1 Ánutuna áfaarirana dadaaqírana ásauku mundírana Yísunaki máriainainafa márinaqa maasá minakí máriananoo maasáindi máriannoo. Óo Timooti mi-afaarirána maraséenana minásaa mapukína mária. 2 Qinée moómoo fasiqa ánaasee nífusaa ufa nímiafannana anée faqa miná írimariananoo. Mi-ufáusa maramáreenana andeeqára fasiqauqasaa quqásainaqa misá qumáreeqa quandáfi niqoónausa faiqí ánaasee qímannimiaqeera.

3 Anée faqa ásauku mundírana Yísuna rákira faiqiara foora máridana aupúraidana anée faqa kadáapirina fúa. Timooti anée rákira fasiqa óosana íria. 4 Sundíauqa rákiranaki fídaqa sía káiqeesa mária márirana máridaqa náriqa aiqáma ainaina minníseeqa dóo rákira ainainará kai nóori faqa írirana minní kai ubeekámasee nári karaambáiqa áfusaa afeekaikámaseenoo rákirara kai íridaqa. Timooti anée faqa Ánutuna saikáki fídana misá naanna ráa. 5 Kafáa sandée maría fasiqausa óosana írimariana sía ufamáu sandéenana taikára qóo óonu kásoomafinana sía feefaurú máreennaranoo Timooti anée faqa mi-ufamaú sandéera foora amanamásee qáfa. 6 Sía moó fannoo fúkasaa nárana unakúsee náannoo. Nárana úmmaqi mari fasiqafa mifá kai indaarú unakúsee náannoo miná kadáapirirana ákiaqa máriannoo. Anée faqa Ánutuna saikáki kadáapirina fífi ínana náaru unakúseena suqáseenana néera foora innáranoo. 7 Anée mi-ufána qúnnana irisáinanoo karaambáiqa fannoo dadaaqínana mi-oosanná írinnaranoo.

8 Aneenná áaqooki ásauku mundírana Yísunara íria, mifá Dafidina áti kúqiranakiqari fíndifufa máridanoo. Miná ámiqira fasaasa ufa qinée qímannimi marúnnana miná koorooídanoo. 9 Qinée mi-amiqira fasaasa ufána qímannimunnanara aupúraidaqa. Misá qiníara mandóosana máree marí fee qímaseeqa qiní qumáreeqa sáinandannai rumbá quqéeqa. Kúqaa qinée sáinandannai rumbáqa márida Ánutuna ufa fannoo sía rumbánoo máridanoo káqi idukínoo máridanoo. 10 Qinée minára iriséeqa, Ánutufa rusandeesámumasee máreefandínna fasiqa anaaseesara irisée misá Yísunara íriaqeera óosana óosana mandáinaina aiqáma ainaina máraidaqa. Misá faqa asumu máriaqeera faqa náaru aréenarana máraaqeera faqa mandáinaina káqi qeeqá qipatasáa máraidaqa. Mi-asumu marirána faqa náaru aréenarana faqa ásauku mundírana Yísunaki kai máridanoo.

11 Maa-ufáfa kúqaa máridanoo. Maasá Yísuna faqa kúqiqa miná faqa fíndifuanauranoo. 12 Maasá miná faqa afeekaikámande fífi inaqa maasá kásooqaqee miná faqa rakísirausa márianaura. Maasá minára qáoo qíananoo mifá maasára faqa qáoo qíannoo. 13 Maasá miná ákaru qíananoo mifá kai amana kái andeeqásee máriannoo. Mifá sía amana narí óosana minnísee maasá mandóosanamau fúannoo, andeeqárafa kai máridanoo.

14 Timooti mi-ufáusa aní Yísuna ufara suqímaría maqánaki kéeqee máriasa qímannimidana maa-ufána faqa Ánutuna áfusaa óori kándamasee aaquqímannimaqa. Misá sía kai fífau ufara tínoo taanóo ríqa rairaiqiaqa. Mi-oosanáfa sía ánoonaikidanoo faiqí ánaasee kurídi maríafa mi-oosanáfa máridanoo 15 Anée aneennára Ánutuna áfusaa anée afeekaikámandee máridana saiká máree máriananoo Ánutufa aníara maaqí qíanífeera óo maa-fasiqáfa ámiqimmandee qiní saiká uqéeraidanoo qiní ánoona úfa ámiqimasee andeeqásee qímannimimarifa sía narí saikára óonumafi írinoo asaurúanífeera.

