1-2 Farisai ámaana ufa qímarusa faqa Mooseena sándufa akoofásauqa faqa faiqí ánaasee nárana náraree qímasaida nísauku nammári úqidaqa miqí fee maaqí fee qímasaidaqa fífau sándufa óosana óosana quqée maríasa máriqau. Misá Yeerusaree máqusaindari qumurée ani mara Yísuna úqufufaqa níndafoofaqa Yísuna faiqi námu nárana néemariqau sía Farisai ámaana ufa qímarusa nísauku nammári úqirainni káqi née maríqau.

3 Farisái amaana ufa írimarusa faqa Yuda máqannaa aiqámausa faqa nári nínaaku nitaatóosa naanna ráidaqa aiqáma kari nísaaqusaida nárana née maríqau, sía nísaaqusee sía nárana née maríqau. 4 Makéetaki máree marú ainaina nammári uqusée suqásee née maríqau, misá sía minára kaifau miqí qímariqau óosana óosana ainainara miqí qímariqau. Misá káafauqa faqa susufínauqa faqa dísauqa faqa faiqára qáari faqa nísauku faqa miqímasee maaqímasee nammári úquaqee qímarufaqa miqíqa fídaqa ákeekamásaida miqí máriqau.

5-6 Farisái amaana ufa qímarusa faqa Mooseena sándufa akoofásauqa faqa káaqa firaaqóo mináuqara fuki faakí qímarusa márunaki Yísuna faiqi námu sía nísaauqirai káqi nárana noofaqa qáfamasee Yísuna áqiqa qiqau. Náqee fee qifaqee aní faiqi námu maasá qikeekú qikaakú óosana minnísee sía nísaauqirai káqi nárana naída fee qufanoo Yísufa qímanniminoo qínau. Óoqeenaa tamummáqara fasiqa Esaiaafa andeeqásee ínniara tamummaqaséenoo ínniara mandá qaara irirana máree máriasee qinau.

8 Yísufa mi-tamummaqara fasiqána ufa qímannimiseenoo narí maaqí qímasee qímanniminau. Ínnee Ánutuna ufa máfi quqáseeqa faiqí aaquqíra ufamau kai fímariasa máriafanoo.

9 Ínnee ínneeqa káaqa iriqaraasámandee íriranannai ínneeqa faiqí faiqi ufa faiqí ánaasee qímannimianee qímaseeqa Ánutuna ufa maréeqee nínaaqiannai quqáseeqa. 10 Mooseefa Ánutuna ufa qímannimidanoo maaqí qímasee qímanniminau. Ínneeqa nínaukoora asasammándee ámiqida misá núqu uqéeraaqa. Faiqí moó fannoo narí ánoona ákoonara mandá ufa qínnana mi-fasiqána kuqámmarusaaqa. 11-13 Ínnee minára maqee maaqí qímasee áaqee maríafanoo faiqí moó fannoo narí ánoona ákoona dadaaqímarina nímianauree qímasee kafáa óonu máfi irisée sía nímidanoo amaana máqaki quqásee Ánutuna ámidee qímaria fasiqanara sía áaqaida andeeqáidee qímariafanoo. Miqídaqa Ánutuna ufa máfi quqáseeqa ínneeqa ufa kái uqéeree máriafanoo. Dóo ínnee Farisai amaana ufa qímariasa miqíra áaqara ainaina moómoo uqéeree máriafanoo.

14 Yísufa miqí qímaseenoo Farisai ámaana ufa qímarusa niqiséenoo miqóo faiqí ánaasee moómoo márusa kafáa náaramáseenoo ániaqee qufaqa aniroofanoo qímanniminoo qinau. Ínnee aiqámausa qiní ufa irisée ámiqimmasee iriaraasiaqa. 15 Sía moo áinaina fannoo faiqí ánaasee óoki námasainanoo mifá maaqínaki putaammá amaqáannoo faiqí ánaasee naunduráindari úrimari manda ufafa mifá faiqí putaammá nimaqáidanoo. 16 Ínnee náaqoo faqaasá kai náaqoo íriani.

17 Dóo miqóoqari Yísufa narí faiqi námu faqa faiqí ánaasee minínniseenoo máaqaki kéeqafufaqa miná faiqi námu óoruree mi-ufána qímannimunna oosanara iraqau. 18-19 Iroofanoo Yísufa qímanniminau. Ínni írirafa faiqí ánaasee írirafa óorudupirausa máriafanoo. Sía fee ínnee mi-ufa oosanná íri fee sía moo áinaina óoki quqásaananoo aundurái óoqufí marífa sía mifá faiqí putaammá nímaqaannoo, sía aunduráki óoqureenoo ámuqusakifau kéeqaidanoofau sía miqídanoo áranandaki óoqureenoo úmiqaraidanoo. Mi-ufána qunánnai Yísufa aiqáma náranara idaaqíra fee kai qinau.

