3
Faíqi ánaasee Ánutuna ufa rukíqoo úfafa.
1 Karaambáiqa Ánutufa aiqáma áandauqakina áuquqoona qámbaanaindári sakáni mifa níkaru qira ufa akoofása márinau. Mifá ánaasee irámirinoo qinau. Kúqaa fee Ánutufa saqáriuqaki aiqáma qáòo qínoo fee sía naaqée qínoo fee.
2 Mi anaaseéfa minára iriséenoo qímaminau. Eeóo aiqáma maa afuqánakinaa sáqari naaqée qifaqá náidaqa. 3 Kadiqa qámbaanai moodáa saqariara sía naaqée sía áuqaaqée qifaqá sía náidaqa. Maasá námaseeqa kúquauranoo.
4 Sakáni miná ufa iriséenoo ánaasee ákaru qínoo qinau. Námasee sía kúqinnara únnaqidanoo, anee sía kúqinnaranoo. 5 Ánutufa minára íridanoo qáoo qinoo. Ínnee mi saqari aqamána námasee Ánutufara foora máridaqa mandá áinainara faqa ámiqira ainainara faqa írifóora.
6 Ánaasee sakáni ufa iriséenoo mi saqarína áfu qáfamasoofanóo ámiqirafa márufanoo aqama faqa qáfoofanóo idaaqírafa márufanoo ámiqira áinainara íriranara faqa mandá áinainara íriranara faqa írufanoo ámiqufanóo mi saqari aqamaná diqíseenoo néenoo narí afaaqi fáqa ámufanoo nanau. 7 Miqandá námasoofanóo mikarí miqandá nífusaa írirafa kambíqoofaqa nári nifaaqa qáfamásee káqisamu máridee qímaseeqa nisaurúseeqa saqári ámanee didíqi ámanee fooqáana qumáree akunúseeqa nári nifaaqasáa ititáqau.
8 Mi faasaanná eenáaníanna asooaá asooaá ímarufanoo Karaambáiqa Ánutufa kadidaí nímarufaqa faiqí faqa ánaasee faqa íriqaqara saqáriuqaki nisaurúsee kukéeqaqau. 9 Karambáiqa Ánutufa faiqí áaramasee anée yáifee qufanóo mifá qinau.
10 Anée kadidaí núanaqa qinée iriséeqa káqisamu máriunausa rufíaseeqa saqáriuqaki kukéeqaidaqa. 11 Miqí qufanóo Ánutufa qinau, yáfee ani káqisamu máriannanara qímaminoo fee. Anée saqári aqama qinée qáòo qúnnana néenanee. 12 Faiqí iriséenoo narí qímaminoo qinau. Maa anaaseefá qiní faqa márifa anée qímunafa mifa qímifaqa néeqa. 13 Miqí qufanóo karaambáiqa Ánutufa mi anaaseená irámirinoo qinau. Anée nánaree maa oosanná máreenanee. Mi anaaseefá iriséenoo qinau. Sakáni fánnoo aniréenoo qiní qíkaru qifaqá néeqa.
Ánutufa mandá áfaaqooqa faiqí faqa ánaasee faqa sakani faqa qímanniminau.
14 Karaambáiqa Ánutufa miná iriséenoo quandáfinoo mi sakanína mandá áfaaqooqa qímamaqeenoo qínau.
Anée maa anaaseená ákaru qíannanara miná ákiiqara aiqáma áandauqakiqari anée kai maa manda afaaqooqána máreennaranoo.
Anée maqámau ámúaqundari nídana kookoomma nanánua.
15 Qinée qíànaqa maa anaaseefa faqa anée faqa naríara naríara fídiaqaa ifáranoo.
Ínniqára faiqinámu náaruara namuqáa márifaranoo.
Mi anaaseená asumu kíqari moodáa fannoo aní ákiiqa radámuannoo. Anée miná asumu kínaana áiku átaa ukaqá áminnaranoo.
16 Ánutufa maaqí qímasee ánaasee afaaqóoqa qínoo qinau.
Anée ámuaquqa faqa márinaqa umaara firaanáikámma ámaqaanaura.
Miqímmaseeqa faiqì máqaraqoo faqa aupúrarana ámianaura. Aní aundurá fánnoo aneenná afaaqiara rída márinnaranoo.
Aní afaaqi fannóo aní úri áaqararafa márinana anée miná uréeqárafa márinnaranoo.
17 Miqí qímaseenoo Ánutufa quandáfinoo faiqi afaaqóoqa qínoo qinau.
Anee aneenná ánaaqa ufa iriséena qinée qáoo qúnna sáqarina qaqama náananoo.
Minára maa maqána áqurarasáanana anée kadáapi rídana árirana rakéeidana maa maqánaki úmmaqusee náida mária.
18 Nimmúru fáqa amuka faqáa áinaina fáqa maqákíqari kambíqaannoo. Anée káasau andanda neennáranoo.
19 Anee tooqaamu árimarinana kadáapirumasaidana maa maqánasaa nárana kambíqasaidana naná fífiinana kúqinana maqáki ani áuquafannanaki finnáranoo.
Aní maqánnai áuquqaafánafa márianafa máriananoo. Anée maqá máriananoo kaifáa maqáikamma finnáranoo.
20 Faiqí fánnoo narí ánaaqara maqásaa qáraa fásiqa ánaasee nínoo fee qímaseenoo áuqu Eewanée qinau. (Mi auqúna óosana aiqáma faiqí faiqì nínoo fée qídanoo.)
21 Karaambáiqa Ánutufa aandáu apata qumáreenoo minánnai qamunnara foorá áuqeeqeennoo Ádamana faqa narí ánaaqa Éewana faqa níminau.
Ánutufa Ádamasa Éewasa kadidakíqari niqiqanau.
22 Miqímmaseenoo Karaambáiqa Anutufa qinau. Maqee faiqí faiqì maafá maasára foora máridaqa áaqara óosanara faqa andeeqára óosanara faqa íridaqa. Maasa sia miqandára qíanaqa náaru márirana nímimari saqari aqamána diqísee neefáranoo. Diqísee námaseeqa náaruara márifoora. 23 Karaambáiqa Ánutufa minára iriséenoo Éedeena kadidakínaana doo miqandá nífaqaseenoo qinau. Ínneeqara ínni áuquafanna máqanasaa máridaqa maqá áuqamásaidaqa nárana paqúriaqa. 24 Ánutufa Eedeenna kadidakíqari Ádamasa Éewasa niqiqoofaqá fufanóo súani óosana qáannai kadida átinni náaru márira sáqari fáinnai fímaru aannásaa angiroouqá quqásoofaqá idá auru árira páipana uaqéeidaqa faiqí minní fifóora rúkí tatáaka ímariqau.