1 Ecˊawngˊ naˊ peˊ, sumˊ tuilˊ uiˊ sati peˊ ri kuit rot ri leukahˊ munˊ renˊkawn sangsawnˊ uiˊ a ri peˊ kuˊ pun peˊ ri rap ri ti a hawcˊ peˊ yumˊ keutawnˊ hk'aˊnaee ka naˊ. 2 Peˊ lawn jhawpˊ leukahˊ munˊ renˊkawn aenˊ a keutawnˊ seupit koˊ, peˊ kaw lawtpon ri leukahˊ munˊ renˊkawn aenˊ a. A lawn unˊ yeuh keutitˊ koˊ, hk'aˊ yumˊ peˊ naˊ meuh a kuˊ hk'oˊhk'awngˊ.

3 Kopti lawng kuˊ pun uiˊ ri rap ri ti uiˊ sangsawnˊ peˊ ri ka aenˊ meuh a kuˊ aˊyeˊ keuting hk'aiˊ peue. A meuh lawng Hkrit pun Eun ri yeum kopti meuh a mapˊ eˊ naˊ hotˊ seunˊ kuˊ temˊ a ri hk'aˊnaee htawm Seungaˊ naˊ. 4 Eun pun ri hkamˊ hk'aˊ puingˊ ri naˊ. Hawcˊ ka loeˊ seunyi naˊ, Eun pun ri tang kuhˊ imˊ hotˊ seunˊ kuˊ temˊ a ri hk'aˊnaee htawm Seungaˊ naˊ. 5 Hawcˊ tuilˊ Eun Petruˊ* 15:5 Leukahˊ Helasaˊ ka naˊ a lahˊ Kefasˊ. Kefasˊ naˊ a meuh muis seubu eun Petruˊ naˊ. eun nyu tuˊ ri naˊ, Eun ku tuilˊ peue caee ri kulˊleualˊ peue naˊ ce nyu ri yeut. 6 Hawcˊ awnˊ na, Eun tang tuilˊ ecˊawngˊ hpawnˊpakˊ peue paiˊ naˊ ce nyu ri naˊ tiduihˊ. Peue awnˊ ce saecˊ yeum heulˊ ngonˊ, daecti maetˊmaenˊ ce kawnˊ aˊyu imˊ hk'aˊ heunˊ. 7 Hawcˊ awnˊ na, Eun tuilˊ Yakopˊ eun nyu ri. Hawcˊ koˊ, Eun tuilˊ peue caee ri naˊ ce nyu ri gawmˊeucˊ. 8 Vang tisutˊ ka naˊ, uiˊ saecˊ naˊ seunˊ oˊngak unˊ nang hk'oˊ keutˊ uiˊ keutˊ naˊ koˊ, Eun ku tuilˊ uiˊ nyu ri yeut.

9 Kopti hk'aˊnaee muk ce peue caee Eun Yesuˊ naˊ meuh uiˊ peue aetˊ hk'aiˊ peue. Kopti tawn keunhapˊ uiˊ muk konˊ Hkrit Eun Peucawoˊ naˊ ce, uiˊ hkuinˊ kuingˊ ri meuh peue caee Eun Yesuˊ. 10 Daecti kopti meuh a munˊ Eun Peucawoˊ naˊ, uiˊ ku lakˊ meuh yeuhkiˊ. Munˊ Eun Peucawoˊ kueˊ ri uiˊ naˊ a hkuinˊ meuh kuˊ hk'oˊhk'awngˊ. Uiˊ yeuh kanˊ heunˊ hk'aiˊ peue caee Eun Yesuˊ naˊ ce gawmˊeucˊ. Daecti uiˊ hkuinˊ yeuh meun a, munˊ Eun Peucawoˊ kuˊ kueˊ hk'aˊnaee uiˊ naˊ a yeuh a. 11 Kop awnˊ na, uiˊ ri unˊ lahˊ ce ri unˊ lahˊ, ye sangsawnˊ yawo lawng kuˊ ti ceu awnˊ na, peˊ ku pun ri yumˊ lawng awnˊ na hawcˊ.