20 Yísufa minára kafáa narí faiqi námu qímannímidanoo qinau. Faiqí narí naundurákiqari úrimari manda ufafa kai faiqí putaammá nímaqaidanoo. 21-23 Faiqí aunduráki ámuqusa óokiqari mandá írirafa kambíqaidanoo faiqí rarisámeeqeenoo mandáinaina máraranaki quqánnisáidanoo, mifá kai rarisámeeqeenoo áaqaranaki faqa aináina úmmuariranaki faqa faiqí kuqá náriranaki faqa faiqí ánaasee narí úmmuari narí úmmuariranaki faqa moosá aináinara rírana faqa óosana óosana mandóosana faqa nári níkaruqirana faqa nári nifaaqa kooroo írana faqa naríara naríara rairai qírana faqa naríara naríara múnuqi míniqirana faqa narí afaaqa amooqírana faqa fúrufarira óosana faqa mifáuqaindi faiqí naundurákiqari ururée marífa mifáuqa kai faiqí ánaasee putaammá nímaqaidanoo.

24-25 Yísufa mi-maqa maaqána minníseenoo moo máqa maaqa Tiree máqa maaqaki óonureenoo moo máqaki faiqí ánaasee maqee maqee qinée fúnnanai ánunannai ititée maríafaqa sía qíqafaaqee qímasee qumeé íreeda kéeqanau. Sía mifá amana kukéeqaranaki márinau. Ánaasee moó fannoo narí áraamuna aundurái qooqéena fáafasaaqa márufanoo Yísufa ani márunara iriséenoo anirée Yísuna ámuqusa óokiqari dadaaqíranara dadaaqínanoo fíndifuanifeera miná áikuki maqásaa rúmafinau. 26 Mi-anaaseefá Siria máqa maaqakiqari Fooeenisia máqusaki kambíqarafa ánaamuru ánaasee márufa aniréenoo Yísunara qiní qíraamuna aunduráki mári qooqeenaa fáafasaaqa aqiqáinanoo rafúdamaki fúani fee qufanoo Yísufa qímaminoo qinau. 27 Maasá Isaraee máqannaa Ánutuna faiqi námuara foora máriasa misá náaree nárana nímirafa andeeqánoo máridanoo. Faiqiuqáindi nárana marasée fainíuqa áqu níminafa sía andeeqánoo máridanoo fée qufanoo mi-anaaseefá qinau. 28 Óo maa-fasiqa faiqiuqáindi náidaqa átaraasa fainíuqa anirée néemariasa máridaqa. Kúqaa qinée ánaamuru fainíara foora máridaqa átaraasará kai qinée innaaru qídaqa. 29-30 Miqí qufanoo Yísufa qímaminoo qinau anée mi-ufána qíannana ákiaqara dóo aní máaqai fúa. Dóo aní faiqi aunduráindari dóo fáafasaaqa rafúdamaki fínoo qufanoo mi-anaaseefá narí máaqai óonuree qáfoofanoo dóo miná áraamuna qaarísa faiqaqée márufanoo kúqaa fáafasaaqa rafúdamaki fífi̱nau.

31-32 Miqóoqari Yísufa Tiree máqa maaqaki minníseenoo Sidoona máqusai kéeqafi fíqummákufanoo Kariree fárumma áfainni óoqu ranau. Óoqu fídanoo qísaukuqara taikásee máqusa misaqá márusa fínnaaqareenoo fímarufaqa akaqáusa faiqí moó áaqoo aunírana ufa qírara mammáqi marúna áfiqamaree míni Yísufa máruqoo míni quqásee áranaiqi qímamiqau. Anée maa-fasiqánasaa aneenná ásauku mundúsainanoo andeeqáani. 33-34 Miqí qímasoofanoo Yísufa mi-fasiqána maréeqeenoo faiqí ánaasee moómoo márunara iriséenoo káqi átinai quqáseenoo narí ásauku ámuka faiqí áaqoo aamarai upeekáseenoo qáqaara fidiséenoo mi-fasiqána ámaakiri ásaukunnai áuqamáseenoo óori innaarúnai uqéeraseenoo núpi núpi qímaseenoo narí ufakíqari qímaminoo qinau eefafata maasá ufakíqari dóo ruíqaannee qinau. 35 Miqí qímasoofanoo aaqee kái miná áaqoo ititárafa ruqíafufanoo miná ámaakiri rumbárafa idukúfufanoo andeeqásee ufa qinau. 36 Ufa qímasoofanoo Yísufa aiqámausa áranaiqi qímanniminoo qinau, sía maanára moosá qímannimiaqa qinau. Yísufa kafáa kafáa qáoo qímarufaqa misá moó faqa moó faqa qímannímiqa fímariqau. 37 Aiqámausa mi-fasiqána andeeqóonara írufanoo náaquqamasoofaqa maaqí qiqau. Dóo qáfaaqa mifá ámiqimándee idaaqamándee aiqáma ainaina óosana óosana aurirana andeeqáidanoo. Mifá náaqoo auní maríasa faqa andeeqánnisaidanoo ufa sía qiasa faqa ufa qírana nímidanoo.