1 Yísufa maa-ufána óosana óosana qímannimi taikáseenoo maaqí qímasee narí faiqinámu qímanniminau. 2 Qaara faasaana taikáinanoo maasá Yeerusaree máqusai óoruree áinnaaqarara qóomaqa sakasée naanáura. Ánutufa maasá qifaqnáusa qikeekú qikaakú Isipa máqa máaqai márufanoo sía nárinau áinnaaqaramásee Isipa máqannaasa kai nárinau. Minára maasá Yeerusaree máqusai óoruree áfaarurumánaanaura. Miqóo faiqí moó fannoo qiní uqeeqáinaqa aunírira saqarisaa pirímmannoo qiní dárifaranoo. 3 Yísufa mi-ufána narí faiqi námu qímannimímarufaqa amaana máqasaa rakísimarusa faqa Yuda máqannaa faiqí firaasá faqa moo átinai Kaiafasána máaqaki ufa súqidaqa Yísuna árira ufa súqidaqa qímmiriqau. 4 Íreeda qumeé kai Yísuna qumáree áriraree qímmirimariqau. 5 Maaqóo Yeerusaree máqusai áinnaaqara qóomaqa suqá néemarinnana qámbaana sía Yísuna qumáraanaura. Faiqí ánaasee moómoo súqiqa máriasa qíqafamáseeqa ufa firaaná qídaqa tutu qifoora.

6 Mi-karí Yísufa Beetani máqusai Simoona amaráfa károora árimarufanoo Yísufa taikái̱soona miná faqa náidanoo miná máaqaki márinau. 7 Máridanoo Yísufa misáuqa faqa nárana néemarufanoo ánaasee moó fannoo mifá máru máqanaki kéeqafinoo firaa munnimma áqimaru fadameena idaaqíra taqukinaana ámiqira áfundimaruna Yísufa nárana née marufanoo ákiaqa ámoondunna kaqi adíamaqanau. 8 Yísuna faiqi námu miná qáfeeqa tautúfanoo níranaqoofaqa qiqau. Maa-fifau faafau ira anaaseefá náqi fee ifanee fífaunni rairaaínanee. 9 Náqi fee ifanee munnimma fáinausa nimiséenana miná ákiaqara firaa munnimma maraséenana kudi fasiqa anaaseeuqa nímiaqaana. 10 Yísufa misá ufa iriséenoo quandáfinoo narí faiqi námu qáoo qímannimaqaidanoo qinau. Nánaree mi-anaaseenára qáoo qída fee. Qifaaqa idaaqa uqannámmáqimaqaanifeera adíaqimaqeenoo. 11 Ínniki kudi fasiqa anaaseeuqa náaru náaru márifandia. Ínnee amaná moómoo kari misá ámiqi ámiqifaranoo qinée sía kísaaqasaa ínniki márianaura, káqikaa qóo fuanáura minára mifá qiní adíaqimaqeenoo. 12 Qiní qifaaqa madikakí fúaninnanara minára mifá maasá faiqí kúqirana oosana máreenoo qiní qifaaqa kúquaninnanara deedaqídanoo fadaméena adíaqimaqeenoo. 13 Mi-anaaseenára Yísufa kaifáa qímanniminau. Náaru náaru maqúsa maqúsa máaqa máaqa máa̱ qinée márunna kamuqooqaraa ufa, ámiqira ufa, faiqí ánaasee qímannimidaqa maa-anaaseenára fadaméena adíaqimaqóona sía aunífara miná faqa qímannimifaranoo. Minára faqa qímannimidaqa sía faafaa qiaqa, sía qáoo qiaqa.

14 Yudasi Keerioota máqusaindaraafa, Yísuna faiqi námuki márufa, mi-fasannái amaana máqasaa rakísi márusunnai óorureenoo irámmirinoo qinau. 15 Ínnee náqi fee mándee feefaurú qímifaqee Yísunara ueeqáanauree. Irámmirisoofaqa misá óoni ámiqau. Moodáa fasiqa áiku ásauku taikásee moo fásiqa ásaukuqara taikásee miqí mándee óoni ámiqau. 16 Miqóoqari faasaambáasaana Yudasifa Yísuna qumeé misá nísaukuki quqáanifeera apurée márinau. Fíqu fáiqu fídanoo apuranóo nímarinau.

17 Yuda máqannaasa misá aiqáma Yeerusaree máqusai súqumaree Ánutuna qangiroo misá nikeekú nikaakú áinnaaqarara qóomaqa áfaarurumasaida qaaramoó fáasaana mi-feemúna néemariqau. Ooruku síai feemuara fooqáana néemariqau. Mi-indaaru faasaanná Yísuna faiqi námu Yísufuqoo aniréeqa irámmiriqau. Yá maqanaki fee maasá Ánutuna qangiroo áinaaqaróo áfaarurira náranna ooruku síai feemu suqáanauree.