12 Ye lawn sangsawnˊ lahˊ Hkrit pun Eun ri rap ri ti hk'aˊ tang kuhˊ imˊ Eun hk'aiˊ vang yeum ri naˊ hawcˊ koˊ, a ciˊ yeuh keunhawˊ ngonˊ peˊ vaeeˊ kawnˊ meung lahˊ ri hk'aˊ tang kuhˊ imˊ naˊ unˊ kueˊ? 13 A lawn unˊ kueˊ hk'aˊ tang kuhˊ imˊ hk'aiˊ vang yeum naˊ koˊ, Hkrit Eun ku hkuinˊ kaw pun ri tang kuhˊ imˊ. 14 Hkrit Eun lawn unˊ pun ri tang kuhˊ imˊ koˊ, leukahˊ munˊ sangsawnˊ eˊ naˊ a hkuinˊ kaw kueˊ munˊ. Hk'aˊ yumˊ eˊ naˊ a ku hkuinˊ kaw kueˊ munˊ yeut. 15 Lheuˊ awnˊ na, meuh a kopti hkamˊ eˊ saˊhkiˊ ka lawng Peucawoˊ yeuh Eun Hkrit Eun tang kuhˊ imˊ naˊ, eˊ ku naˊ meuh nang hkamˊ saˊhkiˊ chiˊlai lawng Eun Peucawoˊ naˊ. Daecti peue yeum naˊ ce lawn unˊ pun ri tang kuhˊ imˊ koˊ, Peucawoˊ Eun ku hkuinˊ kaw yeuh Hkrit Eun tang kuhˊ imˊ. 16 Kopti Peucawoˊ Eun lawn unˊ yeuh peue yeum naˊ ce tang kuhˊ imˊ koˊ, Eun ku naˊ unˊ yeuh Hkrit Eun tang kuhˊ imˊ yeut. 17 Hkrit Eun lawn naˊ unˊ pun ri tang kuhˊ imˊ koˊ, hk'aˊ yumˊ peˊ naˊ a hkuinˊ kaw kueˊ munˊ. Peˊ ku naˊ kawnˊ utˊ hk'aˊnaee mapˊ ri naˊ meun. 18 Lheuˊ awnˊ na, peue pun ri yeum hk'aˊnaee Hkrit Eun naˊ ce ku naˊ lulaic heulˊ yeut. 19 Eˊ lawn kueˊ vang keutuiˊ hpumˊ hk'aˊnaee Hkrit Eun yam kawnˊ aˊyu imˊ eˊ maetˊmaenˊ naˊ palkoe yawo koˊ, eˊ kaw meuh peue kueˊ vang tukyak peue hk'aiˊ peue gawmˊeucˊ.

