1 Mi-anaaseesá nári máqannaasa amaana fáasaana Sariríqa adooámáseeqa faiqée dúna kanánaana maasá amaanasáa kanánaana eendái mi-fadameenná marasínna ainaina deedaqamáqoona máreeqa Yísuna ákundoo óonina áamaraki kéeqarara fiqau. 2-5 Óonureeqa qáfoofanoo narí kai óoni firaatiá kooqísaa ititáqoofa quanda quandamméeqee káqinni quqáqoofaqa qáfamaseeqa káqi kéeqafi Yísuna iríara randóosia qáfoofanoo sía márufaqa káqi kikíqiqa máridaqa náqi fee ianáura náqi fee ianáuree qídaqa tautú másee qáfoofanoo qaara fasiqa káaqa aréenee marú qamunna afisíra qánda misá naaqá kambíqafiqa kikíqiqau. Kikíqamáfufaqa níndafeeqa qífu qáfaanoo qímaseeqa nínuka tuqú náumoo amisoofaqa mi-faiqiqandá qímannimiqa qiqau, ínnee nánaree fíndifimari fasiqanara kúqirausakiaqa randáidee. 6-7 Mifá sía maaqóo máridanoo, mifá fíndifinoo dóo mifá fífinoo máridanoo. Mifá óoqai Kariree máqa maaqaki máridanoo ínni qímannimímarufaqa ínnee íriusa sía fee íridee minára randáidee. Mifá maaqí qímasee ínni qímanniminau, qinée faiqí nímaaku qiní maréeqee mandá fasiqa nísaukuki quqéefaranoo. Quqásaifaqa aunírira saqarisaa pirímmannai darusáifanoo qaaramoo faásaana ínanoo Ánutufa qiní uqéera qísaannoo fee qufaqa ínnee sía irusée. 8-9 Miqí qímasee qímannimufaqa misá Yísuna ufara iriséeqa óonurandee maqúsai aniréeqa Yísuna faiqi námu qísaukuqara taikásee qíkunni óoqu moodáa marasée marúsa faqa faiqí ánaasee akaqáusa faqa mi-ainaina óoni áamaraki óonu qáfoonara qímannimiqau. 10-11 Mi-anaaseesá núqu Máriana amaráfa Makadara máqusaindaraafa faqa, Yooannafa faqa Mariana amaráfa moó Yameesana ánoofa faqa akaqáusa mi-ainaináusara Yísuna faiqi námu qímannimufaqa fúrufarufa maasá qímaqimiaafoo qímasee sía ámiqimásee íriqau. 12 Peetooroofa misá úfa iriséenoo fíndimeeqee quqásee sandéenoo óoni aamaraki kummáramáfufanoo mara meerá qáfoofanoo Yísuna irí kukúqu qamunnafa kái minakí márufanoo qáfamaseenoo óonurandee aatáta narí ámaaqai fídanoo mináuqaindiara írinoo finau.

13-14 Mi-faasaannákai Yísuna faiqi námukiqari Yeerusareendari Eemausa máqusai fídaqara Yísuna arusoofanoo sía madikakí márunara narí qímami narí qímami qíqa fiqau. 15-16 Miqí qiqá fídaqa narí qímami narí qímami qímarufanoo Yísufa narí uqanna aniréenoo miqandá faqa fímarufaqa miqandá qáfamasee sía náaqoo írinau. 17-20 Yísufa qímanniminoo qinau, ínneeqara aatáta fídaqa nánaree narí qímami narí qímami qiqá fídee qufaqa miqandá irisée kásoomámbufaqa nóori runúsee moó fannoo Kareeoopasafa Yísuna qímaminoo qinau, maa-eenda ufána Yeerusaree máqusai ufa firaafá kambíqaina anée kai fee sía írinee qufanoo Yísufa qinau, nána ainainee kambíqeenoo fee qufaqa miqandá qiqau Yísuna Nasareetee máqusaindaraana árunara maaqandá qídaqa. Mi-fasiqáfa Ánutuna tamummáqara fasiqa márufaqa Ánutufa faqa faiqí ánaasee faqa miná ufara faqa mifá áuqo̱o ainainara faqa úriqararafa afeeka fée qímarufa márufaqa maasá aanáiqikirausa úriqararausa faqa maasá faiqí firaasá faqa Roomma máqannaara áruaqee qufaqa aunírira saqarisaa pirímmannai áriqau. 21 Mi-fasiqáfa maasá Isaraee máqannaa karaambáiqa Roomma máqannaa nísaukukinaana maasá qumáraaninna fee qídaqa asasímariafannana márufaqa kuqá áriqau, Maqee fáasaanaqari mifá kúquqoo qaaramoókifaqa máridaqa. 22-24 Maasákiqari ánaasee akaqáusa narí ákundoo óoni áamaranai óonu qáfaafanoo sía miná irí mári qáfeeqa nífu pisipasa mándoofaqa qangiroo kái qáfaafanoo qímanniminoo qinoo Yísufa kúqiranaki fíndifinoo qiafaqa maasákiqari akaqáusa óoni aamarai óonu qáfaifanoo ánaasee indée kai ínoo Yísuna kai sía qáfeeqa.

