1 Dóo maqee qaaramoo kífaqa ínni Koorinti máqannaa níndafarara fuanáura. Qinée óonuraanaqa moodáa fasiqa anirée ínniki mandóosanara qínnana síamma írianaura tamummáqara fásiqa ákara ufamáu fíqa qaara fasiqafee qaaramoo fásiqafee mi-mandainainá qáfee márianara kooroo qífaqa qinée minára ánoonee qímasee ufa qianáura. 2 Qinée óoqai indaarú ínnee unnái fiqíafana ínaaqiana kafáa fíqa maa-ainainára qímannimiqiafana, maqee moosáa márunannaindari kafáa mi-ufána kai qímannimianaura. Maqee óonureeqa sía qía̱afánnandee íreeda qímannimianura, maqee sía moó fannoo qinée ufannái náríara foora qíananoo rufíaki sandáannoo. 3 Ínnee qiníara randée maríafanoo. Ásauku mundírafa Pauroonasaaqari kúqaa fee ufa qídanoo fee únna qídanoo fee qiníara qímariafanoo. Qinée ínnee iannái óonuraana kari ásauku mundírafa qinísaaqari qímannimirana firaaqóo qímannimiannoo. Ásauku mundírafa ínni ufa íridanoo sía kudoosaápaannoo narí afeeka ínni uqannífiqaannoo. 4 Mifá kudoosaáparanaki aunírira saqárisaa kúqufa márifa Ánutuna afeekannái fíndufumáfinoo mi-afeekaikiránaki máridanoo. Maasá Yísuna faqa moodáanaki máridaqa kudoosaápaqa máridaqa maasá ínni Koorinti máqannaasaki óonuree ufa qídaqa maasá Ánutuna afeekannái ásauku mundírana faqa kúqiranakiqari fíndifidaqara foora afeekaikámándee máridaqa qímannimianaura.

5 Ínneeqá kai ínneeqa márirana nimanamándee qáfaaqa, kúqaa fee Yísuna mandaaqára óosanamau fídee. Ásauku mundírafa ínni naunduráki márifaqa ínnee minára íridee sía fee íridee ínnee káaqa uqanna kadíqaqa máridee. 6 Maasá ínnee iannai óonuraanaqa ínnee maasá sía kadíqaqa máridee qifáranoo. 7 Maasá ínniara Ánutunara innaaru qídaqa sía ínniara mandóosanaki áqufuaqee qídaqa. Sía maasá saika ínniki ánoonaikianífee qímasaidau innaaruqídaqau, ínniara andeeqáramau fuaqée kai qímasee innaaru qímannisaidaqa. Maasá kadíqarana amaná, ínni andeeqáranara kai íridaqa. 8 Sía maasá amana Ánutuna ánoona ufa ititáanaura miná dadaaqírana kai amanaikírafa máridanoo. 9 Maasá qeeqá kudoosaápaida ínneeqa afeekaíkifaqa maasá miná qáfammasee asasianáura. Ínnee ámiqimandee andeeqárausaikamambi máriaqeera innaaru qídaqa. 10 Karaambáiqa afeeka úriqararana qímuna, sía ínni rapéepaamma áqira úriqararana qíminau, ínni poodúqarana qíminau. Qinée ínnee iannai óonureeqa karaambáiqa úriqararana qímuna mara máree áanoomandee ínni ufa sía nímianoo qímasee moo átinai márunaqooqari maa-akarána rúmannimaqaanaqa ínneeqá kai andeeqásee márifaqamma óonu níndafa.

11 Qiní qíkaqaafasaa dóo maqee ákara taikáanaura. Ínnee káaqa andeeqáranara afeekaikámasee márararee qímariasa máriafanoo, qiní ufa qúnnana ámiqimasee íriaqa, sía naríara naríara rairaiqiaqa, moodáanaki máridaqa asooáranaki máriaqa. Faiqí ánaaseera nímuqusirana nímimari Ánutufa faqa naundurá asooárana nímimari Ánutufa faqa ínni faqa máriani.

12 Ánutuna ufa írimaria fasiqa anaaseesa aiqáma ínni nímandaidaqa.

13-14 Ásauku mundírafa Yísufa maasá karaambáiqa miná asasamásee dadaaqíra oosana faqa Ánutufa faiqí ánaaseera nímuqusirana faqa náaquqara andeeqara maraquna moodáanaki kírana faqa ínni aiqámausaki faqa máriani.