5
Bawlˊ htawm maeeˊ Konˊyungˊ
1 Hawcˊ awnˊ na, uiˊ nyu bawlˊ htawm ri hk'aˊ tiˊ aˊtawmˊ Eun kuˊ mokˊ pang tenceoˊ naˊ. Bawlˊ htawm awnˊ a temˊ ri gawmˊ lalˊ plakˊ. A tawkˊ ri glhuip ri ri taˊraˊ aˊres taˊraˊ. 2 Hawcˊ koˊ, uiˊ pun ri nyu inˊhpom tiˊca keuting naˊ klawng eun ri lahˊ sengˊ lawsˊ. Eun lahˊ, “Aˊnhawˊ ciˊ kaw kuingˊ ri tohˊ taˊraˊ naˊ maeeˊ glas bawlˊ htawm aenˊ na?” 3 Daecti peue utˊ kuingˊ pang maoˊ, utˊ pang bhenˊ keuteˊ maeeˊ peue utˊ hk'aˊruim ka bhenˊ keuteˊ naˊ, a hkuinˊ kueˊ nang kaw cang glas ri nawk hk'aˊnaee ka bawlˊ htawm naˊ saecˊ ti peue. 4 Kopti unˊ kueˊ a nang kaw kuingˊ ri glas ri nawk hk'aˊnaee ka bawlˊ htawm naˊ, uiˊ saeˊcaeeˊ yam ri. 5 Hawcˊ ka naˊ, hk'aˊnaee muk ce nang kawt awnˊ ce ti peue eun lahˊ a ri uiˊ, “Pawlaee yam. Keueˊ reuˊ, leuvai sangsiˊ ce peue ceucat Yuˊdah kuˊ meuh aˊtaˊ keuting eun Davitˊ naˊ pe Eun hawcˊ. Eun cang glas bawlˊ htawm naˊ maeeˊ cang tohˊ taˊraˊ aˊres taˊraˊ naˊ.”
6 Hawcˊ ka naˊ, uiˊ pun ri nyu Konˊyungˊ kuˊ seunˊ sak toh ri hawcˊ naˊ cawng Eun nang ngonˊ ka tenceoˊ naˊ. Kuˊ aˊyu imˊ punˊ tuˊ naˊ maeeˊ muk nang kawt naˊ ce rop Eun. Eun kueˊ reungˊ aˊres reungˊ maeeˊ ngaiˊ aˊres ngaiˊ. Ngaiˊ aˊres ngaiˊ naˊ a meuh citˊ aˊres Citˊ Eun Peucawoˊ Cawoˊ cusˊ Eun heulˊ pang bhenˊ keuteˊ naˊ ku duihˊ ka naˊ. 7 Konˊyungˊ naˊ Eun ingˊ ti bawlˊ htawm utˊ ri hk'aˊ tiˊ aˊtawmˊ Eun kuˊ mokˊ pang tenceoˊ naˊ. 8 Hawcˊ ti Eun bawlˊ htawm naˊ, kuˊ aˊyu imˊ punˊ tuˊ naˊ maeeˊ nang kawt lalˊkulˊ punˊ peue naˊ ce nghupˊ ri nanggalˊ Eun Konˊyungˊ naˊ. Ce jangˊ tingˊ maeeˊ paenˊ hk'ilˊ seuglongˊ kueˊ ten tuˊ homˊ nuk naˊ ku peue ri. Ten tuˊ homˊ naˊ a meuh sengˊ hk'oˊ munˊ ce peue Eun Peucawoˊ naˊ. 9 Ce lahˊ sengˊ cai hk'uˊ naˊ. Ce lahˊ,
“Kuingˊ Mi ri rap ri ti bawlˊ htawm naˊ
maeeˊ tohˊ taˊraˊ naˊ maeeˊ glas htawm naˊ,
kopti pun Mi ri hkamˊ toh peue ri hawcˊ.
Mi leuvaee peue gawmˊeucˊ naˊ peue
neum peue ceu ku ceu, leukahˊ ku ceu, ceucat ku ceu maeeˊ peue kuingˊ ku kuingˊ naˊ peue hk'aiˊ nhamˊ ri naˊ ap ce ri Peucawoˊ Eun hawcˊ.
10 Mi yeuh ce meuh peue kuingˊ maeeˊ peue jhawpˊ rit yeuh mhaiˊ Eun Peucawoˊ eˊ naˊ hawcˊ.
Ce kaw uˊpeung bhenˊ keuteˊ naˊ.”
11 Hawcˊ ka naˊ uiˊ keueˊ, uiˊ pun ri mhawngˊ sengˊ ce inˊhpom hk'oˊ saenˊ hk'oˊ lan ri unˊ laee eucˊ mhinˊ ri naˊ ce. Ce rop tenceoˊ naˊ maeeˊ kuˊ aˊyu imˊ punˊ tuˊ naˊ maeeˊ muk nang kawt naˊ ce. 12 Ce cai lawsˊ lahˊ,
“Konˊyungˊ pun ri hkamˊ toh ri naˊ,
kuingˊ Eun ri pun tiˊca, vahtuˊ hk'ilˊ leumuil, cuˊyi, kawlˊreng, hk'aˊ hkopyawmˊ,
munhpungˊ maeeˊ hk'aˊ sukˊseunˊ naˊ.”
13 Hawcˊ ka naˊ, uiˊ pun ri mhawngˊ sengˊ ka kuˊ aˊyu imˊ kuingˊ pang maoˊ, pang bhenˊ keuteˊ, hk'aˊruim bhenˊ keuteˊ naˊ maeeˊ nang mhaˊseumutˊ naˊ ku ceu. A lahˊ,
“Kah hk'aˊ sukˊseunˊ, hk'aˊ hkopyawmˊ, munhpungˊ naˊ maeeˊ tiˊca naˊ
kueˊ ri Cawoˊ mokˊ pang tenceoˊ naˊ Eun maeeˊ Konˊyungˊ naˊ Eun
cotˊcu ri reuˊ.”
14 Kuˊ aˊyu imˊ punˊ tuˊ naˊ a lahˊ, “Amin.” Muk nang kawt naˊ ce nghupˊ ri faeeˊ.