Bibeli Luayãtaalá 1 Lada 12

Zĩgↄ̃ pↄ́ nà Davidiwa Saulu gↄↄↄ

1 Kɛ́ Kisi nɛ́ Saulu Davidi yà, gbɛ̃́ pↄ́ aa nà Davidiwa Zikilagaↄ tↄ́n kɛ. Aa ku nɛgↄ̃na pↄ́ dↄ̀aàlɛ zĩlauↄ guuɛ. 2 Aa sáↄ ń gbɛmaↄ kũa, aaì ka ge gbɛ zu ń ↄplaao ń ↄzɛɛo píiɛ. Saulu zĩa bui Bɛ̃yãmɛɛ buiↄnɛ, aan kɛ:

3 An swana Ahiɛzɛɛ, Gibɛa gbɛ̃́ Semaanɛ ń aà dãuna Yoasio, Azemavɛ nɛgↄ̃ɛↄ Yeziɛli ń Pɛlɛtio, Belaka ń Anato gbɛ̃́ Yehuo, 4 Gabaↄ̃ↄ gbɛ̃́ Isimaia pↄ́ dɛ nɛgↄ̃n gbɛ̃ↄn baakwiↄ dↄaanaↄ do ũ, 5 Selemia, Yaaziɛ, Yohanani, Gedela gbɛ̃́ Yozaba, 6 Ɛluzai, Yelimↄ, Bealia, Semalia, Alufi bui Sefatia, 7 Ɛlikana, Isia, Azalɛli, Kole buiↄ Yoɛzɛɛ ń Yasↄbaũo 8 ń Gedoo gbɛ̃́ Yeloaũ nɛgↄ̃ɛↄ Yoela ń Zebadiao.

9 Gada buieↄ ńzĩa kpà Davidiwa sɛ̃gbãu. Gↄ̃sa gbãaↄnɛ. Aaìↄ ku zĩ̀ sↄu guuɛ, mɛ́ aa sɛ̀ngbao ń sↄ̃nao dↄ̃. An oa bↄ̀ nↄ̀ↄmusuwa, mɛ́ aaìↄ wãa gusĩsĩdeu lán tuewa. 10 Ezɛɛ mɛ́ ń swana ũ, a plaade Obadia, a àaↄ̃de Ɛliabu, 11 a síiↄ̃de Misimana, a sↄode Zelemii, 12 a soolode Atai, a soplade Ɛliɛli, 13 a swaaↄ̃de Yohanani, a kɛ̃okwide Ɛlizaba, 14 a kwide Zelemii, a kuɛdode Mabanai.

15 Gada buipiↄá zĩgↄ̃ swanaↄnɛ. An gbɛ̃́ pↄ́ a gbãa kɛ̃́sãańzi gbãa mɛ́ sáa ń gbɛ̃ↄn basↄoↄ gbãao. An gbɛ̃́ pↄ́ dɛńlaↄ sↄ̃ gbɛ̃ↄn ↄ̀aa sↄo pↄ́. 16 Ɔ̃mɛ bùa Yuudɛ̃wa mↄ sɛ̃́ia guu gↄↄ pↄ́ à pà, aa tò guzulɛdeↄ tilɛ̀ gukpɛ ń bɛ'aɛo píi.

17 Bɛ̃yãmɛɛ buieↄ ń Yudaeↄ mↄ̀ nà Davidiwa sɛ̃gbãu lↄ. 18 Davidi gɛ̀ dàńlɛ à mɛ̀: Tó aafia álɛ mↄa à dↄmalɛ, mí gbãakpaázi ń nↄ̀sɛmɛndoo. Tó álɛ mↄ́ ma kpái ma ibɛɛↄwa, baa kɛ́ mi yãpãsĩkɛɛ́oɛ sↄ̃, wá deziↄ Lua a e, i yã́gↄ̃gↄ̃wɛ̃ɛ. 19 Ɔ̃ Lua Nisĩna dɛ̀dɛ nɛgↄ̃n gbɛ̃ↄn baakwipiↄ swana Amasaiwa à mɛ̀:

N gbɛ̃́ↄn wá ũ, Davidi,

wa zɛnnↄɛ, Yɛse nɛ́.

Lua aafia kã́fĩnɛ,

Lua n dↄnlɛdeↄ gba aafia lↄ,

asa n Lua a dↄnlɛɛ.

Ɔ̃ Davidi ń dílɛ à ń kɛ́ a zĩgↄ̃ gbãamↄnɛdeↄ swanaↄ ũ.

20 Manase buieↄ nà Davidiwa gↄↄ pↄ́ aàpi ń Filitɛ̃ↄ lɛ́ gɛ́ zĩkai ń Sauluo. Ɔ̃ Davidi ń a gbɛ̃́ↄ i dↄ Filitɛ̃ↄlɛo, asa Filitɛ̃ kíaↄ mɛ́ lɛkpàaĩ, ↄ̃ aa aà gbàɛ aa mɛ̀: Tó à zɛ̀ ń a dii Sauluoɛ, aa wá mi zↄ̃zↄ̃ɛ. 21 Manase bui pↄ́ nà Davidiwa gↄↄ pↄ́ à tà Zikilagaↄn kɛ: Adena, Yozaba, Yediaɛ, Mikaila, Yozaba, Ɛlihu ń Ziletaio. Aamɛ Manase bui zĩgↄ̃ gbɛ̃ↄn ↄ̀aasↄsↄoↄ dↄaanaↄ ũ. 22 Aa dↄ̀ Davidilɛ gbãamↄnɛdeↄ yã́ musu, asa gↄ̃sa gbãaↄnɛ ḿpii, Davidi zĩgↄ̃ↄ gbɛ̃zↄ̃ↄↄnɛ. 23 Lá gu lɛ́ dↄ wìↄ mↄ Davidi kĩ́i dↄiaàlɛ e aà zĩgↄ̃ↄ gɛ̀ dasikũ̀ lán Lua ìwaↄwaɛ.