18 Yísufa iriséenoo qímanniminau. Ínnee Yeerusaree máqusai óorureeqa muqútinai moo fásiqa óonu paqúrimásee maaqí qímasee qímamiaqa. Ufasaa rakísira fasiqa aní máaqaki áinnaaqarara qóomaqa suqásee náannoo. Narí aukuana adeedíraifanoo aní máaqaki narí faiqinámu faqa nárana naanée qinoo. Miqí qímasee qímamifanoo narí máaqa ínni nímiani. 19 Miná faiqi námu iriséeqa miqímmiqau, miqóo óoru qoomáqirara deeda iqau.

20 Mi-eendánaki Yísufa faqa narí faiqi namufaqa mi-maqánaki óoqu márifufaqa eendáki nárana néemariqau. 21 Misá néemarufanoo Yísufa maaqí qímasee qímanniminau. Qinée ánoona ufa ínni qímannimidaqa ínnikiqari faiqí moó fannoo qiní ueeqáaninafa máridanoo.

22 Misá minára irisoofanoo suara náakinau. Suara náakufaqa moodáa moodáa Yísuna irámmiriqa qiqau. Moó fannoo Yísu qinée fee mi-ufána qífee. Moó fannoo miqí qínoo qinée fee qífee. Miqí qímasee aiqámausa Yísuna irámmiriqau. 23 Yísufa iriséenoo kaifáa náriqa qímanniminau. Ínnikiqari moó fannoo maa-difaanínakina ásauku áqusee mara néemarifa qiní ueeqáannoo. 24 Tamummáqara fasiqauqa ákara fannoo qiníara faiqí nímaakuara dóo kúquani fee qínoo máridanoo. Kúqaa qinée káqikaa qóo kúquanaura ueeqásainaqa kúquanaura. Qiní ueeqáaninna fasiqafa kúqaa maaqí qímasee naríara íriannoo. Nánaree qiní qínoofa qiní maqaqísoofaqee máridee. Qiní numóo firaafá máridanoo fee qíannoo. 25 Miqí qímasoofanoo Yudasifa Yísunara irámmirinoo qinau. Óo qiní qafee faqáafa qiníaree ueeqée foo qídanee qímasoofanoo Yísufa qinau. Aneenná kai qíananoo.

26 Misá née márufanoo Yísufa féemu maraséenoo Ánutunara dúfi dúfi qímaseenoo ruqíruqí máseenoo narí faiqi námu níminoo qinau. Maaná marasée naaqa. Maaná qiní qifaaqa qimaqí kíkiqúsira feemu máridanoo. 27 Nimiséenoo uáinna nammari mara máreenoo miqóoqaraasa maqee maqee néemaru nammarina Yísufa mi-uainna kaafána uáinna minakí qumbíqarana maraséenoo Ánutunara dúfi dúfi qímaseenoo narí faiqi námu níminoo qinau. Ínnee aiqáma maanáki marasée naaqa. 28 Maa-uainnáfa qiní fidíka kíkiqusira uainna nammári máridanoo. Qiní fidíkannai uqanna Ánutufa moómoosa numóo aunúnnisaanifeera máa̱ qiní fidíka ráannoo. Maaná qiní fidíka fannoo Ánutuna naríara faqa faiqí ánaaseera faqa nóori runíranaki márunara fúkasaa moodáanaki kira ufa mapúkueeqeenoo dóo rafáaqafusai fidikafa máridanoo. 29 Ínnee íriaqa. Qinée ánoona ufa uqanna ínni qímannimidaqa. Sía máa̱ márunna aukuana maa-uainnána kaifáa naanáura. Kásooqaqee qiní qíkoona quqúsaki innaarúnai ínnee faqa qinée faqa moodáanaki máridaqa fúka uainnara foora qúqufiqa naanáura. 30 Yísufa miqí qímasee qímannimisoofaqa misá námaseeqa Ánutunara idí rámaseeqa ráudamakufaqa asukunaí Oorifa áaqanai óoru fiqau.

31 Miqóo óoru máridanoo Yísufa narí faiqi námu qímanniminau. Fáfaa eendáki qiní qumáraifandínnanara ínnee rufíasee quqásee sandéefaranoo. Ánutuna tamummáqara fasiqa óoqai minára maaqí qímaqoofa máridanoo.