20 Daecti neumneum ka naˊ koˊ, Hkrit pun Eun ri tang kuhˊ imˊ hk'aiˊ vang yeum ri naˊ hawcˊ. Eun meuh pliˊ nanggalˊ hk'aˊnaee peue pun ri yeum heulˊ hawcˊ naˊ ce gawmˊeucˊ. 21 Kopti seunˊ hk'aˊ yeum naˊ keutˊ kueˊ a kopti meuh a peue ti peue naˊ eun naˊ, hk'aˊ tang kuhˊ imˊ hk'aiˊ vang yeum naˊ a ku keutˊ kueˊ kopti meuh a peue ti peue naˊ Eun yeut. 22 Kopti seunˊ peue gawmˊeucˊ naˊ pun eˊ ri yeum kopti meuh a Adam eun naˊ, peue gawmˊeucˊ naˊ eˊ kaw pun civit naˊ kopti meuh a Hkrit Eun. 23 Daecti eˊ kaw sawngˊ kah ri koˊ yam ri naˊ ti peue hawcˊ ti peue. Hkrit Eun meuh nang kuhˊ imˊ nanggalˊ. Hawcˊ ka naˊ yam naˊ Eun tang lih naˊ, peue Eun naˊ ce kaw tang kuhˊ imˊ. 24 Hawcˊ awnˊ na yam hawcˊ Eun yeuh ri cawoˊ uˊpeung, cawoˊ anˊnya keuting maeeˊ cawoˊ tiˊca keuting naˊ ce lulaic gawmˊeucˊ naˊ, Eun kaw ap kuingˊ naˊ ri Aˊkuiingˊ Eun, yam awnˊ na a kaw rot yam tisutˊ naˊ. 25 Kopti Hkrit kaw Eun kah ri uˊpeung kuingˊ naˊ rot ti yam yeuh Eun ransu ri naˊ ce utˊ hk'aˊruim ka dak cung ri naˊ gawmˊeucˊ naˊ. 26 Ransu tisutˊ kuˊ Hkrit kaw Eun sawm ri yeuh a lulaic naˊ a meuh hk'aˊ yeum naˊ. 27 Kopti hk'aˊnaee htawm Seungaˊ naˊ lahˊ, “Peucawoˊ yeuh Eun ku ceu naˊ ce utˊ hk'aˊruim ka dak cung Eun naˊ.”† 15:27 Sukˊseunˊ 8:6 Yam lahˊ Eun, “Ku ceu naˊ” utˊ ce hk'aˊruim ka dak cung Eun naˊ, a hkuinˊ paˊ Peucawoˊ Eun naˊ eˊ yawng a glihˊgleuengˊ kopti meuh Eun Cawoˊ yeuh ku ceu naˊ ce utˊ hk'aˊruim ka dak cung Eun Hkrit naˊ. 28 Yam Peucawoˊ hawcˊ Eun yeuh ri ceu nang aenˊ ce naˊ, Konˊ aiˊ Eun ku utˊ hk'aˊruim ka hk'aˊ uˊpeung Eun Peucawoˊ Cawoˊ yeuh ku ceu naˊ ce utˊ hk'aˊruim ri naˊ Eun. Aenˊ a meuh punta Peucawoˊ kaw Eun utˊ hk'aˊpang ku ceu gawmˊeucˊ naˊ.

29 Yeuh keutitˊ koˊ, a lawn unˊ kueˊ hk'aˊ tang kuhˊ imˊ hk'aiˊ vang yeum naˊ koˊ, peue rap ri ti hk'aˊ cumˊ pun peue yeum naˊ ce ciˊ kaw yeuh saˊnhawˊ? Peue yeum naˊ ce lawn unˊ tang kuhˊ imˊ koˊ, a ciˊ meuh kop keunhawˊ a vaeeˊ kawnˊ kueˊ peue rap ri ti hk'aˊ cumˊ pun peue yeum naˊ ce? 30 A ciˊ meuh kop keunhawˊ, eˊ vaeeˊ kah ri hkamˊ kuˊ hk'oˊlhatˊ naˊ laleung? 31 Ecˊawngˊ naˊ peˊ, pun uiˊ ri yeum ku seunyi. Mhawngˊ uiˊ ri hk'oˊcuin ri peˊ ri kuˊ Yesuˊ Hkrit Cawoˊ eˊ naˊ yeuh Eun ri peˊ naˊ. 32 Uiˊ saecˊ naˊ klaeeˊ satˊ hk'i nang veng Eˊfeˊsuˊ naˊ, daecti Peucawoˊ Eun lawn unˊ yeuh peue yeum naˊ ce tang kuhˊ imˊ koˊ, a ciˊ kaw kueˊ munˊ keunhawˊ pun uiˊ?

