ wì kusa pápawà ń masanao,

kɛ́ asu àↄ zĩazĩao yã́i.

5 Tã́apiↄ lí yã'oo,

aa dɛ lán bua bãyabↄↄwaɛ.

Aali táa'oo, wì ń sɛɛ.

Ásu vĩakɛnɛ́o,

aali fↄ̃ vãie kɛ̀nɛ́o,

mɛ́ aali fↄ̃ yãmaae kɛ̀nɛ́ sↄ̃o.

6 Dii, gbɛ̃e muaannↄo, ń zↄ̃ↄ,

n tↄbↄ̀ n gbãa yã́ musu.

7 Bui píi Kía, démɛ n vĩa vĩo ni?*

Ao, a maannↄ màaɛ.

Bui píi ↄ̃nↄnaↄ ń ń kpaladeↄ guu

gbɛ̃e muaannↄo.

8 Aa doũ ḿpiiɛ,

sↄũↄnɛ, aa mi vĩo,

lí'ãaↄnɛ, aa fↄ̃ lɛdamáe?

9 Wì ã́nusu gbɛ̃gbɛ̃a pↄ́ wà bↄ̀ò Taasisi

ń vua pↄ́ wà bↄ̀ò Ufaza kúlɛwà,

ↄ̃ wì ula búuna ń a gàaluladeo káka

pↄ́ pↄ́ sia ń vuazĩkɛnao kɛ̀piɛ.

Gↄ̃ideↄ ↄzĩↄnɛ píi.

10 Dii mɛ́ Lua sĩande ũ,

aàpi mɛ́ ìↄ ku gↄↄpii Kía ũ.

Tó aà pↄ fɛ̃̀, tↄↄlɛ ì lualuaɛ,

buie a fↄ̃ zɛ aa aà pↄkũma dão.

11 À o buipiↄnɛ à mɛ dii pↄ́ aamɛ aa musu ń zĩ́lɛo kɛ̀opiↄ aa midɛ dṹniauɛ, aaↄ ku gueio.

12 Dii mɛ́ dṹnia kɛ̀ ń a gbãao,

à tↄↄlɛ kàlɛ ń a ↄ̃nↄo,

à musu kpàlɛ ń a wɛzɛ̃o.

13 Tó Dii pũ̀na,

í pↄ́ kú musu ì kↄ̃fĩkɛɛ,

lou ì sisi za dṹnia lɛ́wa.

Dii ì bↄ ń ĩ́anao a làasiu,

lou i ma ń pílɛao.

14 Gbɛ̃nazĩnaↄ sↄũ, aa yãe dↄ̃o,

siaↄ gɛɛ a gↄ̃ kpá ń wɛ́i

tã́a pↄ́ aa pìↄ yã́ musu.

Pↄ́ ɛgɛnaↄnɛ, aa wɛ̃ni vĩo.

15 Pↄ́ gianaↄnɛ, láanipↄↄnɛ.

Yã́kpalɛkɛgↄↄzĩ aa midɛ.

16 Dii pↄ́ dɛ Yakↄbu buiↄ baa ũ muaańnↄo,

asa ↄ̃mɛ pↄ́pii kɛ̀

ń Isaili pↄ́ à ń sɛ́ a pↄ́ ũↄ.

Aà tↄ́n Dii Zĩgↄ̃de.

17 Á gbɛ̃́ pↄ́ wà koezↄ̃̀áziↄ,

à á pↄ́ↄ ye bↄò á bùsuu.

18 Asa ma Dii ma mɛ̀

tia kɛ́wa má bùsuɛ bee gbɛ̃́ↄ zuzu lán gbɛwaɛ.

Má ń ásookɛɛ, wi ń kṹkũ.

19 Waiyoo wápiↄ, kɛ́ wá wíwia yã́i.

Wá bↄá bↄ̀kↄↄɛ.

Wálɛ e yãa wá gyãpi bleɛ.

20 Wà wá zwã̀akpɛↄ kwɛ̀kwɛ,

wà a baↄ kɛ̃̀kɛ̃.

Wá nɛ́ↄ gɛ̃̀zɛa, aa ku lↄo.

Gbɛ̃e ku à zwã̀akpɛ dↄwɛ̃ɛ lↄo,

gbɛ̃e ku à a zwãaↄ kpálɛo.

21 Wá dↄaanaↄá sↄũↄnɛ,

aali yãgbɛa Diiwao.

A yã́i tò an yãe lí bↄ maao,

ↄ̃ an gbɛ̃́ↄ fã̀aa píi.

22 À ma, wàlɛ mↄ́ baokpai,

kↄ̃fĩ zↄ̃ↄ dↄ gugbãntoo oi bùsuu.

Wàlɛ mↄ́ Yuda wɛ̃́lɛↄ dɛ̃ↄnzↄ̃i,

wɛ̃́lɛpiↄ i gↄ̃ gbɛ̃gbonaↄ tòo ũ.

23 Dii, má dↄ̃ kɛ́ gbɛ̃nazĩna kua dɛ aàzĩa yã́ ũo,

gbɛ̃e a fↄ̃ zɛpoo azĩaɛo.

24 Dii, ma toto a zɛ́wa,

i kɛ ń pↄkũmao no.

Ńsu ma lao mà gↄ̃ tɛ̃nɛɛo.

25 Pↄfɛ̃ bↄbↄ bui pↄ́ aa n dↄ̃oↄwa,

gbɛ̃́ pↄ́ aali n sísiopiↄ,

asa aa Yakↄbu buiↄ mↄ̀mↄɛ,

aa ń mↄmↄ bɛ̃̀ɛ,

aa ń bùsu ↄ̃̀ↄkpà.

*10:7 Zia 15.4