Ⅰ «Sɩra paan… mɔɔ n'a hɩrɛ awɔɔ m, gʊaa k'a n gasʊ seero bakʊ lɛ nɩ y, an bɔkarɛ an bɔɔra m, an gasʊ, bɩ zaa bɩ, koor m, hɔyɔrɛzaa m sɔ. Ⅱ Bɩ, gʊaa k'a gasʊ bakʊ bɩ lɛ m bɩ, bɩ zaa m seero wɔɔ dundor. Ⅲ Gʊaa k'a nɩ dɔm cɛlɛ ma bɩ n'a gʊm dundor bɩ m, seero wɔɔ n a tʊr ka a leer ma. A n a seero wɔɔ bir deem-deem ŋ tɔ ma, an bɔ ŋ nɩ garga ra. Ⅳ K'a bɔ ŋ nɩ haay, ka an nawʊrɛ ŋ lɛɛ, seero wɔɔ n zu a jɛ ʊ, kʊ ŋ y'a leer dɔ bɩ minto. Ⅴ Ŋ bɩ yɛrɛ, ŋnɩ zu saana jɛ ʊ y. A si ŋ nawʊm, ŋn'a gʊ saana bɩ ma, bala, ŋ n saanarɔ leer dɔ y.»

Ⅵ Yeezuu n *hɔbɔkʊrɛnoom naa do da ŋ nɩ, bɩ ŋ n hɔ kʊ Yeezuu a hɩ bɩ jɩ dɔ y.

Ⅶ Yeezuu n a ya, an a hɩ, a ʊ: «Sɩra paan… mɔɔ n'a hɩrɛ awɔɔ m, mɔɔ m bakʊ bɩ lɛ. Ⅷ Gʊɔɔ kʊ ŋ lɛɛ ka mɔɔ lɛɛ ŋnɩ bʊr lɔ wɔɔ, konno m, hɔyɔrɛzannɔ m sɔ. Bɩ, seero wɔɔ n a tʊr ka ŋ ma y. Ⅸ Mɔɔ m bakʊ bɩ lɛ. Kʊ gʊaa gasʊ mɔɔ m, a bʊmbɔrɛ yɩm. A gasʊrɛ, an bɔ, an bʊr, an hɔbɩrɛ yɩ an a bɩ. Ⅹ Koor bɩr zɛm k'a hɩ bɛɛ a ʊ, k'a koor ba, k'a gər zɛ, k'a hɔ zar y. Bʊr mɔɔ ʊ kʊ gʊɔɔ m mɩsɩrbaa yɩ, kʊ ŋ n'a yɩ an bʊr bɔ.»

Ⅺ «Mɔɔ m dundor mɩŋŋa. Bɩ dundor mɩŋŋa bɩ, a mɩsɩrbaa an n'a kam a seero wɔɔ minto. Ⅻ Gʊaa k'a nɩ zi bam busoo minto bɩ, seero wɔɔ dundor bɛɛ nɩ y, bɩ ŋ zaa bɛɛ sɔ y. K'a tampa yɩ an nɩ zɛrɛ, a si an nawʊrɛ, an n'a gʊm seero wɔɔ ma. Tampa bɩ n a da ŋ bir, ŋn'a hɩsɩga. ⅩⅢ Kʊ gʊaa bɩ, a ka an nawʊm busoo ma bɩ, a leer ba seero wɔɔ mim ma y. ⅩⅣ Dundor mɩŋŋa m mɔɔ m. Mɔɔ m seero wɔɔ dɔ, bɩ mɔɔ seero wɔɔ mɔɔ dɔ sɔ, ⅩⅤ amba mɔɔ Zɩ mɔɔ dɔ, mɔɔ nɩ m Zɩ dɔ bɩ m. Bɩ, m mɩsɩrbaa mɔɔ n'a karɛ m seero wɔɔ minto. ⅩⅥ Seero gɔsɩnnɔ ta ʊ, ŋ ba bakʊ naa do ʊ y, bɩ mɔɔ brɔɔ gaam, m bʊr ŋ nɩ. Ŋ zɛm b'a tʊr ka mɔɔ leer ma. Bɩ, seero bakʊ nyɩntam deem a dundor deem. ⅩⅦ Mɔɔ Zɩ ɩ mɔɔ ŋʊarɛ, bala, mɔɔ yɩ m mɩsɩrbaa karɛ, kʊ m m ya, m b'a si. ⅩⅧ Gʊaa bɛɛ nɩ mɔɔ mɩsɩrbaa bɩ sire y, mɔɔ mɩŋŋa n'a kam. Mɔɔ m da ma, m a ka, mɔɔ m da ma, m a si. Mɔɔ Zɩ ɩ lɛ naa do ka mɔɔ ʊ.»

