1 Qinée Pauroosa karaambáiqa Yísuna aináini marúnnana ákiaqara Roomma máqannaa karabúsaki máridaqa. Qinée karabúsaki máridaqa ínniara afeekaikámandee qímannimidaqa. Ánutufa ínni náaramásoofaqa ínnee ásauku mundírana saqáriki márú kamuqooqari ínneeqa nírana máriranara andeeqásee márianífee qímasee ínni náarama minakí quqéenoo. Ínneeqa márirafa miná amanakái márianifeera qinée qeeqá qímuqusa óokiqari afeekaikámandee qímannimidaqa.

2 Sía Ánutufa quqáqoo andeeqárana minnísee moomáu fuaqa, ínnee maqee maqee sía úrinaaqaraaqa óorudupimasee máriaqa, sía áanooiaqa, íreedá kai pisoopísoomandee máriaqa sía faiqí ánaaseera qúsa ufa qímasee áanooiaqa kísaaqasaa íreedá kai idaaqammánnimaqaaqa. Ínnee faiqí ánaaseera nímuqusinanoo nídimarinaqa mifá kooroo íanifee qímasee narínni narínni dadaaqífanoo mifá kooroo íani.

3 Ánutuna maraquna fannoo ínni moodáanaki mara quqásaifaqa máriafanoo ínnikina asooárafa ínni moodáanaki afapíta qumáraifaqa máriafanoo ínnee miná moodáanaki márirana ámiqimasee rakísiaqa, rakée íani. 4 Maasá Yísuna ufa írimariasa moodáa nifaaqara foora máridaqa, Ánutuna maraquna faqa moodáa máridanoo Ánutufa moodáa ainainara áfeesiranaki ínni rarisáma quqéenoo. 5-6 Karaambáiqa moodáa kai máridanoo, Yísuna saqárikirafa moodáa kai máridanoo, amaana námmari moodáa Yísuna áuqusaa kai rúmannimaqarafa máridanoo maasá aiqáma maqa maaqakinaasa níkoofa Ánutufa moodáa kai máridanoo, aiqámausa karaambáiqa mifá kai máridanoo mifá narí ufara suqímariasa aiqáma naunduráki máridanoo aiqámausakiaqa aináinidanoo.

7 Ásauku mundírafa nímira dadaaqíra afeeka maasá aiqámausa qíminau narí moómoo dadaaqíranakinaana qíminau. Moo dádaaqira afeeka moo fásiqa áminau, moo dádaaqira áfeeka moo fásiqa anaasee níminau. Nimisoofaqa minánnai Yísuna saiká máraaqeera níminau. 8 Óoqeenáa tamummaqara fasiqa ásauku mundírafa dadaaqíra afeeka qímianínnanara maaqí qímasee ákara rínau.

9 Mi-tamummaqara fasiqána ufa kooroo írafa Yísunara maaqímminoo máridanoo. 10 Mifá narí maqúsai meerái óoru fúnara maaqí qídanoo, mifá náaree meemái maqá ámeemaanai óoqureenoo miqóoqari mifá kai innaarúna maaríni aiqáma innaaruna maarínni óorureenoo narí márirana narí áuqu amana kai márianifeera aiqáma átinai narí írirana narí áuqu amana kái quqásanau.

11 Mifá káqi nímira dadaaqíra afeeka faiqí ánaasee níminau, mi-dadaaqira afeekáfa aináinirana akoofásaikiaqee qímasee akaqáusee niqiqoo fásiqausa akoofásaikirana níminau, akaqáusa faiqí ánaasee qímannimirana akoofásaikirana níminau, akaqáusa aamína máqannaasa qímannirana akoofásaikirana faqa paatóo saika akoofásaikirana faqa ufasáa rakísirana akoofásaikirana faqa níminau. 12 Ánutufa sía fífaufau mi-dadaaqira afeekána níminau, faiqí ánaasee Yísuna ufara suqímariasa Yísuna afaaqara foora afeekaikámasee máriaqeera mi-dadaaqira afeekána óosana óosana maasá qíminoo qinau, ínnee maa-dadaaqira afeekána marasée minánnai qiní ufara suqímariasa afeekaikámannisaaqee qinau. 13 Maasá miqímamaree fídaqa maasá kásooqaqee moodáanaki kianáura. Ánutuna ámaakuara írirana faqaa irirana minásaa rusírana faqa miqíananannai mi-moodaanaki kiráfa amaná kambíqaannoo, mi-karí maasá faiqí firaasá íriranara foora máraanauranoo maraséeqa ásauku mundírana firaa irirana amana kái óoru mundúfuanauranoo. 14 Mi-karí maasá sía faiqi ánaaqiara foora aiqáma óosana óosana amaana ufa iriséeqa múnari mínari ianáura únna ufa qímaria fasiqausa nári níkaruqira finnai akaqáusa áaqaranaki rarisáma quqáidaqa maasá misá ufa iriséeqa sía úfaira foora aiqáma saqari udammí udammíanaura. 15 Maasá sía miqíaqa, maaqíaqa, naríara naríara qimudáoo qímasee rídaqa minakí máridaqa naríara naríara sía únnufa qiaqa, ánoona ufa kai qídaqa maasá miqíanannái faiqi ánaaqiara foora ásauku mundírana maasá qíkiaqa amanakái innooqámaree óoru mundúfuanaura.

