1-2 Qinée Pauroosa maa-ufana reendeenámandee qímannimidaqa. Akaqáusa qiníara níanai marídanoo áanóo ufá kai qímari fee ínni faqa máridanoo reendeenídanoo fee qídaqa. Qinée miqí qianára maaqí qídaqa. Qinée ásauku mundírana ámiqi ámiqirana faqa íreeda márira oosana faqa miná áfusaa máridaqa reendeenámasee qímannimidaqa qinée ínnee iannai óonuraanaqa sía qiní qírana fundákuaqa maasára maqásaaqaraa írirana irisée qímariaafoo qímariasa amaná áanoománnimaqaanaura, sía sía amana máriannoo, amaná máriannoo.

3 Kúqaa maasá maa-maqa maaqánaki marídaqa sía minakínaa írirana marasée rákiara foora ídaqa. 4 Maasá rákimaria durú saamu sía maa-maqa maaqánakinaa durú saamuarau qídau. Maasá Ánutuna afeeka ufa márina minánnai durú saamuara foora rákidaqa. Minánnai maasá Sadannana faandaamura rapéepaamma áqidaqa. 5 Maasá mi-duru saamúnannai únnufa qímariana dóo kúqaridaqa. Minánnai faqa Ánutunara kooroo íra ufara qáoo qímasee nóori uqéerasee maasá minára úriqararausee qímariasa minánnai misá faqa náridanoo. Maasá mi-unna ufána qímariasa úriqaranoo márina Ánutuna durú sáamuara foora qumáreeqa óoru rarisámeeqee maqásaa múqufi rudámmiqi quqáidaqa. Maasá qeeqá qitikúrakinaa mandírirana aiqáma óosana óosana mandírirana rákiranannai naruséeqa aiqáma óonu qumáree ani qumáreemméeqee karaambáiqa ásauku mundírana áramandunnai quqásainaqa qeeqá qitikúrakinaa írirana miná ufamau fuaqéera. 6 Ínnee Koorinti máqusanaasa miqírausa máriafanoo maasá ínni maréeqee ásauku mundírana áramandunnai quqásoofaqa miná íriranaki fímariafanoo ínnee minákiqari káqi rúnnai fífaqa qiní qírana fundákusaifaqa maasá ínni náríara foorammásee rarisámeeqee quqásaanaura, sía misá qiandée reendeená kai ianáura áanóommasee qianáura.

7 Ínnee faiqí nífusaa akooqóo ainaina faiqí nipata kai qáfamásee eedóo qímariasa áaqee máriasa máriafanoo sía naunduráki qáfee máriasa máriafanoo. Ínniki moó fannoo ásauku mundírana aináinira fasiqee qímarifa sía naríara kai miqí marúnausee qíannoo maasára nipata mandáikirausee qímariana maasá faqa ásauku mundírana aináinira fasiqa máridaqa. 8 Ásauku mundírafa maasára qinée niqiqáafanna fasiqausee qímasee mi-uriqarara afeekána qímufaqa minára firaaqóo ufa qufaqa ínnee irisée qiníara firaaqóo narí amooqímari fee qiafaqa iriséeqa sía minára qisaurídaqa, sía qiní afeeka ínni rakéemma áqirafa máridanoo ínni dadaaqírafa poodúqammánnisarafa máridanoo. 9 Qinée sía qeeqá pasannái ínni rufíarana nímiraree qídaqa. 10 Akaqáusa maaqí qifáranoo Pauroofa narí ákara ríranaki afeekaikámandee qímaqimidanoo, narí uqanna aniréenoo reendeenídanoo narí ufa faqa fífau máriannoo. 11 Miqí qímariasa maa-ufána íriaqa, maasá níanai máridaqa ákaraki qíanna ufafa faqa naaqáqari márida qímariannufafa faqa amanamana kái máriannoo.

12 Miqí qímaria fasiqausa náriara úriqararausee qídaqa miqí qímariafanoo. Maasá sía miqí qímariasasaa qeeqá qimanianáura. Misá fúrufari maríasa máridaqa. Misá nánasaa fee narí amani narí amani ídee nári íriranannai kai náriqa úriqarara ainainee qímasee minánnai kai nári nimanídaqa. Sía Yísuna íriranannai narí amani narí amanidaqa. 13 Maasá qeeqára qianáura maasá qeeqá qimooqíra óosirana sía fíaikátaanaura miqóoqari kai óorurandanoo máriannoo. Qinée sía akaqáusa naanna rée moona óosiranaki máriasara qeeqá qimooqianáuranoo qiqá qoosúki marínausara kai qeeqá qimooqianáura. Ánutufa maasá saiká máree márunna óosirana narí kai quqáqaifanoo máridanoo minakí kai marídaqa ínnee faqa minakí kai maríafanoo. 14 Ínnee minakí maríanara iriséeqa ínniki óonureeqa sía fínnaaqaraidaqa. Maasá ásauku mundírana ámiqira fasaasa ufa mara maréeqa sía mi-oosirána fía̱ikáteeqa minakí kai máridaqa ínnisaimbaqa máriqiafana.

15 Maasá Ánutufa qímu oosiranakí kai ínniki aináinidaqa, akaqáusa fía̱ikátammásee aináinidaqa maasá sía misá fuaqóo fídaqa qeeqá aináiniranara qeeqá qimooqídaqa. Maasá Ánutufa qímu oosiranaki maqee maqee miqóo kai minakí kai aináinidaqa maasá ínniara maaqí qídaqa, Koorinti máqannaasa Ánutunasaa atooárafa firaanáikinoo maasá saika mi-oosiránaki firaanáikiannoo. 16 Ínniki aináinirana taikásee miqóoqari kai ínni fínnaaqaréeqa moo átinai moó fannoo sía aináinimarinaki óonuree minakí ámiqira fasaasa ufa qímannimianaura. Miqímmasee sía qinée akaqáusa naanna réeqa misá moosáa áfuqaki aináinamasee nári nimooqídaqa. Qinée sía miqíanaura qeeqára fúkasaa moo áfuqakiara foora aináinianauranoo.

17 Óoqeenáa tamummáqara fasiqauqa minára maaqí qímasee ákara ríqau.

18 Qinée Pauroosa minára maaqí qídaqa. Karaambáiqa fannoo moo fásiqara ámiqira fee qínafa kai ámiqira fasiqa máriannoo, narí kai naríara ámiqira fasiqee qínafa sía ánoona márina fífau máriannoo.