ⅩⅨ Minno nɔɔn duro a ya, an zɩɩfʊrɔ wɔɔ gʊngʊ kʊ ma. ⅩⅩ Gʊɔɔ gʊta yɩ ŋ barla, ŋn'a hɩrɛ, ŋ ʊ: «Zinə nɩ kan kɩ, hɔɔzaa m, bɔ minto m, a n'a tʊr karɛ a meerbaa ma?» ⅩⅪ Bɩ, gɔsɩnnɔ y'a hɩrɛ, ŋ ʊ: «Gʊaa kʊ zinə n nɩ kan kɩ meerbaarɔ bɛɛ m naa y. Zinə y'a dam ma, an bʊʊ mɩm gʊ ra?»

ⅩⅫ N ɩ Zerizalɛm *Wosocɛ bankarɛ tɔdaanɔʊ cibsa bam. Nyɩnta a ʊ nyɛɛm dɔmɩm. ⅩⅩⅢ Yeezuu nɩ bɩmbɩrm Wosocɛ ʊ b'ʊ Salomɔɔn laŋŋa gʊta kʊ n y'a dɔ jaa m bɩ taa b'ʊ. ⅩⅩⅣ Zɩɩfʊrɔ wɔɔ n bɩ bɩr ma, ŋn'a hɩ m, ŋ ʊ: «Kʊ *Krista n'ɩbɩɩ nɩ, ɩbɩɩ wɔɔ tore ʊ hɔɔndarɛ nɔ ʊ, an ta, an dɔmɩm kara ku? A hɩ wɔɔ m paan…!» ⅩⅩⅤ Yeezuu n a hɩ ŋ nɩ, a ʊ: «Mɔɔ hɩ awɔɔ m, b'awɔɔ n a si y, ziro kʊ mɔɔ n nɩ barɛ m Zɩ tɔ ma rɔ wɔɔ ɩ mɔɔ kasɛtɩ kam. ⅩⅩⅥ Bɩ, mɔɔ y'a hɩrɛ awɔɔ m, b'awɔɔ bɩr a sire y, kʊ mɔɔ seero bɛɛ n'awɔɔ m bɩ minto. ⅩⅩⅦ Mɔɔ seero wɔɔ y'a tʊr kam mɔɔ leer ma, bɩ mɔɔ ŋ dɔ sɔ, ŋn'ɩ zum mɔɔ jɛ ʊ. ⅩⅩⅧ Bɩ mɔɔ *mɩsɩrbaa k'a nyarɛ ba ʊ bɩ karɛ ŋ ʊ. Ŋ bɩ gam fɩɩga y. Bɩ, gʊaa b'a dam ma, an ŋ bɔ mɔɔ wɔ ʊ y. ⅩⅩⅨ Mɔɔ Zɩ k'a ŋ ka mɔɔ ʊ bɩ lɛ da hɔ haay ra, bɩ gʊaa ba ʊ an b'a dam ma, an hɔ bɔ Zɩ bɩ wɔ ʊ y. ⅩⅩⅩ Mɔɔ kan Zɩ bɩ kɩ, wɔɔ deem.»

