1 Miqí qufanoo Yísufa narí faiqi námufaqa sípaki kafáa kéeqafufanoo nammáriki fífiufanoo narí maqúsai Kapeeranauma námmari ámuaqumau óonuranau. 2 Óonuroofaqa faiqí mi-maqúsanaindari moo áuruna áiku ásauku pipisaaqá usufufanoo máruna aindúsu maréeqa Yísufuqoo máree ániqau. Misá írirafa Yísunaki márunara Yísufa miná qáfamáseenoo quandáfinoo auríra faiqi qímaminau. Sía rufíaqa rufíaqa ia. Afaaqa quqáa. Dóo qinée aní mandáinaina numóo minnáiséeqa.

3 Mooseena sándufa írimarusa miqóo márusa mi-ufána iriséeqa maaqí qímasee narí qímami narí qímami qiqau. Maafá naríara Ánutusa máridee qídanoo. Akasáa. Maasá faiqí firaasá faiqí miqí qiasa kuqá nárí marúnausa máridaqa.

4 Yísufa misá ufa iriséenoo quandáfinoo maaqí qímasee qímanniminau. Náqi fee qifaqee mi-manda irirána ínneeqa nitikúraki máraqa nídee. 5 Ínnee qiníara maa-fasiqáfa sía numóo taikárana amana fee qídee. Qinée moó firaa afeekainaina ínni nífusaa íananoo ánoona kambíqainaqa qáfamáseeqa qiníara kúqaa faiqí numóo taikárana amanámmifoo qifaranoo sía kambíqainaqa únnammifoo qiaqa. 6 Ánutufa kúqaa uqanna numóo taikárana qiní qíminoo. Miqí qímaseenoo quandáfinoo pipisaaqá qusirana qímaminoo qinau. Aneenná qaindásaaqari fíndifínana aneenná qaarí qamunna raqándaammámareenana dóo akumáree ámaaqa fúa. 7 Miqí qufanoo mi-aurira fasiqáfa fíndimaqee narí ámaaqai dóo finau. 8 Faiqí ánaasee misá miná qáfamaseeqa níminaandi ráqeeqa nisausí kambíqoofaqa nímudaani qumooqukámambufaqa miqóo Ánutufa narí áfeeka Yísuna ámunara minára óonumafi irisée amooqídaqa asasíqau.

9 Yísufa miqóoqari moosáa fímarufanoo faiqí moó fannoo miná áuqu Mataioo narí oopísaki márufanoo Yísufa qáfanau. Mi-oopisána takísa áqimaru oopisanaki márinau. Takísa máree marú fasiqausa úmmuari márusa misá moómoo maraséeqa akaqána náriara quqásee dínni ati kaamánna ámimariqau. Minára faiqí ánaasee káaqa níkooqee márinau. Mataioofa mi-munnimma ainainná máree marúfa márinau. Yísufa Mataioona qáfeenoo áaramáseenoo qinau. Dóo qiní faqa ánia. Mataioofa Yísuna ufa iriséenoo fíndimeeqeenoo miná faqa finau.

10 Yísufa marikínoo Mataioona máaqai miná faqa nárana nárara finau. Yísufa narí faiqi námufaqa miná máaqaki óoqumarifi nárana néemarufaqa faiqí maqúsa maqúsa munnimma takísa máraqanusa faqa óosana óosana mandáinaina máraqanusáuqa faqa Mataioona faqa ani óoqumarifufaqa nárana naqau. 11 Óoqumarifufaqa nárana née márufanoo Farisai ámaana ufa qímarusauqa aniráma qáfamásee Yísuna faiqi námu qumeé náaramasee qímannimiqau. Náqi fee qifanóo fee ínni rakísirafa mandá fasiquaqa faqa úmmuariqanuasa faqa náidanoo fee.

12 Yísufa misá ufa iriséenoo quandáfinoo maaqí qímaseenoo nári qímanniminau. Sía ámiqirausa tutáqa finnai fídaqa aurímariasa kai tutáqa finnai fídaqa. Maa-namúsa aurúasara foora máridaqa qinée tutáqausara foora máridaqa. 13 Ínnee tamummáqara fasiqa ákara ánoonara óonu randásee qáfaaqa. Mifá maaqí qímasee ákara rinau. Qinée Ánutusa sía tatúfira aandau aina fee óosana óosana ainaina fee qímiranara dídidanoo, faiqí ánaasee naríara naríara nímuqusifaqa nífauee máriana mináuqara qiní dídidanoo, Ánutufa miqí qímaqoofaqa qinée Yísusa mimaú fídaqa maaqí qídaqa. Sía qinée andeeqée maríasa náarararee qímasee qúmu máridaqa ínnee mandá fasiqa ánaasee fee qímasee nífaqee maríasa misá Ánutufinnai ubeekaaqeera náarararee qímasee qúmuafanausa máridaqa.