32 Yísufa minára kaifáa qímanniminau. Qinée kúqiranakiqari fíndimeeqee Kariree máqusai ínni nífunni fuanáura. Ínnee qiní qínaaqiana óonuraifaqa miqóo ínni níndafaanaura. 33 Yísufa ínnee quqásee fúrufarifandia foo qímaqoona Peetooroofa minára iriséenoo qinau. Qinée sía sandáanaura. Misá aiqáma quqásee sandáifaqa qinée sía sandáanaura, aní faqa apámma fuanáura. 34 Yísufa mi-ufána iriséenoo qímaminau. Fáfaa eendáki kookooráana sía ufa qínana anée qaaramookínana iráifana qiníara sía qinée miná qáfaidee qinnáranoo. Miqí qínanoo kookooráana ufa qíannoo. 35 Peetooroofa minára iriséenoo qinau. Qáoo, sía qinée aníara sía qáfaidee qianáura aní faqa kúquanaura. Yísuna faiqi námufaqa misá aiqáma miqí kai qiqau.

36 Miqóoqari Yísufa níndiqeenoo saqamaí asukunakí finau. Mi-saqamána áuqu Keetaseemanee sáqama márinau. Miqóo mifá narí faiqi námuara óoqumarifi rakísiaqee qímaseenoo naríaraa káqikaa qóo fínoo naríaraa innaaru qíraree qinau. 37 Qímaseenoo mifá Peetooroona faqa Seebeedina ámaakuqara Yameesa Yoohaneesa minamúsa faqa káqikaa qóo saqamaki nífiqamaree fídanoo narí kúquanínnanara írimarufanoo aundurá mandáikimarufanoo ákoo akaa ímarufanoo miqí marinau. 38 Miqídanoo minamúsa qímanniminau. Ínnee maaqóo saqama qámbaanai márida nífu máqaidaqa qinísaa faqa rakísi qímaqaaqa. Qiní qíkoofa qiní minníqísaaninnanara firaa qóo qímuqusímarifaqa, mi-qimuqusiráfa dáruannoo fee qídaqa. 39 Miqí qímaseenoo mifá káqikaa qóo naríara óonu óorindari mi-saqamánaki maqásaa áqufufanoo innaaru qínoo qinau. Óo qiní qíkoofa amanée anée sía qiní minníqísainaqee sía kúquanauree. Sía qeeqá dídiranara íridaqa aní áidiranara dídidanoo, anée qínaqa kúquanaura.

40 Miqí qímasee innaaru qímaseenoo dóo fíndifinoo qaaramoo námu máruqoo aniréenoo níndafoofanoo misá nísuku káaqa faiqaqau. Ani níndafamáseenoo Peetoorooná áaramáseenoo qinau. Peetooroo anée sía fee káqikaa qóo qiníara rakísinanee. 41 Rakísidana innaaru qídana mária sía káqi mária. Aneenná íriranannai kai qiní dadaaqí maríanafa, aneenná uqanna sía amanaikí máriananoo miqí márifana kudoosaápee márianaqa qáfaidaqa.

42 Miqí qímaseenoo Yísufa kaifáa káqikaa qóo óonureenoo innaaru qínoo qinau. Óo qiní qíkoofa anée amanée sía kúquana nammarina qíminnaree anée sía minníqísainaqee sía kúquanauree. Sía qeeqá íriranannaifau qídau anée qínandee, qínaqa miqímmiqa kúquanaura. 43 Miqí qímaseenoo kaifáa narí faiqi námu unnái óonu níndafoofaqa misá kafáa nísuku faiqée mariqau. Misá nífuki aunduarí marufaqa faiqaqée mariqau.

44 Níndafamáseenoo ani quándakufanoo kafáa óonureenoo kafáa qaaramookínoo innaaru qinau. Indaarú qundée kai kaifáa miqí kai ínoo innaaru qinau. 45 Innaaru qímaseenoo fíndimeeqeenoo narí faiqi námu máruqoo aniréenoo níndafeenoo qímanniminau. Ínnee faiqaqée marídee idooáidee. Qiní maréeqee mandá óosana maree mariasa nísaukuki quqáaninna eendírafa dóo aniréenoo. 46 Dóo fíndifi qáfaaqa. Qiní ueeqée mari fasiqafa dóo ani máridanoo.

47 Mi-karí kai mi-ufána qímarufanoo eendúfanoo asukunaí narí faiqi námukiqari faiqí moo áuqu Yudasifa áninau. Faiqí moómoo miná saimbaqa durú feefa sáamu faaqaaná indáaíi máree aniraqau. Yuda máqannaasa faiqí firaasá rakísirausa niqiqoofaqa Yudasina faqa aniraqau. 48 Fáasai Yudasifa qímannímiseenoo ínnee asukunaí áaqee foora qinée óonuree ámooqaanaqa qáfeeqa ínnee miná kai qumáraaqa. 49 Dóo máqeeufanoo Yísufuqoo óonu réenoo óo qiní qafee faqáafee qímaseenoo Yudasifa Yísuna ámooqanau.