16 Ásauku mundírafa narí ufa ámeemaanai máriasa rakísimarifaqa misá minára maasá qíkiaqa fee qídaqa. Faiqí afaaqa sía moodáa ainaina máridanoo óosana óosana afaaqa áti fannoo áadu áadu ainaina akoofásaikirana moodáanaki ootúpamáfifanoo moodáa fasiqa máridanoo. Ásauku mundírafa maasá qíkiaqa márifa maasá rakísimarifaqa maasá faqa miqí kai íqa faiqí afaaqa fooqáana áadu áadu akoofásaikirausa moodáanaki ootúpanoo márifaqa maasá qíkiaqa Yísunasaa atooáqa máridaqa miná afaaqáikiqa máridaqa. Maasáki aiqámausa náadu náadu náriqa saikírana andeeqásee máridaqa sía naríara naríara níkooqaani naríara naríara rínnanannai moodáanaki innooqáfinoo ámiqimmandee kambíqafi fúannoo.

17 Miqí maríanara qinée Pauroosa Karaambáiqa áuqusaa ínni qímannimidaqa afeekaikámandee kafáa kafáa qímannimidaqa, sía Ánutunara aamína máqannaasa naanna raaqa. Misá írirafa fífau faafaumminoo máridanoo. Ínnee andeeqásee máriaqa. 18 Misá nitikúrakinaa írirafa asukunakí máridanoo Ánutufa nímimari márirana sía misá káqikaaqoo máraidaqa ánaamuruara foora sía máraidaqa, misá káaqa írirana síaisa fúrufari maríasa nári qímaqaamáu kai fímariasa, minára kai asukunakí máridaqa. 19 Misá nisaurírana taikárausa máridaqa nári nifaaqa márirana mandóosanai kai ubeekáidaqa óosana óosana nisaurímaria ainainna sía nisaurídaqa fanandídaqa káqi umáraidaqa.

20-21 Ínnee Eefeesusa máqannaasa miqíra mandóosana sía ásauku mundírana sáaqaraana íriafanoo, ínnee minára irisée Yísuna áiku ásauku kambíqafufaqa andeeqára írirana faqaasa ínni miná ánoona ufa ínni qímannimiafaqa írimariafanoo. 22 Minára ínnee ínneeqa óoqeenáa márirana nírana fatíka áqusaaqa ínni óoqeenáa márirafa ínniqa maréeqeenoo ínniqa mandá nikaruqira nidiranaki quqásoofaqa miqóo ínnee ínneeqá kái kurídimariafanoo. 23 Ínni nímuqusaki mandá nidira nidimarina faqa nitikúra mandírira írimariana faqa taikásee innaarúnaindaraana fúka ámiqirafa kai máriani. 24 Ínni innaarúnaindaraa fúka márirafa Ánutuna narí miqírafa máridanoo, miná ánoona ufakí andeeqásee márirana faqa Ánutuna ufa ámeemaanai márirana faqa miná amooqírana faqa mi-fuka mariráfa ánoona máridanoo, ínnee mi-marirána kai qamunnará foora afisúsee minakí máraqa nuaqa.

25 Dóo minára maaqóoqari sía únna ufa kafáa máriani, taikáani, aiqáma narínni narínni ánoona ufa kai narí qímami narí qímami qiaqa, maasá aiqámausa moodáa nifaaqara foorá kai márunnanara naríndi naríndi márunnanara únna ufa sía qiaqa ánoona ufa kai qiaqa.

26-27 Aní áanooirafa kambíqafinoo sía aní rarisámeeqee mandáinainaki quqáani, anée áanoo qínana dóo mi-faasaanásaa mi-suanína kéeqarana námufaqa taikáseena faiqáa sía kísaaqasaa áanooida mária, dauní taikáa, Sadannafa minakí kéekafinoo mandáinaina uqéeraandoora.

28 Aináina úmmuari mari fasiqafa úmmuarirana taikáani, taikásee quándaki andeeqásee narí aináinamasee narí nárana námasee kudi fasiqauqa faqa náida níminaqa naaqa.

29 Sía putaa ainaina áfunda ainainara ufa qiaqa, faiqí ánaasee poodúqamánnimaqaida dadaaqímaria ufana kai qímasaifaqa misá iriséeqa ámiqirana adíafaairana máreefaranoo.

30 Mandá ufa qínanoo Ánutuna náaquqara maraquna fannoo iriséenoo ákooqaanoo. Ánutuna máraquna fannoo ínni faqa márifa Ánutuna ákarara foora naríndi fée qídanoo ínniki ákara rínoo máridanoo. Mi-maraquna akaráfa maaqí qímasee ínniara qíma afeekaikídanoo kásooqaqee Ánutufa qínanoo Yísufa qumurée ínniara qiníndi fee qímasee máraannoo.

31 Dóo maqee áukuana aiqáma sukáqara ufa faqa qúsufa qímasee dárara qírafa faqa naunduráki mari aanooirafa faqa fatíka áquaqa. Naríara naríara firaa kari naméera ufasáa níqimariafa faqa áquraree maríannana faqa sía kafáa máriani naundurákinaa naríara naríara fídiaqaa íra írirafa faqa taikáani.

32 Sía miqíaqa, maaqíaqa, naríara naríara íreedá kai nímuqusa reendeénirafa faqa dadaaqírafa faqa máriani, narínni narínni mandáinaina minnísaaqa. Maasá óosana óosana ainainannái Ánutuna mandáikammamaqáafanausa márifanoo Ánutufa ásauku mundíranannai maasá dárirana minníqisanau. Dóo ínnee minára iriséeqa miná amana kai dóo ínniqa niqoónausa mandáikamánnimaqarana narí minnísee narí minnísee iaqa.