1 Máriiufanoo Ánutufa Abaraqaammána amanammásee qáfaanee qímasee innaarúnaindari áaramasee qinau. Óo Abaraqaama qufanóo Abaraqaammáfa qinau qinée maaqóo máridaqa. Miqí qufanoo Ánutufa qímaminau.

2 Aneenná ámaaku Isakeena aní ámaaku moodáa, káaqa ámuqusa ímariannana áfiqeenana Mooria máqa máaqai óoru ráinaqa qinee áaqana moó uqafíqáanaura. Anée mi aaqannánasaa aneenná ámaaku arusée qini tatúfirana suqá qímia.

3 Miqí qímasoofanoo kanánaana fíndifinoo narí dookísaa idá rufáriséenoo minásaa quqáseenoo narí aináini marú faiqi qandá faqa narí ámaaku Isakeena fáqa nífiqeenoo fíndimeeqee Ánutufa qímàmúnnai finau. 4 Qaara afuru aanái fí faiqaqau. Qaaramoó kufanóo Ánutufa qímaqoo áaqannafa níanasaa márufanoo qáfanau. 5 Qáfamaseenoo Abaraqammáfa narí aináini máru faiqi qandá qímanniminoo qínau. Ínneeqara maaqóo márida doonkísaa rakísiaqa. Qeeqá qímaakundíri miqóo óoru Ánutunara innaaru qímasee ínneeqara iannái qúmuanaura.

6 Miqí qímaseenoo Abaraqaammáfa tatúfirana suqáaninna ídana maréeqeenoo Isakeenasáa soofanóo mároofanoo narí idá qéemaruna ákuru mándeenoo miná qumáreenoo musúka faqa qumáreenoo doo narí faiqi áfiqeenoo Ánutufa qímaqoo áaqanna kaaqa óoru fínau. 7 Aanái óoru fímarufanoo Isakeefa narí ákoona áaramaseenoo qinau, Qípoo qufanóo Abaraqaammáfa foó qímasee qinau. Nánaree qídanee qufanoo Isakeefá qinau. Qinée qáfaunana anee idáti faqa idá rúmbarana faqa máree fímarinanoo, yáafée tatúfirana suqéefandínna sípsipafa máridanoo fee.

8 Abaraqaammáfa maaqí qímasee narí ámaaku qímaminau. Ánutufa narí kaí sipsípa ánaaqi moodáa qíminaqa tatúfirana suqámianaura. Miqí qímaseeqa miqandá moodaanaki óoru fíqau.

9 Miqandá Ánutufa qímaqoo áaqannasaa óoru réeqa Abaraqaammáfa óoniuqa maréeqee áaku aakummáseenoo idá miná ámuaaqa quqáseenoo narí faiqì Isakeena ruúmbeeqeenoo rafúsu idásaa rusínau. 10 Rusíseenoo musúka qumáreenoo narí faiqì kuqá arusaanéera inau. 11 Karaambáiqa angiroo innaarúnaindari áaramaseenoo qinau, Abaraqaamma, Abaraqaamma, miqí qufanóo Abaraqaammáfa qinau. Qinée máà máridaqee qufanoo Karaambáiqa qinau. 12 Sía faiqì arua, sía mandáikamma ámaqaa. Sía aneenná ásaukukoo aneenná faiqì árua. Dóo maqeé qinée íridaqa anee Ánutuna ufa qaindúsidana miná ufa áfaqee máriananoo. Anée aneenná ámaakuara aneenná ámuqusa uqannára sía qáòo qíananoo eedóo kaí qíananoo.

13 Miqí qufanóo Abaraqaammáfa uqéeráfinoo qáfoofanoo ándandaki sípsipa ákoona saqári ánaaqiki aanai rutáqusee márufanoo qáfanau. Qáfamaseenoo Abaraqaammáfa narí ámaaku ámaaqa máqeenoo sipsípa ákoona aruséenoo Ánutuna tatúfirana suqá áminau. 14 Miqóoqari Abaraqaammáfa mi aaqanná áuqu reenoo, Karaambáiqa nímira áaqanee qinau. Minára maqee mindáraasa maaqí qídaqa, Yáaweefa narí áaqanasaa nímidanoo fee qídaqa.

15 Karaambáiqa angiroo innaarúnaindari kaifáa Abaraqaammána áaramaseenoo qinau. 16 Karaambáiqa aníara maqí qídanoo. Qinée qeeqá dúqusaa qíma afeekaikammásee qídaqa. Qinee firaaqóo ani ámiqimma ámaqaanaura. Aneé aneenná ámaaku moodáa sía qáòo qíannanara qinee miqíanaura. 17 Qinee kúqaa qíma afeekaikámmasee anísaa aní aruakínausa aní áiku ásauku innaarúnai fásaura foorá moómoo márifaranoo núkudara foorá aní ámianauranoo. Aní áiku ásauku namuqáa rafáaqa fúsee misá aináina máree márifaranoo. 18 Aiqáma máqannaasa qiníara aní áiku ásauku ámiqi ámiqimma nímaaqaafánandee másee maasá fáqa ámiqi ámiqimma qímaqaannee qifáranoo. Anee qiní aakápara ufa qaindúsuannánara miqíqa.

19 Abaraqaammáfa miqóoqari narí faiqi Isakeesandíri narí aináinira fáiqi qára qúmi nífiqee narí máru máqusanai Beeraseeba máqusai óoqu márinau.

20 Máriiufanoo Abaraqaammáfa irufanoo Mirikaa námmarifa Naqoorana Abaraqaammána ákaqa faiqì qísauku dínni taikásee dínni óonu qaarammoó marasée 8 máqee fóo qiqau. 21 Usafa indaarúqaafa Busafa miná ánaaqíannaafa márinau, miná ánaaqíannaafa Keemueerafa mifá Arammana ákoofa márinau. 22-23 Miná ánaaqiannaafa Keeseedafa márinau, miná ánaaqiannaafa Qasoorafa márinau, mina ánaaqiannaafa Piradasafa márinau miná ánaaqiannaafa Didarafa márinau, misá nínaaqiannaafa Beetueerafa márinau. Mifa Reebeeka námmarina ákoofa márinau. Mirikaa námmarifa mi faiqì námusa Naqoorana Abaraqaammána ákaqasaa máqanau. 24 Reumma námmarifa Naqoorana ínaaqíannaa ánaasee fánnoo Teebana faqa Kaqammana faqa Taqasana faqa Maakaana faqa máqanau.