ⅩⅩⅪ Zɩɩfʊrɔ wɔɔ n a ya, ŋnɩ jaarɔ gʊr k'a gʊngʊɛɛn. ⅩⅩⅫ Yeezuu n a hɩ ŋ nɩ, a ʊ: «Mɔɔ ka awɔɔ m zibəəro mɩŋŋɔɔ kʊ ŋ y'a to Zɩ zi rɔ wɔɔ yɩ. Brɔɔ minto y'a ka, awɔɔ k'a mɔɔ gʊngʊɛɛn ra?» ⅩⅩⅩⅢ Zɩɩfʊrɔ wɔɔ n a nyɩ bɔ ʊ, ŋ ʊ: «Zibəə mɩŋŋa barɛ minto bɛɛ y'a ka, wɔɔ n'ɩbɩɩ gʊngʊɛɛnrɛ y, sʊnsɔ k'ɩbɩɩ wʊ, ɩbɩɩ k'ɩ m gʊaa, ɩ bɔkarɛ, ɩ n'ɩ mɩŋŋa bam Woso bɩ minto m.» ⅩⅩⅩⅣ Yeezuu n a nyɩ bɔ ŋ nʊ, a ʊ: «Ŋ n a gʊrsɩra ba ncɩnaaʊ awɔɔ *lɛrɔ ci bɩ nɔ ʊ ra? ‹Mɔɔ hɩ: wosoro n'awɔɔ m.› ⅩⅩⅩⅤ Wɔɔ dɔ, wɔɔ ʊ, gʊaa b'a dam ma, an hɔ kʊ n y'a gʊrsɩra ba *Wosoci nɔ ʊ bɩ zar y. Woso gʊɔɔ kʊ ŋ y'a lemim ma rɔ wɔɔ bir wosoro. Awɔɔ y'a hɩm gʊaa kʊ Zɩ b'a nyɔɔ bɩ ma, a ʊ, sʊnsɔ ɩbɩɩ n'a wʊrɛ, kʊ mɔɔ hɩ mɔɔ ʊ Woso Nyɩ m mɔɔ m bɩ minto. ⅩⅩⅩⅥ Gʊaa kʊ Zɩ b'a bɔ ʊ, an a nyɔɔ durnya ʊ, b'awɔɔ ʊ, Woso sʊnsɔ an n'a wʊrɛ. Bala, kʊ mɔɔ hɩ mɔɔ ʊ Woso Nyɩ mɔɔ m bɩ minto. ⅩⅩⅩⅦ Kʊ mɔɔ nɩ m Zɩ zi ba, a bɩ sɩra ka mɔɔ ʊ y. ⅩⅩⅩⅧ Bɩ kʊ mɔɔ y'a barɛ, baa k'awɔɔ n sɩra ka mɔɔ ʊ, k'a sɩra ka a zibəə bɩ minto, k'a bɔkarɛ a dɔ mɩŋŋa, a ʊ, Zɩ ɩ kan mɔɔ kɩ, mɔɔ nɩ kan Zɩ kɩ.»

ⅩⅩⅩⅨ Ŋ n a ya, ŋnɩ wuti, ŋn'a ŋʊam k'a nyasʊ. Yeezuu n a yɔ ŋ nɩ.

ⅩⅬ Yeezuu n a wusigə an ta Zʊrdɛn kɔ lɛ ra zeezi, bɩncɛ kʊ Zaan a sɩŋŋɩda ba ʊ, an nɩ *batɛm kaŋ ʊ b'ʊ, an aa gɔɔta b'ʊ. ⅩⅬⅠ Gʊɔɔ gʊta n bʊr zi, ŋn'a hɩrɛ, ŋ ʊ: «Zaan n hoser deem taan… ba y, bɩ hɔ haay k'a hɩ gʊaa naa do minto bɩ, sɩra m.» ⅩⅬⅡ Bɩ, gʊɔɔ gʊta sɩra ka ʊ b'ʊ.