15
Maa-maqáfa taikáinna aukuana dínni ani qaara marasée qangiroo aupúrarana máree ánifara.
1 Qinée innaarúnai máriafana moó ínnaarúnai koorooíra ainaina náaquqara ainaina kambiqóo qáfaqiafana maaqímasee kambíqanau. Qísauku dínni taikásee dínni ani qaara marasée qangiroo námu nári nísaukuki Ánutuna taikáranaki aupúrarana úqirausa ániqau. Mi-aupurarána maqásaaqaraasa Ánutuna ufa sía írimariasa nimisáifanoo Ánutuna áranaqarafa taikáannoo.
2 Qinée miná qáfamasee quándaki ooruku námmariara foora tánuka minásaa máridanoora foora idáuru námufaqa márufaqa qáfaqiafana. Miqóo ooruku nammári áfaisaa faiqí ánaasee moómoo Ánutuna ufa írimarusa úsimariqau. Misá káasau aandau ákarara qáoo qímarusa misá káasau aandau faqa miná amana áuqirana faqa rákiara foora miná úriqararausa máriqau. Ánutufa misá piripúnna nímufaqa misá 3 Ánutuna aináinira faiqi Mooseena faqa sipsípa ánaaqi kúqufa faqa miqandá idí rée maríqau. Maaqí qímasee idí raqau.
Óo Karaambáiqa aiqáma afeekafaqáa Ánutufa,
Anée aiqámausa rakísi maríanna óosanafa faqa anée ímarianna oosana faqa idaaqírafa firaafá máridanoo.
Anée aiqáma máqusanaasa Karaambáiqa márianafa,
Anée níniunafa andeeqárafa kúqaa márunafa márianafa.
4 Óo Karaambáiqa yáfasiqa fee sía aníara rufíaidanoo.
Yáfasiqa fee aní úriqararana sía koorooíannoo,
Aneennáraa kai náaquqarafa máriananoo.
Aní andeeqára ainainirafa aiqámausa qáfamasee minára aiqáma máqannaa anirée aní óorisaa aniree aní amooqifáranoo.
5 Misá mi-idína rámasoofaqa qinée Yoohaneesa qáfaafananoo Ánutuna amaana máqa innaarúnai atúasoofaqa qáfaafananoo minakí óoqai Mooseefa Ánutuna úiqaana maqa usakáqoofa miná aundurái márufaqa qinée qáfaqiafana. 6 Dínni taikásee dínni ani qaara marasée qangiroouqa Ánutufa faiqí ánaasee nímianinna aupurarana úqirausa fáasai níndafaafanausa misá Ánutuna náaquqara amaana máqakiqari ráudaqau. Misá qamunna ánukarafa éekara árirafa márinau. Misá kóora áuqira ráitanda náamma ámeemaanai rumbárausa animáriqau. 7 Ani márufanoo Ánutuna aaqá aandáu̱ qaara faqa qaara faqa márunakiqari moó fannoo kóora áuqimaru qafeesa dínni taikásee dínni ani qaaraqánda marasée qafeesa náaru náaru márira Ánutuna áanooqirafa qumbiqára qafeeuqa aiqáma qangiroouqa nísaukuki moodáa moodáa quqásanau. 8 Quqásoofanoo innaarúnai amaana máqa idámuna qumbiqánau. Ánutuna afeeka faqa Ánutuna aréenarana faqa minásaaqari idámuna fannoo mi-amaana maqánaki qumbiqánau, sía kéeqarana amaná márinau. Nísauku dínni taikásee dínni ani qaara marasée qangiroo misá aupúrarana taikásoofanoo miqóo kai amaná kéeqaaqaainau.