16 Akaqáusa óoqai Yísuna ufakí máriusa óosana óosana fífau fáafau ufa uqéeree maríafaqa anée minára eeráiria. Ánutuna andeeqárufa sía minakí mári ufana dapi ufa narí qímami narí qímamira fee qínnufana faqa fúrufarira ufara faqa anée minára rufíasee níanasaa fúa. Mi-ufáfa faiqí ánaasee Ánutufinnaindaraana maréeqee káqirúnna ubeekéemarifa máridanoo. 17-18 Mi-dapi ufána qímannimimariasa ufa fannoo fidíka namuanara foora firaaqóo amaqí náidanoo firaaqóo qáidanoo mi-dapi ufána miqí qífanoo firaanáikiandoora. Miqíra úfa qímariasa núqu Qimeenaiusafa faqa Fireetusafa faqa miqandá ánoona úfa qímaria aana minnísee únna qímasee aiqámausa kúqiranakiqari fíndifirafa óoqai taikánoo máridanoo fee qídaqa. Miqíra ufannai Yísuna ufamau fímariasa akaqáusa níkuamánnimiafaqa sáamuridaqa.

19 Misá miqíra úfa fannoo sía amana Ánutuna ufa áruannoo, faakánara foora arufínoo sía kásiannoo. Mi-faakannásaa maa-ufána ákara rínoo máridanoo Karaambáiqa narí faiqí ánaaseera íridanoo. Yá faiqi anaasee fee naríara karaambáiqaindi fee qínafa mifá mandóosana ámeesuquseenoo andeeqára óosana máraannoo. Ánutuna úfa faakánara foora márina óosana miqí mminoo máridanoo.

20 Aináina faqaasa máaqaki qafee dísa káafaina píritaina óosana óosana máridanoo. Akaqána siruáannai áuqirafa máridanoo akaqáfa kóorannai áuqirafa máridanoo akaqáfa saqárinnai áuqirafa máridanoo akaqáfa maqánnai áuqirafa máridanoo. Akaqána ámiqira difaaniki nárana saka faiqí nímimariafa máridanoo. Akaqáusa mandáikirafá kai madaapeenní márifa máridanoo. 21 Faiqí moó fannoo madaapeenní mári difaanifara foora márifa narí ánukamásainanoo aináina saka néemaria difaanífara foora ámiqirafa máriannoo. Miqínanoo miná ákoofa maréeqee ámiqira saikaki quqáannoo.

22 Nímuqusa ánukarausa maqee maqee karaambáiqa áaraidaqa dadaaqíannee qídaqa anee misá faqa misá naanna ráidana kumaaráa mandáinainara nídiranara eeráiriaqa andeeqáranara afeekaikámasee áfaqaaqa, Yísunasaa írirana rusírana faqa faiqí ánaaseera nímuqusirana faqa naunduráki asooárana faqa afeekaikámasee áfaqaaqa.

23 Fúrufarira ufa, dapi ufa rainárafa mináuqara eeráiriaqa. Miqí qímariasa aiqáma kari áanooqiranaki áqufidaqa. 24 Ánutuna aináinira fasiqa fannoo sía ufa raináinnanaki kéeqaani. Mifá aiqámausara reendeenámandee íreedá kai qímannimiani mifá ámiqimasee íreedá kai fifímmasee Ánutuna ufa naamúaqiani. 25 Mifá íreedá kai miná ufara qáoo qímariasa andeeqánnimaqáani. Mifá miqínanoo ábee Ánutufa dadaaqíannoo fee misá quándaki ánoona úfai ubeekeefáranoo fee. 26 Sadannafa narí ufaanaki mara árinoo narí íriranamau quqásoofaqa fímarufaqa misá ánoona ufasáa ubeekáifanoo nári írirafa kambíqafinaqa Sadannana ufaanakíqari arurudúku fifáranoo.