50 Miqí márufanoo Yísufa maaqí qímasee qímaminau. Óo qiní qíqoondi anée nánaree áninanee. Miqí qímasoofaqa faiqí Yudasina faqa ánusa anirée dóo Yísuna ámiqimmásee rakisisimmá qumáraqau. 51 Qumáree marufanoo Yísuna faiqi námukiqari moó fannoo náriqa rákira kisaaqa paipana moó qumáreenoo náriraree qímaseenoo moo fásiqa áaqoo díndanai aiqáma ateeka áqinau. Amaana máqasaa rakísirana aináinira faiqi miná áaqoo ateekánau.

52 Yísufa miná qáfamaseenoo qinau. Dóo rákira paipana quqáa. Aiqáma rákira ainainannai nárimariasa minánnai kai nári nárifaranoo. Minára rákira paipána quqáa sáina qiní kai dáruaqa. 53 Qinée qeeqá qíkoonara iráananoo qangiroouqá núkudara foora qíminaqa dadaaqífaqa sía kúqunaura. Anée minára sía fee íridanee. Dóo aneenná rákira paipana quqásaa. 54 Qiní qíkoofa narí qangiroouqa qíminaqa dadaaqífaqa náqi fee másee qinée kúquananoo Ánutuna tamummáqara fasiqa ufa kambíqaannoo fee.

55 Yísufa miqí qímasee narí faiqiara qáoo qímaseenoo quandáfinoo narí qumáree márusa qímanniminoo qinau. Qinée maqee maqee ínni amaana máqaki qímannimímariafannaqoo ínnee mi-karí miqóo qiní qumáraaqaana. Maqee eendáki ínnee qumeé kai durú sáamu namufaqa qiní qumáree máriafanoo. Qinée qúmuari marúna fasiqausara foo márunaqa ínnee asukunakí qiní qumáree máriafanoo. 56 Misá mi-oosana oosana ainainná Yísunara amisoofanoo óoqeenaa Ánutuna tamummáqara fasiqauqa ufa ánoona kambíqanau. Yudasina faqa ánusa Yísuna qumároofaqa miná faiqi námu aiqáma miná qáfamasee quqásee daráaniqa sandáqau.

57 Sandámáfufaqa Yísuna qumáree márusa káqi qumáreeqa Kaiafasána maqúsai máree fiqau. Kaiafasáfa amaana máqasaa rakísirafa firaafá márunnai máree fiqau. Yuda máqannaasa faiqí firaasá misá faqa Kaiafasána máaqaki fáasai súqimaruqoo miqóo máree fiqau. 58 Misá Yísuna áfiqee fímarufanoo Peetooroofa nínaaqianna rufíeenoo asukunaí nífaaqmee nifaaqmee inóo finau. Misá Kaiafasána máaqaki Yísuna áfiqee kéeqafufanoo Peetooroofa naambeéqai áadumasaa sundíauqa saimbaqa óoqumarifi máridanoo Yísunara íridanoo ímarinau. Misá árifaree náqi fee ifáree rumbéefaree, miqí qídanoo níndafee márinau.

59 Miqí márufaqa amaana máqasaa rakísimarusa firaasáuqa faqa Yuda máqannaa kasóorauqa faqa miqóo súqiqa márida únna ufara randée maríqau. Miqídaqa qiqau. Yá fasiqa fee moo úfa óosana arasáinaqee miná máree fee múnu kíapana qímamifanoo fee áruannoo fee.

(Mooseena sándufa maaqí qímaqoofa, moodáa fasiqa fannoo qínnufafa sía ánoonaikiannoo. Qaara fasiqa fannoo kikíqamafi qínafa mifá ánoonaikiannoo. Misá minára iriséeqa faiqí qaaraqánda mi-ufána qífaqa Yísuna áriraree qiqau.)

60 Faiqí moómoosa máridaqa únna ufa óosana óosana qímariqau. Miqídaqa Yísuna ufara randée maríqau. 61 Randée márufanoo qaara fasiqa moodáa ufa andeeqáqau. Miqandá maaqí qímasee qímannimiqau. Yísufa maaqí qímasee qufaqa maaqandá íriqiafana. Qinée Ánutuna amaana máqa Yeerusaree náaquqara amaana maqa aiqáma rambáiri áqusee qaaramoo fáasaana amaná qinée kaifáa usakáanauree qufaqa íriafannaqanda máridaqa.

