1 Óo qiní qiqoondi sía anée akaqáusara áaqeeaafoo qínana anée faqa mi-aaqarána máree márianafa máriananoo. Anée faqa náqimásee Ánutuna árirana eeráirinnaree, Anée akaqáusara miqínana anée faqa mi-manda oosanná kai máree máriananoo anínna qáoo qíra ufa fannoo anínna áruannoo. 2 Faiqí ánaasee mi-manda oosanná máree márifanoo Ánutufa kai misára nárira ufa qíannoo. Ánutufa sía áaqaidanoo andeeqáidanoo misá nárira ufa ámeemaanai quqánnisáannoo. 3 Qiní qiqoondi anée sía amana akaqáusara qáoo qinnáranoo, anée qáoo qídee qídana aneenná faqa minakí fímarianafa máriananoo. Anée miqí máriannanara náqimandeenee Ánutuna áriranara eeráirinnaree, sía amana eeráirinnaranoo. 4 Ínniara Ánutufa aneenná mandáinainakiqari mifínnai ubeekeefándinnanara reendeenámasee rakísidanoo máridanoo. Ínnee minára Ánutufa reendeénira oosana márainara ínnee minára fúrufarira oosana fee fée qímaseeqee káqi mi-mandoosannáki márida fee. Ánutufa ínniara reendeénira oosana fannoo sía fúrufarira oosanafau máridanoofau. Ínneeqa mandáinaina minnísee quándaki narínnai ubeekaaqée qímari oosanafa máridanoo ínnee sía fee minára íridaqee.

5 Ínni náaqooki óoni ititánoo márifaqara foora sía ufa írimariafanoo. Miqíanara Ánutuna andeeqára ufa faqa mandáinaina ákiaqara nárira ufa faqa kooroo ínna fáasaana mi-karí ínniqa mandáinaina fannoo ínniqa nárira ufa firaaqóo úriqaramáfuannoo. 6 Mi-faasaanná Ánutufa aiqáma fasiqa ánaasee nári máree mariana akiaqara kai nímiannoo. 7-8 Akaqá fasiqa ánaasee ámiqira oosana kai máraqa nídaqa innaarúnai aréenarana faqa innaarúnai núqu uqéerarana faqa náaru náaru máriranara faqa randáidaqa. Miqí máriasa Ánutufa náaru márirana nímiannoo. Akaqáusa nári nifaaqara kai rídaqa andeeqárana futeeqáidaqa áaqaranaki kai fídaqa. Misásaa Ánutufa narí áanoo qirana faqa narí áranaqarana faqa nammáriara foora adíannimaqáannoo. 9-10 Nídafirana faqa aupúranara faqa Ánutufa aiqáma mandóosana máree maríasa misá nímiannoo. Yuda máqannaasa naaree nimiséenoo ínnaaqiana ánaamuruqa nímiannoo. Ánutufa miqí kai ínoo aiqáma andeeqara oosana máree maríasa nimooqírana faqa núqu uqéerarana faqa nímuqusaki asooárana faqa nímiannoo. Yuda máqannaasa náaree nimisée ínnaaqianna ánaamuru máriasa nímiannoo. 11 Miqímasee Ánutufa aiqáma máqannaara amana amana kái nári máree maríana ákiaqara nímimarifa máridanoo nímiannoo.

12 Ánutufa narí sándufa Mooseena qímamufanoo mifá quandásee Yuda máqannaasa qímannimisoofaqa misá mi-sandufána qumárasee márusa máridaqa, misá mandóosana máraifanoo Ánutufa Mooseena sándufannai misá qumáree náruannoo. Ánaamuru máriasa Ánutufa Mooseena ámu sanda úfana sía miná ameemaanai máridaqa káqinni máridaqa, misá mandáinaina oosanara minní káqinni márinannai náruannoo. 13 Sía Mooseena sándufa náaqoonnai írimariana sía mináu Ánutufa naráfusaa andeeqáranaki faiqí ánaasee quqáidanoofau, mi-sandufána marasée ímariana andeeqásee áuqee márianannai kai Ánutufa narí andeeqáranaki quqánnisáannoo.

14-15 Misá Yuda máqannaasa Mooseena sándufa máree maríasa máridaqa ánaamuru máriasa Mooseena sándufa síaisa máriasa máridaqa misá nári íriranannai Mooseena sándufara sía írirai káqi mi-maú fídaqa, dóo Ánutuna ufamáu fímariasa máridaqa. Mi-oosanáfa Ánutuna sándufa naunduráki ákara rinoo márifaqara foora kooroo ífaqa miqídaqa. Ánaamuru máriasa Ánutuna ufa sía írimariasa náriqá kai moo óosanara mandá oosanee qímasee moo óosanara ámiqira oosanee qímasee qímariafa mifá kai Ánutuna sándufa óoqai kukéeqasee quqáqoofa naundurákiqari kooroo ídanoo. 16 Kásooqaqee ánianínna faasaana Ánutufa narí ásauku mundírana Yísunannai faiqí ánaasee aiqáma naunduráki kukéeqarana kooroomáseenoo rainánnimaqaannoo, Qinée Pauroosa Ánutuna ámiqira fasaasufa faiqí ánaasee qímannimiqa nídaqa minára qímannimidaqa.

