1 Aˊmawo leumeusˊ uiˊ naˊ peˊ, htawm aenˊ meuh a htawm temˊ uiˊ ri tuilˊ ri peˊ lalˊ okˊ ti okˊ. Temˊ uiˊ ri tuilˊ htawm lalˊ okˊ aenˊ a ri peˊ naˊ a meuh punta kaw a sawlˊ peˊ kuit rot ri hk'aˊ leupaws seumeuˊ naˊ. 2 Uiˊ sumˊ kah peˊ kuit rot ri leukahˊ lahˊ ce peue suip leukahˊ Eun Peucawoˊ seungaˊ chakˊ leumahˊ naˊ ce, maeeˊ sumˊ kah peˊ kuit rot ri leukahˊ Eun Peucawoˊ Cawoˊ teumˊkawm htut eˊ lawtpon kuˊ cu Eun peue caee Eun Yesuˊ ce lahˊ a naˊ.

3 Nanggalˊ ka naˊ, kaw peˊ htukˊ ri yeuh ri yawng, cu yam vang tisutˊ naˊ, kaw a kueˊ peue cang chaw hkamram peue maeeˊ peue hotˊ ri yeuh hk'aˊ taˊnhaˊ rai ka jawngkuiˊ tuˊ ri naˊ. 4 Ce kaw lahˊ, “Kati lahˊ ri uinˊ ri lahˊ, ‘Yesuˊ Eun kaw tang lih’ naˊ, uiˊ nawk a? Lingˊ ka hawcˊ, tangˊ neum aˊtaˊ aˊya eˊ naˊ yeum ce heulˊ naˊ, ku ceu gawmˊeucˊ naˊ a kawnˊ meung seunˊ ri yam bhenˊ keuteˊ naˊ tangˊ a ri hpanplengˊ ri naˊ.” 5 Daecti ce guil ri pil lawng aenˊ na, tangˊ neum leumahˊ pang maoˊ naˊ kueˊ meuh a kopti leukahˊ Eun Peucawoˊ naˊ. Hawcˊ koˊ, bhenˊ keuteˊ naˊ a lih neum leuumˊ naˊ. Leuumˊ naˊ a rop bhenˊ keuteˊ naˊ. 6 Yam awnˊ na, leuumˊ naˊ a htumˊ bhenˊ keuteˊ naˊ, a yeuh bhenˊ keuteˊ naˊ lulaic. 7 Kopti meuh a leukahˊ awnˊ a naˊ, maoˊ maeeˊ bhenˊ keuteˊ maetˊmaenˊ naˊ a sawnˊ ri uinˊ ri meuh pun kuˊ kaw dum ri ri ngawl, meuh pun kaw koˊ yam seunyi kaw tawsˊ aˊmu naˊ maeeˊ meuh pun kaw yeuh peue unˊ leupaws seumeuˊ naˊ ce lulaic.

8 Daecti aˊmawo leumeusˊ uiˊ naˊ peˊ, pawlaee va ri pil a, yam ti seunyi Eun Peucawoˊ naˊ seunˊ a ti hengˊ neum, yam ti hengˊ neum Eun naˊ a seunˊ ti seunyi. 9 Peucawoˊ hpaw Eun caˊ yeuh kati ri naˊ kvai seunˊ kuˊ kuit peue ngonˊ naˊ, daecti yeunˊhkam Eun pun peˊ. Kopti unˊ sumˊ kah Eun peue lulaic saecˊ ti peue, daecti Eun sumˊ kah peue tawsˊ hpumˊ fuin mapˊ ri ku peue.

10 Seunyi Eun Peucawoˊ naˊ kaw a lih seunˊ peue conˊ ingˊ ce yam unˊ pawn peue kuiˊ ri naˊ. Kuingˊ pang maoˊ naˊ a naˊ raiˊ maeeˊ sengˊ lawsˊ ri. Kuˊ kueˊ hk'aˊnaee keuteˊ naˊ ce a naˊ pun ri dum ri ri ngawl. Bhenˊ keuteˊ naˊ maeeˊ kuˊ kueˊ hk'aˊpang ka naˊ gawmˊeucˊ a naˊ lulaic heulˊ.