14-15 Mi-kamusaqá Yoohaneefa nammári nímimaruna faiqinámu Yísufinnai aniréeqa irámmiriqa qiqau. Maasá Yoohaneefa nammári nímimarina faiqi námufaqa Farisai ámaana ufa írimariasa misá faiqi námufaqa nári nárana minníseeqa náararée márifaqa Ánutunara innaaru qídaqa. Aní faiqi námu náqi fee ifaqee sía miqídee káqi nárana náidee qufanoo Yísufa iriséenoo qímanniminau. Amundára fasiqa faqa áqoondi namufaqa maqúsai ani márinaqa náqimasee náararée márinee káqi márifaree, sía miqífaranoo asasammásee nárana suqásee neefáranoo. Minára qiní faiqi námu qiní faqa amundára fasiqara fooqáasa máridaqa asasammásee qiní faqa náidaqa máridaqa. Káqikaa qóo mi-anaaseená afaaqi qiní rumbámaree múnu darusáifaqa mi-karí kúqaa nímuqusa mandáikinaqa náararée márinaqa innaaru qifáranoo. Yísufa Yoohaneena faiqi námu káqi qímannimidanoo qinau.

16 Óoqeenáa qamunna anaqínoo márina fúka qamunna áti qumáree sía náuraa qamunnasaa akunírafa máridanoo. Fúka qamunna áti fannoo náuraa qamunna dóo firaaqóo anaqíannoo.

(Yísufa maqásaa máru aukuana misá uáinna nammari tatísee aandáu̱ apatannái auqira taquki adíasee kísaaqasaa máaqaki quqasoofanoo márinau. Marikínoo ámiqinoo márufaqa miná mara máree maqee maqee néemariqau. Uáinna nammari misá maqee maqee née maru nammarifa márinau. Mifá aandáu̱ apatannai auqira taquara qufaqa, maasá qeeqá ufakiqari táqu uqannée qidaqa.)

17 Yáfee faiqí moó fannoo náuraa tunda taqu maraséenoo fee fúka nammari adíaannoo fee. Sía miqíannoo. Ruqía fínanoo aiqáma nammari qúmiqaráandoora. Fúka taqu andásee fúka nammari minakí adíasainanoo miná amaná máriannoo.

(Yísufa narí fúka ufa fúka taquara faqa qamunnara faqa miná kíkiqa úsinau. Farisai ámaana ufa faqa Yoohaneena amaana ufa faqa amaná máridanoo óoreeqánoo máridanoo. Qiní fúka ufa úriqararafa máridanoo. Misáindi sía amaná qiníndi fabaqa írafa máriannoo.)

18 Yísufa Yoohaneena faiqi námu ufa qímannimi márufanoo amaana máqasaa rakísirafa moó fannoo Yísufinnai aniréenoo óorindari mapámufufanoo Yísuna qímaminau. Dóo qiní qíraamuna maqee uqanna dóo kúqinoo. Anée aniréenana aneenná ásauku minásaa mundúsainanoo mifá fíndifuani. 19 Miqí qufanoo Yísufa fíndifinoo narí faiqi námufaqa miná faqa finau.

20 Fímarufanoo ánaasee moó fannoo ánaaqianaindari óonureenoo miná qamunna áti íreeda áuqanau. Mi-anaaseefá kísaaqándaikufa qísaukuqara taikásee qíkunni óoqu qaaraqánda áukuana marasoofa márinau. 21 Mi-anaaseefá narí kai qímmirinau. Qinée óonuree miná qamunna átikai umeé áuqamásaananoo qiní fidíka taikáannoo. Miqí qímasoofa máridanoo óonuree miná ánaaqianaindari faiqí anaaseekiaqa qumeé óonuree miná qamunna áti kai íreeda áuqaanau. 22 Miná qamunna áuqamásoofanoo Yísufa quandáfinoo qáfamáseenoo qinau. Qiní qíraamuna sía rufía afaaqa quqásee mária anée aneenná írirana qinísaa rusíranannai kai aní aurírafa dóo taikéenoo, mifá kai. Miqí qímasoofanoo miqóo kai mi-anaaseená aurírafa taikánau.