62 Amaana máqasaa aanáiqikirausa misá úriqararafa mi-ufána iriséenoo fíndifinoo Yísuna áaramáseenoo irámmirinau. Anée miqandá ufa íridanee. Miqandá kúqaa fee qída fee. 63 Miqí qímasoofanoo Yísufa káqi kásooinoo márinau. Amaana máqasaa aanáiqikirausa misá úriqararafa Yísuna qáfamaseenoo narí áfusaa qímaminoo qinau. Kúqaa maaqandá Ánutuna áfusaa márunausa márida. Anée ánoona ufa kai qiní qímaqimia. Kúqaa fee anée Ánutuna ásauku mundírafa uqannee máridanee, Ánutuna ámaaku uqannee máridanee.

64 Miqí qímasoofanoo Yísufa qinau. Anée qiníara qíannana, qiní ufa íria, máa̱ maqee ínnee qiní qíqafee mariafanoo. Kásooqaqee sía maa-qírausau márianau qíqafeefarau. Úriqararana Ánutuna ásauku uqannai miná aaqá óoqumarifi márianaura, mári ínaqa kásooqaqee asurukína qúmuanaura. Ínnee miqímaseeqa qiní faiqí nímaaku qíqafeefaranoo. 65-66 Amaana máqasaa rakísimarusa firaafá Yísufa miqí qufanoo írufanoo níranaqee márusa óosana maraséenoo narí qamunna parara qínoo anaqí áquseenoo aiqáma súqiqa márusa dárara qímasee qímanniminoo qinau. Dóo ínnee aiqámausa miná mandá ufa íridee. Naríara Ánutuna ámaaku fee qínoo íridee. Sía maasá kafáa árira ufara randáanaura. Dóo aneenná qímannímianaqa ínnee minára nánee fee qídaqee. Misá aiqámausa dóo kúquanifee ufa kái qíma afeekaíkiqau.

67 Misá mi-ufána qímaseeqa Yísuna óorinni aniréeqa níqaara fidiámaqaqau. Fidiámaqaseeqa asukunakíqari misá nísauku samu óori áridaqa qiqau. 68 Anée tamummáqara fasiqa mári ínana aneenná kai tamummaqasée qínaqa íria, yáfee aní árinoo fee.

69 Amaana máqasaa rakísimarusa úriqararafa Kaiafasafa narí máaqa aináinirafa firaafá márunara aináinira mánaaqauqa akaqáusa nífiqa quqásoofaqa aináinimariqau. Peetooroofa áadumai sukínni óoqufaaqéeufanoo aináinira mánaaqa moó fannoo Peetooroona paqúrimáseenoo qímaminoo qinau. Anée faqa mi-kariree fasiqána Yísuna faqa nímarianafa máriananoo.

70-71 Miqí qufanoo, Peetooroofa iriséenoo aiqámausa nífusaa mi-manaaqána qímaminoo qinau. Sía aní ufa óosana íridaqa. Qinée sía miná faqa núnausee qímaseenoo naambeéqai quqúsa kooqí márunnai óoquroofanoo mánaaqa moó fannoo kooqísaa rakísimarufa qáfeenoo miqóo márusa qímanniminau. Maa-fasiqáfa Yísuna Nasareeteendaraana faqa márifaqa qáfee marúnafa.

72 Peetooroofa mi-ufána iriséenoo kaukaata qímasee qáoo qínoo qinau. Sía qinée mi-fasiqánara íridaqa. 73 Kafáa káqikaa qóo marikámasoofaqa faiqí miqóo márusa aniréeqa Peetooroona qímamíqa qiqau. Kúqaa anée mi-fasiqána faiqi námuki máriananoo. Anée faqa mifá faqa kúqaa moodáa ufa qímariaqanda máriafanoo.

74 Peetooroofa mi-ufána iriséenoo kaukaata qímaseenoo dárara qímaseenoo níqinoo qinau. Sía uqanna qinée mi-fasiqánara íridaqa. Nánaree únna qída fee. Miqí qímasoofanoo kookooráana ufa qinau. 75 Kookooráana ufa qímasoofanoo Peetooroofa Yísufa ufa qímamunara írinau. Yísufa qinoo. Qaaramoo kári aní iráifana anée qiníara sía fee qínanoo kookooráana ufa qíannoo. Peetooroofa mi-ufánara óonumafi iriséenoo óo dóo Yísuna ufa qiníara qifa ánoona koorooínoo, qímaseenoo ráudamakufanoo asaurúseenoo firaaqóo ikíraqa máreenoo finau.