Gbɛ̃́ pↄ́ nà Davidiwa Hɛblↄ̃ↄ

24 Gbɛ̃́ pↄ́ aa gↄ̃kɛbↄↄ kũa aa mↄ̀ Hɛblↄ̃ Davidi kpái kpalau Saulu gbɛu lá Dii òwaↄ dasilɛn kɛ: 25 Yuda pↄ́ sɛ̀ngbao ń sↄ̃naↄ kũaↄ gbɛ̃ↄn ↄ̀aasↄsↄo lɛɛ soolo n ↄ̀aa síiↄ̃oɛ (6.800). 26 Simɛↄ buiↄ gbɛ̃ↄn ↄ̀aasↄsↄo lɛɛ sopla ń basↄooɛ (7.100). 27 Levii buiↄ gbɛ̃ↄn ↄ̀aasↄsↄo lɛɛ síiↄ̃ ń ↄ̀aa àaↄ̃oɛ (4.600). 28 Aalona buiↄ dↄaana Yoiada ń a gbɛ̃́ↄ gbɛ̃ↄn ↄ̀aasↄsↄo lɛɛ àaↄ̃ ń ↄ̀aa àaↄ̃ ń basↄooɛ (3.700). 29 Ɛ̀waaso nɛgↄ̃n Zadoki kú ń guu ń a bɛ'uabeleↄ gbɛ̃ↄn bao ń plao. 30 Saulu zĩa bui Bɛ̃yãmɛɛ buiↄ gbɛ̃ↄn ↄ̀aasↄsↄo lɛɛ àaↄ̃ɛ (3.000). Bɛ̃yãmɛɛ bui dasideↄ ku Saulu kpɛ e tiaɛ. 31 Ɛflaiũ buiↄ gbɛ̃ↄn ↄ̀aasↄsↄo lɛɛ bao ń ↄ̀aa síiↄ̃oɛ (20.800). Gↄ̃sa gbãa tↄdeↄnɛ ń gbɛ̃́ↄ guu. 32 Manase bui pↄ́ kú bɛ'aɛ oiↄ gbɛ̃ↄn ↄ̀aasↄsↄo lɛɛ bao plasaiɛ (18.000). Gbɛ̃́piↄ wà ń plɛ́ aa gɛ́ Davidi kpái kpalau. 33 Isakaa bui dↄaanaↄ gbɛ̃ↄn ↄ̀aa doɛ. Aa gↄↄ bee yã́ dↄ̃ mɛ́ aa laai vĩ a yã́ musu, aa dↄ̃ lá à kũ̀ Isailiↄ kɛ. Aa kú ń ń ìwaↄ píi. 34 Zabulↄni bui pↄ́ aa zĩ dↄ̃ mɛ́ aa gↄ̃kɛbↄ dↄ́ɛ dↄ̃ↄ píi gbɛ̃ↄn ↄ̀aasↄsↄo lɛɛ blakwiɛ (50.000). Aa ku aà kpɛ ń nↄ̀sɛmɛndooɛ 35 Nɛfatali bui dↄaanaↄ gbɛ̃ↄn ↄ̀aa sↄoɛ ń ń ìwaↄ gbɛ̃ↄn ↄ̀aasↄsↄo lɛɛ baakwi ń soplao (37.000), baade ń a sɛ̀ngbaoo ń a sↄ̃nao. 36 Dã bui pↄ́ aa ku zĩ̀ sↄu guuↄ gbɛ̃ↄn ↄ̀aasↄsↄo lɛɛ baakwi plasaio ń ↄ̀aa àaↄ̃oɛ (28.600). 37 Asɛɛ bui pↄ́ zĩ dↄ̃ mɛ́ aa ku sↄu guuↄ gbɛ̃ↄn ↄ̀aasↄsↄo lɛɛ blaɛ (40.000). 38 Lubɛni buiↄ ń Gada buiↄ ń Manase bui pↄ́ kú Yuudɛ̃ baaleↄ gbɛ̃ↄn sↄ́sↄo lɛɛ basooloɛ (120.000). An baade ń a gↄ̃kɛbↄↄ.

39 Gbɛ̃́piↄá zĩgↄ̃ↄnɛ ḿpii, aaìↄ ku sia zĩlau sↄu guuɛ. Aa mↄ̀ Hɛblↄ̃ ń nↄ̀sɛmɛndoo Davidi kpái kpalau, i gↄ̃ Isaili bui píi kía ũ. Ɔ̃ Isaili kĩniↄ làasoo doũpi kɛ̀ lↄ, aa ye Davidi kpaa kpalaui. 40 Ɔ̃ aa gↄↄ àaↄ̃ kɛ̀ ń Davidio we, aa pↄblè aa vɛ̃ɛmì, asa an bɛdeↄ kũ̀sũakɛ̀nɛ́ɛ. 41 Bee gbɛa an saɛde pↄ́ kú Isakaa buiↄ bùsuu ń Zabulↄni buiↄ bùsuo e à gɛ̀ pɛ̀ Nɛfatali bui pↄ́ kú zã̀ↄ bùsuwaↄ aa pↄblea dì zàa'ĩnaↄnɛ ń yiongoↄ ń sↄ̃baonaↄ ń zuↄ aa mↄ̀onɛ́ɛ. Pↄ́wɛnti diɛ ń kaadↄɛmbɛ giiↄ ń vɛ̃ɛbɛ giiↄ ń vɛ̃ɛo ń nísio ń zuↄ ń sãↄ, kɛ́ Isailiↄ lɛ́ pↄnakɛ yã́i.