11 Kopti ku ceu gawmˊeucˊ naˊ kaw a lulaic yeuh keutitˊ naˊ, peˊ ciˊ kaw htukˊ ri meuh peue yeuh saˊnhawˊ? Peˊ kaw htukˊ ri aˊyu imˊ hk'aˊnaee hk'aˊ seungaˊ chakˊ ri maeeˊ aˊyu imˊ hotˊ hk'aˊ Eun Peucawoˊ 12 yam sumˊ kah peˊ seunyi Eun Peucawoˊ naˊ rot vaeevaee peˊ buih koˊ a naˊ. Seunyi yam awnˊ na, maoˊ naˊ a kaw lulaic ri ngawl naˊ, kuˊ kueˊ hk'aˊnaee keuteˊ naˊ a kaw naee ri kucˊ haˊ ka ngawl naˊ. 13 Daecti kopti Peucawoˊ jhawpˊ Eun kati ri naˊ keutawnˊ naˊ, eˊ buih koˊ maoˊ hk'uˊ maeeˊ bhenˊ keuteˊ hk'uˊ kuˊ meuh vang utˊ ce peue leupaws seumeuˊ naˊ.

14 Kop awnˊ na aˊmawo leumeusˊ uiˊ naˊ peˊ, kopti buih koˊ peˊ ceu nang aenˊ ce naˊ, coˊcaˊ peˊ yeuh Peucawoˊ Eun nyu peˊ unˊ laee kueˊ vang ri, vang cutyawmˊ maeeˊ kueˊ peˊ hk'aˊ renˊkawn kuit samˊran cumyenˊ hk'aˊnaee Heun naˊ reuˊ. 15 Kuit rot ri ka reuˊ, hk'aˊ yeunˊhkam Eun Peucawoˊ naˊ meuh a punta peue naˊ kaw peue pun hk'aˊ htut lawtpon naˊ, seunˊ awngˊ leumeusˊ eˊ Pawˊlu eun ku temˊ ri tuilˊ htawm ri peˊ ri cuˊyi Peucawoˊ tuilˊ Eun ri heun naˊ. 16 Htawm Seungaˊ temˊ eun naˊ ku okˊ ka, temˊ eun lawng seunˊ aenˊ a naˊ yeut. Hk'aˊnaee htawm eun naˊ, a kueˊ lawng kuˊ nyhapˊ ri yawng naˊ ngonˊ. Peue unˊ yawng meulamlam ri unˊ keutawnˊ naˊ ce koˊ, ce hpawtˊ leukahˊ eun naˊ seunˊ hpawtˊ ce htawm Seungaˊ ton seubu naˊ. Ce ti hk'aˊ lulaic naˊ ingˊ ri ti meun.

17 Kop awnˊ na aˊmawo leumeusˊ uiˊ naˊ peˊ, kopti yawng peˊ lawng aenˊ a hawcˊ naˊ, punta kaw peue unˊ cang copˊlong peˊ kleucˊ hk'aˊ ri heulˊ hotˊ peue unˊ hotˊ hk'aˊ munˊ hk'aˊ sinˊ naˊ ce, maeeˊ kaw peˊ unˊ cang hk'uicˊ hk'aiˊ vang mokˊ keutawnˊ ri naˊ, uinˊ sati ri reuˊ. 18 Daecti kah peˊ hukˊhawnˊ hk'aˊnaee munˊ sinˊ Eun Yesuˊ Hkrit Cawoˊ Peucawoˊ Cawoˊ teumˊkawm htut eˊ lawtpon naˊ Eun, maeeˊ kah peˊ gawm yawng Eun saeˊcaeeˊ heunˊ reuˊ. Kah Eun kueˊ munhpungˊ maetˊmaenˊ rot ti cotˊcu ri reuˊ. Amin.