35 Daecti peue ti ri peue naˊ eun cang mhaingˊ, “Peue yeum naˊ eun ciˊ kaw tang cang kuhˊ imˊ yeuh saˊnhawˊ? Yam tang kuhˊ imˊ eun naˊ, jawngkuiˊ tuˊ eun naˊ a ciˊ kaw yeuh saˊnhawˊ?” 36 Peue suisa naˊ mi, kuˊ seumal puinˊ mi naˊ a lawn unˊ nang yeum koˊ, a hkuinˊ kaw cang kaws puc ri. 37 Yam puinˊ mi naˊ, seumal saˊli, aˊkoˊ seumal kuˊ seubu naˊ, hpaw mi caˊ puinˊ kleumˊ ka, puinˊ mi pal seumal ka. 38 Daecti Peucawoˊ Eun tuilˊ kleumˊ ka naˊ hotˊ seunˊ kuˊ tangˊ Eun ri uinˊ naˊ. Eun tuilˊ ruprang kleumˊ ka naˊ hotˊ seunˊ ceu ka kuˊ seumal naˊ. 39 Keune gawmˊeucˊ naˊ a hkuinˊ seunˊ puri. Keune peue naˊ a meuh ri isˊ ti ceu, keune satˊ naˊ a meuh ri isˊ ti ceu, keune simˊ naˊ a meuh ri isˊ ti ceu, keune kaˊ naˊ a meuh ri isˊ ti ceu. 40 Saecˊ meuh jawngkuiˊ tuˊ naˊ a ku kueˊ jawngkuiˊ tuˊ hk'aˊ kuingˊ pang maoˊ maeeˊ jawngkuiˊ tuˊ hk'aˊ bhenˊ keuteˊ naˊ yeut. Daecti munhpungˊ ka jawngkuiˊ tuˊ hk'aˊ kuingˊ pang maoˊ naˊ a meuh ri isˊ ti ceu. Munhpungˊ ka jawngkuiˊ tuˊ hk'aˊ bhenˊ keuteˊ naˊ a meuh ri isˊ ti ceu. 41 Munhpungˊ ka seunyi naˊ a meuh ri isˊ ti ceu. Munhpungˊ ka aˊchiˊ naˊ meuh ri isˊ ti ceu. Munhpungˊ ka seumeuengˊ naˊ a meuh ri isˊ ti ceu. Neumneum ka naˊ koˊ, munhpungˊ ka seumeuengˊ naˊ ti meulˊ hawcˊ ti meulˊ a ku sawngˊ chat puri.

42 Hk'aˊ tang kuhˊ imˊ ce peue naˊ a ku seunˊ awnˊ a yeut. Jawngkuiˊ tuˊ puinˊ ri naˊ a kaw seueumˊ lhuˊjah heulˊ, daecti civit tang kuhˊ imˊ naˊ a kaw imˊ cotˊcu ri. 43 Kuˊ puinˊ ri naˊ a hkuinˊ kueˊ munhpungˊ, daecti kuˊ tang kuhˊ imˊ naˊ a kueˊ munhpungˊ naˊ htonnuk. Kuˊ puinˊ ri naˊ a kawlˊreng kloe, daecti kuˊ tang kuhˊ imˊ naˊ a kawlˊreng keuting. 44 Kuˊ puinˊ ri naˊ a meuh jawngkuiˊ tuˊ, daecti kuˊ tang kuhˊ imˊ naˊ a meuh citˊ.

