1 Isakeefa minára iriséenoo Yakooboona áaramaseenoo ámandaidanoo qinau. Óo Yakooboo sía uqanná Kannaana máqannaa ánaasee máraa. 2 Dóo fíndi fínana óoru fua. Aneenná ánaakuna Beetueerana maqa máaqa Meesoopootamia máqa máaqaki óoruree aneenná anauná Rábannana áraamuna máraa. 3 Aiqáma áfeeka faqáa Ánutufa aní faqa aní ánaaqa faqa ámiqi ámiqimma nímaqaseenoo moómoo fáiqi nímisainana anee moómoo máqannaasa níkoofa márinnara. 4 Ánutufa Abaraqaammána ámiqi ámiqimma ámaqoondee ínoo aní faqa ámiqi ámiqimma áisáinana anee aneenná márianna maqa maaqána Ánutufa Abaraqaamána amiqoonákinaa qumíasana máraa. 5 Miqí qímaseenoo Isakeefa Yakooboona aiqoofanóo fíndifinoo Meesoopootamia máqa máaqai Rabanafa Beetueerána ámaaku Arameea máqannaafa Reebeekaa námmarina ásookifa márunnai óorufinau. Rebeekaa námmarifa Yakooboosa Eesáusa nínoofa márinau.

6 Isakeefa Yakooboona afaaqóoqa amiséenoo Meesoopootamia máqa máaqai ánaasee máraanifeera aqiqoonara Eesaufa írinau. Isakeefa afaaqóoqa Yakooboona amiséenoo Kannaana máqanna ánaasee sía máraannee qunára faqa írinau. 7 Yakooboofa narí ánaukoo ufa irisée Meesoopootamia máqa máaqai funára faqa Eesáufa írinau. 8 Isakeefa Kannaana máqannaa ánaaseera ákooqee márunara Eesaufa írinau. 9 Iriséenoo Isamaeeráfa Abaraqaammana ámaaku márunnai óonuree miná áraamuna áuqu Maqarata námmarina máranau. Maqarata námmarina ásookifa Neebaiootáfa márinau.

10 Kaifa Yakooboofa Beeraseeba máqusaindari Qaraana máqusai fíraree qímasee faiqanóo óoru fímarinau. 11 Fímarufanoo eendúfanoo moósaa úiqaana araséenoo faiqanau. Faiqárarinoo óoni firaaná marasée qunú rúmasee miqóo faiqanau. 12 Faiqáqee ídanoo qainá moó inau. Aaná kísaaqa maqásaaqari innaarúnai óoru márufanoo angiroouqá mimaú óoruree qumurée ímariqau. 13 Karaambáiqa Yákooboona áakaarinni kikíqinoo máridanoo maaqí qímasee qímaminau. Qinée Karaambáiqa máridaqa, aní ánaakuna Abaraqaamána Ánutusa máridaqa, aní ákoona Isakeena fáqa Ánutusa máridaqa. Qinée maa maqa maaqána anée faiqáannana aní faqa aní áiku ásauku faqa nímianaura. 14 Ani áiku ásauku anísaa ani aruakínausa faqa núkudara foorá maa maqánasaa márifaranoo. Misá miqóoqari kambíqamaree súani óosana qáannai fínanoo aramáreenoo kéeqee mári qaannai fínanoo dínni dínni ataaqéenni fínanoo miqí mámbi amana kái márifaranoo. Aní faqa aní áiku ásaukuaróo qíqa aiqáma máqannaasa ámiqimmá nímaqaanaura. 15 Karaambáiqa kafáa qímaminoo qinau. Íria, qinée aní faqa máridaqa aiqámai fínnannai anísaa rakísianaura. Rakísidaqa kaifáa aní maréeqee maa maqánasaa quqáanaura. Qinee sía aní minnísaanaura, qínee qeeqá qíma afeekaikíafanna úfafa ánoona kambíqainaqa quqáanaura.

16 Miqí qímsoofanoo Yakooboofa tautínoo fíndifinoo qinau. Karaambáiqa maaqóo máridanoo. Mifa maaqóo márinara qinee sía íridaqa. 17 Yakooboofa Ánutuna ufa iriséenoo rufía rufía ídanoo qinau. Maa maqa maaqáfa dáaquqara máqa máqaa máridanoo. Abee Ánutuna máaqa máriannoo innaarúnai fímaria kooqífa uqanná máriannoo.

18 Kanánaana Yakooboofa fíndifinoo narí óoni qunu qumáreenoo daaqoo áuqaanífee qímasee maqásaa rakíqaseenoo Ánutunaindi fee qímasee oorifa fádameena akuámaqánau. 19 Akuámaqaseenoo mi maqánara Beeteera fée qinau. (Mi auqúna óosana Ánutuna máaqa fee qinau.) Óoqai miqóora misa Rusa máqusa fée qímariqau.

20-21 Yakooboofa mi maqána áuqu rámaseenoo Karaambáiqara qíma áfeekaikinoo qinau. Qinée fímarianana anee qiní faqa márida qinísaa rakísidana nárana faqa qamunna fáqa qíminaqa qínee ámiqimmáseeqa qeeqá qíkoona máaqai qumu ráanana anee qiní Ánutufa márinnaranoo. 22 Maa daaqoo auqara oonína rakíqaunnana aní náaru amooqi fándínnaqoo máriannoo. Anée aiqáma áinaina qíminaqa qinée qísaukuqarakinaana aninná ámianaura.