1 Karaambáiqa Nooana maaqí qímasee qímaminau. Anée aneenná áiku ásauku faqa sípaki kéeqaa. Maqá sáaqaraasakíqari anée kai aneennáraa andeeqárafa máriana qáfaidaqa. 2 Ínnee qiní qífusaa ánukara áandau fee qímariana qísauku dínni taikásee dínni óonu qaara marasée 7 ákoona faqa ánaasee faqa aní faqa sípaki maréeqee quqásainaqa asumu máriaqa. Ínnee qiní qífusaa sía ánukara aandau óosana óosana ákoona faqa ánaasee faqa moodáa kai maréeqee minakí asumu quqásaina máriaqa. 3 Áiqama úfini óosana óosana dínni taikásee dínni óonu qaara marasée 7 ákoona faqa ánaasee faqa maréeqee sípaki quqáa. Miqímmasainaqa aiqáma áandau ufini kaifáa maa maqánasaa moómoo kiaqa. 4 Dínni taikásee dínni óonu qaaraqánda marasée 7 fáasaana áiqaráinaqa miqóo aaku maqásaa quqáanaura. Qaara fasiqa níku nísauku taikásee 40 fáasaana faqa éendaki faqa aaku rída máriannoo. Miqí márinaqa qinée maqásaa aiqáma náanna faqáasa qeeqá áuqu nísaafanausa taiká nísaanaura.

5 Nooafa aiqáma áináina Ánutufa qímamúndee káimminau.

6 Nooafa 600 aukuana marasoofanóo mi aukuannásaa nammári áufirafa áninau. 7 Nooafa Ánutuna mi ufáusa iriséenoo rufíaseenoo narí faqa narí ánaaqa faqa narí ámaaku qaaramoó námu faqa minamúsa nínaaqmaaka faqa sípaki kéeqaqau. 8-9 Óosana óosana áandau úfini ákoona faqa ánaasee faqa Ánutuna áfusaa ánukarausa faqa sía ánukarausa faqa aiqáma Nooana fáqa sípaki kéeqaqau. Ánutufa ufa qumáu kai kéeqaqau. 10 Dínni taikásee dínni óonu qaara marasée 7 fáasana márinoo nammári áufinau.

11 Mi aukuanná Nooafa 600 áukuana máranau. Qaara quqoonasáa qíku dínni taikásee dínni óonu qaaraqánda marasée 17 fáasaanasaa mi faasaanná kaí nammári radíqinau. Mi faasaanná kaí maqá ámeemaanaindari námmari radíqisee ururéenoo innaarúna kóoqiara foorá atúqóofanoo aaku firaafa nammáriara foora adíanau. 12 Qaara fasiqa níku nísauku taikásee 40 éendaki fáqa fáasaana faqa aaku firaafá nammáriara foorá adíanau.

13 Nammári radíqu fáasaanna mi faasaanná kai Nooafa narí ánaaqandiri faqa narí ámaaku námu Séemafa faqa Qámmafa faqa Yáfeetafa faqa minamúsa nári nínaaqmaaka faqa sípaki kéeqafiqa máriqau. 14 Káasau áandau óosana óosana faqa máaqeena áandau óosana óosana faqa ufini óosana óosana faqa firaa aandauqá faqa káqikaa áandauqa faqa Nooana áiku ásauku faqa sípaki kéeqaqau. 15 Aiqáma óosana óosana kásimaru aandau ufinísa ákoona faqa ánaasee faqa Nooana faqa sípaki kéeqaqau. 16 Ánutufa Nooana qímamu mau káì kéeqa fufanóo Ánutufa narí kaí kooqí ititá nímaqanau.

17 Qaara fasiqa níku nísauku taikásee 40 faasana aaku nammáriara foorá adíanau. Miqí ufanóo nammári qumbiqéenoo sípa uqéereeqeenoo murúsaqa quqánau. 18 Nammári fánnoo firaaqóo innooqóofanoo sípa fannoo miná ámuaqumau nímarinau. 19 Nammári fannoo moó faqa innooqéenoo aiqáma kísaaqa áaqana dukúninau. 20 Kaifáa innooqéenoo kísaaqa áaqana óori aaqaramáseenoo 7 meters amana óoru márinau. 21 Miqínoo márufanoo maqásaa máru ainaináusa aiqáma kúqiqau. Aiqáma úfiniuqa faqa aiqáma ándauqa faqa aiqáma fásiqa ánaasee faqa kuqu taikáqau. 22 Aiqáma aandáu faqa doodaani faqa maa maqánasaa marúsa kúqu taikaqau. 23 Karaambáiqa aiqáma áinaina maqásaaqaraa áinaina taiká uqanná sánau. Faiqí ánaasee faqa aandáu faqa ufini faqa taikánnisanau. Nooafa kái narí áiku ásauku faqa narí sípakinaa áinainauqa faqa misá kaí asumu máriqau. 24 Dinni qísauku taikásee dínni óonu qaara fasiqa maraséenoo moodáa fásiqa ásaukuqara 150 faasaana nammári káqi áufinoo márinau.