A lawn kueˊ jawngkuiˊ tuˊ koˊ, a ku kueˊ jawngkuiˊ citˊ yeut. 45 Kop awnˊ na, kueˊ a kuˊ temˊ ri yeuhkiˊ, “Adam la ri meuh peue nanggalˊ naˊ aˊyu imˊ eun.”§ 15:45 Yamla 2:7 Adam ingˊ hotˊ naˊ meuh Eun citˊ, Eun meuh Cawoˊ tuilˊ hk'aˊ aˊyu imˊ. 46 Jawngkuiˊ citˊ naˊ hpaw a caˊ ingˊ nanggalˊ. Jawngkuiˊ tuˊ naˊ ingˊ a nanggalˊ. Jawngkuiˊ citˊ naˊ a kawnˊ ingˊ hotˊ. 47 Peue nanggalˊ naˊ ingˊ eun neum keuteˊ ka bhenˊ keuteˊ naˊ, daecti peue ingˊ hotˊ naˊ Eun lih neum kuingˊ pang maoˊ. 48 Peue ka keuteˊ naˊ eun lawn yeuh saˊnhawˊ koˊ, peue bhenˊ keuteˊ naˊ ce ku yeuhkoˊ yeut. Peue ka kuingˊ pang maoˊ naˊ Eun lawn yeuh saˊnhawˊ koˊ, peue kuingˊ pang maoˊ naˊ ce ku yeuhkoˊ yeut. 49 Seunˊ keutˊ eˊ ri pucti lih eˊ seunˊ ruprang eun peue bhenˊ keuteˊ naˊ eun koˊ, eˊ ku kaw kueˊ ruprang Eun peue kuingˊ pang maoˊ naˊ Eun yeut.

50 Ecˊawngˊ naˊ peˊ, kaw uiˊ lahˊ a ri peˊ yeuhkiˊ, nhamˊ keune naˊ a hkuinˊ kaw cang rap ri ti sinˊ ka kuingˊ Eun Peucawoˊ naˊ. Kuˊ cang seueumˊ heulˊ naˊ a hkuinˊ kaw cang rap ri ti sinˊ ka kuˊ unˊ cang seueumˊ heulˊ naˊ. 51 Leuceng a reuˊ, kaw uiˊ lahˊ leukahˊ vangdohˊ ruiˊ naˊ ri peˊ. Hpaw eˊ caˊ kaw pun ri yeum gawmˊeucˊ, daecti kaw eˊ pun ri leuplohˊ plinˊ ri 52 hk'aˊnaee ti jep ngaiˊ naˊ yam piˊtaeˊraeˊ naˊ sawm a ri puingˊ ri naˊ. Kopti sengˊ ka piˊtaeˊraeˊ naˊ kaw a lawsˊ, peue yeum naˊ ce kaw pun ri tang kuhˊ imˊ hk'aˊnaee kaw ce unˊ laee cang seueumˊ heulˊ naˊ. Eˊ ku kaw pun ri leuplohˊ plinˊ ri yeut. 53 Kopti kuˊ cang seueumˊ heulˊ naˊ a kaw pun ri cuipˊ hk'eung kuˊ unˊ cang seueumˊ heulˊ naˊ. Kuˊ cang yeum naˊ a kaw pun ri cuipˊ hk'eung kuˊ unˊ cang yeum naˊ. 54 Yam kuˊ cang seueumˊ heulˊ naˊ cuipˊ hk'eung a kuˊ unˊ cang seueumˊ heulˊ naˊ maeeˊ yam kuˊ cang yeum naˊ cuipˊ hk'eung ka kuˊ unˊ cang yeum naˊ, leukahˊ temˊ ri uinˊ ri naˊ kaw a meuh neumneum. Aenˊ a meuh, “hk'aˊ pe naˊ gleun a hk'aˊ yeum naˊ.”* 15:54 Iˊsayaˊ 25:8

58 Kop awnˊ na ecˊawngˊ leumeusˊ uiˊ naˊ peˊ, cawng keutawnˊ, pawlaee va ri keuyuihˊ fuiiˊfaiˊ. Saecˊ yamnhawˊ, saeˊcaeeˊ yeuh kanˊ Eun Peucawoˊ naˊ htonnuk reuˊ. Kopti tup yawng peˊ kanˊ kuˊ yeuh peˊ hk'aˊnaee Heun naˊ kaw a unˊ meuh kuˊ hk'oˊhk'awngˊ naˊ.