1-2 Qinée Pauroosa sía Yuda máqannaara qídaqa ínnee ánaamuru máriasara qídaqa, óoqai ínniqa ufa rukíarana faqa áaqarana faqa miqíunna ákiaqara kúqiranaki máriusa máriqau, mi-aukuanná maa-maqa maaqána mandóosanamau kai fímariqau. Ánutuna ufa rukíee maríasa maqee rakísi marí afaannafa Ánutuna innaarúna meerái márifanoo miná ámeemaanai márina, miná ufara eedóo kai qímarusa máriqau. 3 Maasá faqa aiqámausa ánaamuru Ánutuna ufa rukíee maríasa naanna rámasee maasá qeeqá faiqí faiqi mandíriranamau fídaqa qeeqá qifaaqa írirana áfaariqa káqi qeeqá mandá didiramau kai fiqíafana. Maasá Yuda máqannaasa ánaamuru naanna rámasee qeeqá qifaaqa áfaaramasee miná ákiaqara Ánutuna áranaqaranaki fíraridaqa.

4-5 Ánutufa miná qáfamaseenoo maasára ámuqusirana faqa nífauarafa faqa firaatiá márifanoo ásauku mundírana sáimbaqa maasá faqa kúqiranakinaana uqéera qiseenoo sía moo áinaina, Ánutuna áfaarirafá kai innaarúna asumu máriranaki quqánniseenoo. 6 Ánutufa maasá ásauku mundírana Yísunasaa atooárana qáfamaseenoo miná namufaqa kúqiranakinaana uqéeraqiseenoo Yísuna namufaqa Ánutuna innaarúna máriasasaa rakísi nímaqaaqee qifaqa miqóo rakísirausaikiqa márianaura. 7 Sía Ánutufa fífau miqínau, narí firaa afaarirana faqa, maasá ásauku mundírana Yísunaki kéeqarana qáfamaseenoo narí firaa aidirana ámuqusirana faqa náaru kambíqainausa uqannífiqarara miqínau. 8 Sía moo áinainannai Ánutufa narí áfaariranannai kai ínni innaarúnai asumu máriranaki quqánnisaidanoo, ínnee Yísuna saqárikiranannai áfaaramma nímaqaidanoo. Ínni asumu nímirafa sía ínnee andeeqásee fímarianasaafau mundídanoofau, sía ínnee ámiqira óosana marasáida kadáapiridee qímarianasáafau mundídanoofau, Ánutuna káqi nímiranasaa kai innaarúnai asumu márirana maasá qímirana uqéereenoo.

9 Sía maasá qeeqá kadáapiriranannai innaarúna ásumu máraanaura minára sía fífau maasá qeeqá qimooqíra ufa máriannoo. 10 Ánutufa maasá áuqufa máridanoo sía fífau maasá áuqinau, maasá ásauku mundírana Yísunasaa atooqáranasaaqari andeeqásee nírana márirana máriaqee qímasee maasá áuqinau. Dóo óoqai mi-andeeqara nirana marirána maasára deedaqammáqoofa máridanoo.

11 Yuda máqannaasa óoqaindari náriaráa kai Yuda máqannaasa fáinánduqirausa Ánutunaindi máridee qímasaida ínni ánaamuruara sía maasá fáinánduqirausa márunnanara áqoosai máriasa máridee qímariqau. Misá fífau nári fáinánduqiranara qídaqa miqí qímariqau. Ínnee ánaamuru máriasa ínnee óoqai máriunara íriaqa. 12 Ínnee Eefeesusa máqusanaasa ásauku mundíranasaaqari náaduma níanasaa máriusa máriafanoo, ínnee ánaamuru Ánutufa maqásaaqaraasaki sía rusandeesámumándee naríara mároosa máriafanoo, ánaamuru níanasaa máriusa máriafanoo. Ánutufa Yuda máqannaasa faqa moodáanakikira ufa óosana óosana qíma afeekaikíranasaa mundíqa máriusa máriafaqa ínnee ánaamuru sía minakí márusa náaduma níanasaa márusa máriafanoo. Ínnee Eefeesusa máqusanaasa maa-maqa maaqánaki máridaqa sía Ánutunara faqa moo áinainara faqa írimariqau káqi fúrufara káimmiqániqau, Ánutuna síaisa máriqau.