23 Taikáfufanoo Yísufa miqóoqari fífi̱ufanoo amaana máqasaa rakísirana máaqa márunnai miná áraamuna kúqinoo máru maqanaki óonureenoo faiqí ánaasee moómoosa tutuqídaqa ikífaafau qídaqa ufíreena aina fuaqáidaqa ikí ráqeemarufanoo Yísufa óonu níndafanau. 24 Óonurama níndafeenoo qímanniminau. Dóo ráudamaki fuaqa, aiqáma fífainiaqa maa-manaaqáfa sía kúqinoofau faiqaqée ídanoo. Miqí qímaseenoo quandára ufa qímannimisoofaqa misá quandáfiqa naanaidara uteéti qídaqa qiqau. Únna qía. Dóo kúqinoo máridanoo. 25 Yísufa misá aiqáma niqiqámaseenoo miná máaqaki kéeqafinoo mi-manaaqána ásauku qumároofanoo dóo fíndifinau. 26 Miqóoqari aiqáma maqúsa maqúsa fíqu fíqu iqá márusa Yísufa mi-manaaqána fíndifumásoo ufafa aiqámai daráanufaqa íriqau.

27 Mi-manaaqáfa fíndifufanoo Yísufa moosáa fímarufanoo faiqí qaaraqánda nífu dimbáraqanda ánaaqiana fídaqa fáaqariqa fída qiqau. Óo Dafidina ati anée maaqandá qíqafainanoo aní ámuqusinana maaqandá dadaaqia.

28 Yísufa máaqaki kéeqafufaqa mi-fasiqaqandá miná ánaaqiana kéeqaqau. Kéeqafufanoo Yísufa irámmirinoo qinau. Ínneeqara qiní afeekara nánee fee qídee. Ínniqara nífu andeeqáranara qiníara amaneefée fee qímasee ánidee, sía amanaikíannoo fee qídee qufaqa miqandá qiqau. Eeóo maaqandá aníara amanafée qídaqa.

29 Yísufa mi-ufána iriséenoo qímanniminau. Ínneeqara qiníara amanafée qianara miqí qianara sía nipátiani andeeqánnisaanaura.

30 Miqí qufanoo mikarí kai miqandá nífu andeeqánnisanau. Miqandá nífu maqasoofanoo Yísufa maaqí qímasee qímanniminau. Nimambainá qímaseenoo qímanniminau. Dóo ínneeqara sía uqanna faiqi ánaasee akaqáusa qímannimiaqa. Maa-ufána kukéeqammasaaqa.

31 Miqandá mi-ufána iriséeqa minúfa rukíasee maqúsai óonureeqara faiqí ánaasee aiqáma atinai qímannimiqaniqau.

32 Miqandá fufanoo mi-maqúsanaasa moo fásiqa áfiqee ániqau. Ufa sía qímaruna áanna apeeqúnirana áfaanna faqa miná aundurái máruna áfiqee ániqau. 33 Mínisoofanoo Yísufa miná aundurákinaa áfaanna aqiqámasoofanoo áfaanna fannoo ráudamákufanoo mi-fasiqáfa ufa andeeqásee qinau. Miqíufaqa faiqí ánaasee miná qáfamásee nímudaani qumooqukámmáfinoo nifaaqa sía qumároofaqa miná qáfeeqa qiqau. Isaraee máqannaa sía óoqai maa-ainaináfa máruna, maqee kái.

34 Miqí qufaqa Farisai ámaana ufa írimarusa minára kaukaata qímaseeqa qiqau. Yísufa áfaannauqa firaanánnai faiqí naundurákinaa áfaannauqa niqiqáidanoo.

35 Miqóoqari Yísufa maqúsa maqusa káqikaa maqusa firaa maqusa amaana ufa innaarúna ququsaki fímaria ufana qímannimínooninau. Káqikaa aurirana faqa firaa aurirana faqa andeeqánnisánoonínau. 36 Yísufa faiqí ánaasee níndafamáseenoo firaaqóo ámuqusufanoo qinau. Bóo faiqí ánaasee sía rakísirafa márisa, kaqi fífau tia máridaqa. Sipsípauqa fooqáasa rakísirana síaisa maa-fasiqa anaaseesá máridaqa. Káasau fainiara foora márida, áukuana áukuana sía ámiqimmásee márida, mi-manda kaasau fainínara rufíaqa rufíaqa káimmidaqa, áukuana aukuana miqí kaimmída márida, dadaaqírana síaisa rakísirana síaisa máridaqa.

37 Yísufa mi-ufána qímaseenoo quandáfinoo maaqí qímaseenoo ufa qinau. Dóo áfuqakinaa nárana tatafínoo rairaaínoo máridanoo. Dadaaqí aiqíra fasiqa sía amanaikí máriafaqa. 38 Minára ínnee súana ákoofinnai innaaru qiaqa. Innaaru qífanoo Ánutufa aiqífandínausa níminaqa dadaaqíqa súana aiqúaqeera. Dadaaqífaqa innaarúnai ufa qímannimifaqa innaarúna ququsaki fuaqéera súana kíkiqa usuqoofanoo máridanoo.