25 Yísufa miqí quná iriséenoo kafáa miqandá maaqí qímasee qímanniminau. Óo fúrufarira qanda máriafanoo Ínnee sía dauní Ánutuna tamummáqara fasiqa ufa íri mariafanoo káaqa ínneeqara anúqi maríafanoo. 26-27 Ánutuna tamummáqara fasiqauqa ásauku mundíranara mi-oosana oosana aupurararána marasée miqóoqari narí aréenaranaki kéeqaannoo fee qímaqoofanoo náqimasee fee sía kambíqarara, kambíqaannoo. Miqí qímaseenoo Yísufa Mooseena sándufa ákarakinaanasaa óosana araséenoo tamummáqara fasiqa aiqáma ákarakinaana naríara ákara rúmaqoonara miqandá qímanniminoo aatáta fímarinau. 28 Miqínoo ufa qínoo fífiufanoo Eemausa máqusa adeedí rámaseenoo Yísufa káqi fínoora foora ufaqá miqandá rafáaqa fídaqa qiqau. 29 Dóo súani kéeqaifanoo asukunaikídanoo anée maasá faqa ani mária qufanoo Yísufa eedóo qímasee misá faqa óonu márinau. 30-31 Miqánda nárana deedaqí isee óoqu márifi naanéerufanoo Yísufa féemu maraséenoo Ánutunara dúfi dúfi qímaseenoo ruqí ruqí máseenoo nímufaqa misá írirafa misá nífu faqa kambíqoofaqa óo Yísufammifoo qufanoo Yísufa dóo miqóoqari taikáfinau. 32 Taikáfufaqa miqandá narí qímami narí qímamiqa qiqau maaqandá aanái áni marúnanoo mifá maaqandá faqa ánidanoo ákarakinaana maaqandá qímaqimímarifanoo maaqandá daundurái idára foora qámafi qimbáfi ímarifaqa maaqandá sía minára íriqau. 33 Miqí qímaseenoo miqandá aaqee quqásee Yeerusareenni kafáa fiqau. 34-35 Óonureeqa miqandá Yísuna faiqi námu qísaukuqara taikásee qíkunni óoqu moodáa marasée marúsa akaqáusa námufaqa moodáaqoo márunaki miqandá óonureeqa miná faiqi námu qímannimiqa qiqau. Dóo karaambáiqa kúqiranakiqari fíndfiinoo Simoonafa dóo qáfeenoo qufaqa miqandá náriqa aanái fí paqúri funára faqa féemu marasée ruqí ruqí mándee nímufanoo nífu faqa náaqoo faqa írunara nári qímannimiqau.

36-37 Miqandá nári qáfoonara qímannimímarufanoo karaambáiqa narí uqanna tautúmánnimaqasee nífusaa kíkiqamambinoo qinau, ínnikina asooárafa máriani qufaqa aiqámausa tautúmándee áfaannee qímasee firaaqóo rufíaqau. 38-39 Yísufa níndafamáseenoo qímanniminau. Náqi fee ifaqée qaara irirafa ínni náaqoosaa rinoo fee qiní qísauku faqa qíku faqa pirímma dáruqoona qáfaaqa qinée qeeqá uqanna máridaqa. Ínnee anirée qiní dúqamásee qáfaaqa qimaqí faqa qímudaani faqa káqi máridanoo áfaanna fannoo sía miqírafa máridanoo. 40-43 Miqí qímasoofaqa firaaqóo asasamásee óo dóo kúqaa narímmifoo qímasee kafáa áfaannasaaqari ani máridanoo fee qímasaida quqásaida rufíee maríqau. Miqí márufanoo Yísufa uqannífiqararee qímaseenoo irámmirinoo qinau ínni nárana moó márinaqa qímifaqa náa qufaqa misá noodáanna áafaqa maréeqee ámufanoo aiqámausa nífusaa qumáree nanau.

44 Námaseenoo maaqí qímasee qímanniminau qinée ínni faqa káqi máridaqa maa-dariránara kúqiranara fíndifiranara qímannimiaafanausa máridaqa. Mooseena sándufa faqa tamummáqara fasiqauqa ufa faqa Dafidina idí ákaraki faqa qiníara ákara rúmaqoo ufafa náqimásee sía kambíqararee dóo miná ánoona kambíqarana qáfaafanoo. 45-47 Miqí qímasee Yísufa misa tamummáqara fasiqa óoqeenaa ákara íriaqeera misá írirana quandáseenoo qímanniminoo qinau maaqímminoo ákara óosana máridanoo, Ánutuna ásauku mundírafa aupúrarana maraséenoo qaaramoo fáasaana márinoo kúqiranakiqari fíndifinoo miqóoqari Yísuna ufa írimariasa faiqí ánaasee fuki faakí qímasee qímannimímarifaqa nári mandáinainara níkooqamáseeqa Ánutufinnai quándaki nári mandáinaina ákiaqara ásauku mundírana áuquara qímamifanoo minnínnisaani, miqíqa ufa qímannimirafa faqa mandáinaina minnísarafa faqa Yeerusaree máqusai óosana araséenoo aiqáma maqa maaqai qímannimirafa dáraanianno. 48 Ínnee qiní qíqoondiuqa mi-ainaináusa qáfee marúsa máriafanoo. 49 Qiní qíkoofa Ánutufa narí maraquna afeeka nímimari maraquna ínni nímiraree qímasoona qeeqá kai óorureeqa niqiqáanaqa qumurée ínni afeekaikámánnimaqáannoo. Ínnee sía Yeerusaree máqusa minnísaaqa maaqóo kai márifanoo náakufinaqa fífainiaqa.

50-51 Yísufa narí faiqi námu faqa narí áqoondiuqa faqa Yeerusaree máqusaindari nífiqeenoo Beetani máqusa amummaqa óonureenoo narí ásaukuqara uqéeraseenoo nifaaqóoqa qímannimaqaidanoo narí faiqi námu minníseenoo uqéerakinoo innaarúnai óoru fínau. 52-53 Miqóo márusa miná qáfamásee Ánutuna amooqímasee quándaki nímuqusaki asasírafa qumbíqafufaqa Yeerusareenni kafáa óonu máridaqa faasaambáasaana náaquqara amaana maqaki kéeqafidaqa Ánutunara dúfi dúfi qímamaqée maríqau.