17-20 Ínnee Yuda máqannaara qídaqa anée Yuda máqannaa máriananoo anée Mooseena sándufa saqáriki márianafa máriananoo, anée Ánutunara fífau íridee qímasee firaaqóo ufa qídana aneenná áuqu uqéeree márianafa máriananoo, anée Ánutuna andeeqára aanara írimarianafa máriananoo. Anée Mooseena sándufakinaana ámiqira aanara faqa mandá aanara faqa rainásee írimarianafa máriananoo, anée aneennára nífu dimbárausa aana uqannífiqee marúnausee qímarianafa máriananoo anée aneennára asukunakí máriasa misá qóoma máridee qímarianafa máriananoo, anée aneennára fúrufarirausa írirana nímimarunausa qímarianafa máriananoo faiqiuqáindi ámiqira aana uqannífiqee marúnausee qímarianafa máriananoo. Anée Mooseena sándufa minakíqari aiqáma írirana faqa ánoona ufara faqa qinée írida fee qímarianafa máriananoo.

21 Dóo qinée aníara qianáura, anée uqannífiqee márianafa máriananoo, nánaree sía aneennára faqa miná máreenee. Anée misára sía úmmuariaqee qímaseenana dóo aneenná úmmuari márianafa máriananoo.

22 Anée misára sía faiqí ánaasee narí úmmuari narí úmmuari iaqée qídana, anée faqa sía fee úmmuaridanee. Óoninnai saqárinnai únna qíra Ánutunara foora miná amana áuqimarianara fídiaqaa ímariananoo fee anée fee mi-unnaqira anutúna amaana máqakina kéeqafida minakínaa ámiqira ainainara fífau ainainee qímaseenanee káqi máraidanee.

23 Anée aneennára Ánutuna sándufa qumáree marúnausee qídana aneenná áuqu firaaqóo uqéeree marínafa, anéefée Ánutuna ufa rukíaseenanee asaurírana ámidanee. 24 Óoqeenaa tamummaqarausa ákarakina ínniara maaqí qídanoo. Ánaamuru ínni Yuda máqannaa mandóosana qáfamasee quándaki Ánutunara mandá ufa qídaqa.

25 Ínnee Yuda máqannaasa ínneeqára fáinanduqirausee qídaqa miqíanara Ánutuna faiqi námufee qímariafanoo. Qinée Pauroosa minára maa-ufána qídaqa. Ínnee miqí maríasa Mooseena sándufamau ámiqimandee fídaqa ínni fáinanduqirafa ámiqira ainaina máriannoo, miná ufa rukíaseeqa fífau nipata aukírafa, sía Ánutuna faiqi námu máriafanoo aamína ánaamuara foora márifaranoo. 26 Aamína ánaamuru máriasa sía Yuda máqannaasa fáinanduqimarusa misá nári kai sía irirai Mooseena sándufamau andeeqáramau fímarifanoo Ánutufa miná qáfamaseenoo Yuda máqannaara foora máriaafoo qíannoo.

27 Ánaamuru máriasa sía Yuda máqannaasa fáinanduqimarusa misá andeeqáseeqa Ánutuna ufamáu fífaqa ínnee Yuda máqannaa fáinanduqímarusa Mooseena sándufa ínni ufakíqari ákara rirana rukíasaifanoo ánaamuru aamína máqannaa nári andeeqárafa ínni Yuda máqannaasa máriranara mandáinainee qíannoo. 28 Yáfee Yuda máqannaa uqanna Ánutuna áiku ásauku uqanna máridanoo fee, apatasáa kooroo írafa mifée ánoona máridanoo fee. Ánutuna ufamáu fímariasa mi fee ánoona máridanoo fee. 29 Sía apatasáafau ánoona máridanoo naundurá nímuqusakiqari Ánutuna ufamáu fímariasa misá ánoona máridanoo fáinanduqirausara foora máridaqa. Sía Mooseena sándufa írirana írirafa mifáu Ánutuna áiku ásauku kámannimaqaidanoofau. Ánutuna maraquna naundurái saíkisa misá kai Yuda máqannaa uqannára foora Ánutuna áiku ásauku máridaqa. Miqífandinna fasiqausa sía faiqí nimooqíranafau máraidau, Ánutuna amooqíranara rídaqa randásee máraidaqa.