13 Dóo maqee ínnee ásauku mundírana Yísunasaa atooqáana ákiaqara ínni óoqaindari níanai máriusa maqee Ánutufa ínni rarisámeeqeenoo adeedí quqéenoo, ásauku mundírafa aunírira saqarisaa kúqunannai kai miqínoo. 14 Ánaamuru faqa Yuda máqannaasa faqa namuqáara foora níana niana rakée íqa máriaasa ásauku mundírafa narí kai maréeqee moodáanaki quqáseenoo asooárana maasá qíminau. Yuda máqannaasa faqa ánaamuru faqa namuqáakiqa márufanoo qámbaana faandamura ititánoo máruna ásauku mundírafa narí afaaqannái faandaamura rakée mándoofaqa moodáanaki kiqau. 15 Mooseena sándufakina óosanóosana ainainara nímaarusirana mifá faandaamurara foorá Yuda máqannaasa faqa ánaamuru faqa aiqámaqara rakéemaqoofaqa máriqau. Ásauku mundírafa dóo miná ruká taikásoofaqa mi-atiqandá óonu máree ani máree ásauku mundírana faqa moodáanaki kíqa asooáranaki máridaqa.

16 Ásauku mundírafa narí aunírira saqarisaa kúqunannai Yuda máqannaa faqa ánaamuru faqa naríara naríara fídiaqaa ímaruna áru taikánau, narí aunírira saqarisaa kúqunannai Yuda máqannaa faqa ánaamuru faqa rákimaruna taikáseenoo Yísufa maréeqeenoo máfi moodáanaki quqáseenoo maréeqeenoo Ánutuna áanóoqirana taikáseenoo narí ákoona Ánutunaki asooáranaki quqánau. 17 Miqí marúnara ásauku mundírafa narí ámiqira asooara fasaasa ufa máree qumuréenoo ínnee Ánutunasaaqari níanai mária anaamurúsa faqa Yuda máqannaa Ánutuna aaqá máriasa faqa qímanniminau. 18 Maasá aiqámaqara Yuda máqannaa faqa ánaamuru faqa ásauku mundíranannai kai amaná maasá moodáa maraqunaki aniréeqa maasá qíkoona Ánutuna áfusaa kikíqianaura.

19 Óoqai ínnee moo máqannaara foora ánaamuruara foora máriasa máriafanoo dóo maqee sía miqíqa máriafanoo ínnee dóo maqee Ánutuna áiku ásauku máriasa Yuda máqannaasaki moodáa máqannaa kámmambi ínnee máriafanoo. 20 Dóo maqee sía Yuda máqannaa kai, ínnee faqa máaqara foora usakáfifanoo ásauku mundírafa Yísufa narí uqanna faakána miqírafa márinanoo Yísufa niqiqoo fásiqausa faqa Ánutuna tamummáqara fasiqauqa faqa máaqa atunara foora márifanoo ínnee faqa máaqa ásaanara foora misásaa faqa Yísunasaa faqa atukaramámbiqa máriafanoo. 21 Yísufa uqanna faakánara foora máridanoo aiqáma máaqa ásaana afapíta qumárasaifaqa afeekaíkiqa máriafanoo karaambáiqa náaquqara amaana máqara foora usakáidanoo fímaree áimaree innooqáidanoo. 22 Ínnee ánaamuru ásauku mundírana saqáriki máriasa faqa aiqámausa Yísunaki máriasa faqa Ánutufa ínni qumáreeqeenoo máaqara foora usakáseenoo narí maraqunannái mi-maqánaki ínniki mári maqafa máridanoo.