1 Óo Koorinti máqannaasa ínnee Yudeea máqa maaqaki Ánutuna saiká máree maríasa nárana sárauqi márianara munnimma káqi nímiranara qiní iraafaqa minára ínni qímannimidaqa. Qinée Karatia máqa maaqaki Yísuna ufara suqímarusa qímannimiafannaqoo miqóo kai fuaqa.

2 Aiqáma amaana fáasaanasaa aiqáma fasiqa anaasee akaqá munnimma áaduma rainá quqáaqa. Narí aináinirana ákiaqara munnimma firaaná márainafa miná amana kái káqikaana quqáani káqikaana márainafa dóo narí máraina amana kái káqikaana quqáani, qámbaana amana márainafa dóo miná amana kái quqáani, ínnee aiqáma amaanasáa amaanasáa miqíkai ídaqa rainá quqéesaifanoo innooqáfinaqa qinée ínni maqúsai óonuraanna kári munnimma suqírana sía máriani dóo fáasai suqínoo máriani. 3 Ínnee maqee andeeqára fasiqauqa mara quqásaifaqa qinée óonuráanaqa mi-munnimmána faqa pásakina ákara rúmasaanaqa misá mi-pasána faqa mi-munnimmána faqa máreeqa Yeerusareenni múru káqi nímiaqa. 4 Ínnee qiníara faqa óoru fúannee qífaqa qiní faqammóoru fífaranoo.

5 Qinée maaqóoqari Maseedoonia máqa maaqakina óonuree anirée iqá nínii taikásee ínnee máriannai fuanáura. 6 Ínni maqúsai óonureeqa káqi kaaqoó kísaaqasaa ínni faqa márianauree, áukuana áiqaramáfinaqa qámbaanasaqa suara áukuana qaaramoo qúqoona ínni faqa márianauree. Dóo miqóoqari moosáa fuanáura yáifee fuanáuree maqee sía íridaqa. 7 Karaambáiqa eedóo qínnanara káqikaaqoo kísaaqasaa ínni faqa márianauree qídaqa. Miqóo ínni fí ínni níndafee fíranara qidaqá.

8 Qinée maqee Eefeesusa máqusai káqi márianaura. Yeerusareenni Yuda máqannaasa qoomáqa suqánee maru quqoonáfa aniráinaqa qinée minásaa Eefeesusa máqusaindari Maseedoonia máqa maaqaki óoruree minní óonuree anirée másee miqóoqari ínnee iannái Koorinti máqusai fuanáuree qídaqa. 9 Maqee Eefeesusa máqusai maaqóo firaa saiká ánoona saika máridanoo, moómoosa qiní ufa ititée maríasa máriafaqa saikídaqa.

10 Qinée Timootinara qímannimianaura, mifá ínni maqúsai óonuráinaqa ínnee miná ámiqi ámiqimmásaifanoo afaaqa quqáani, mifá qiní daanna rée marífa karaambáiqa aináiniranaki marífa máridanoo. 11 Timootifa Yísuna ufa írimariasa qiní qíkaqaafasaauqa sáimbaqa mootínai áiquqaki maí ániraree qímasee ínni maqúsai náaree aniréenoo maí qinée minára rakísi márunnannai Eefeesusa máqusai ánianifeera qídaqa. Ínnee Timootinara kumaaráa fee qímaseeqa sía minára níkoo nikaa iaqa ámiqimmandee dadaaqífanoo asooáranakiqari fíndifinoo maí ániani.

12 Dóo maqee maasá qíkaqa Apooroosanara qianáuranoo. Qinée ínnee iannái qíkaqaafasaauqa faqa namummáqee fíqa ánianneera qídaqa fuki faakí qúnanoo sía fídanoo ititammásee káqi máridanoo maqee sía fuanáuree sía andeeqára aukuanee qídanoo. Kásooqaqee andeeqára aukuana kambíqafinanoo fúannoo.

13 Ínni Koorinti máqusanaasa maqee maa-ufána qímannimianaura. Ínnee maqee maqee aufárida maríaqa, ínnee Yísuna saqárikiranaki minakí mapukúfina kikíqammambuaqa ínnee maqee maqee paasóosida máriaqa, afeekaíkiqa máriaqa. 14 Ínneeqa máridaqa aiqáma nírana márirana nímuqusí marínaqa narí dadaaqí narí dadaaqí qíqanuaqa.

15-16 Ínnee Sateefanasana faiqi ánaasee áiku ásaukuara írimariafanoo, misá Akaia máqa máaqakiqari óosanarasee Yísuna saqárikusa máriasa máridaqa. Misá Ánutuna ufa írimariasa aináinammánniséemariasa máridaqa, narí faiqi ánaasee faqa nári márirana minakí kai nifaaqa quqásee áuqaidaqa. Óo qiní qíkaqaafasaauqa ínni qímannimidaqa. Miqínna fasiqana aanna réeqa miná ufamau fuaqa, akaqáusa misá dadaaqímariasa misá ufamau faqa fuaqa.

17 Mi-fasiqáfa Sateefanasafa faqa Fooratunatusafa faqa Akaikusafa faqa misá maí aniroofaqa níndafaida asasiqíafana, misára ínni Koorinti máqusanaasa áni áni aniréera foora qufaqa asasiqíafana. 18 Misá ínni asasírana nímimaríandee kai íqa qiní qímiqau. Miqíra fasiqauqara aiqámausa íriaqaana.

19 Asia máqa maaqaki Yísuna ufara suqímariasa misá ínni nímandaidaqa. Maaqóo Akuirafa faqa narí ánaaqa Pirisikira námmarifa faqa nári máaqaki Yísuna ufara suqímariasa faqa ínni firaaqóo ámiqimmándee Yísuna ufa írimariasara foora ínni nímandaidaqa. 20 Maaqóo máriasa Yísuna ufa írimaria qíkaqaafasaauqa faqa ínni nímandaidaqa. Ínnee naríara naríara níkaqafasaa fee qímasee narí ámooqee narí ámooqee iaqa.

21 Faiqí moó fannoo qiní dóokinaana iriséenoo maa-pasána ákara rínau, maa-qusa ufána átisaa qeeqá qísaukunnai ákara ruanáura. Qinée Pauroosa ínni nímandaidaqa.

22 Karaambáiqara sía ámuqusímarínafa áqurarara ufa minásaa máriannoo. Nári ufakíqari maranata, maasá ufakíqari maasá karaambáiqa qúmuannee qídaqa.

23 Karaambáiqa Yísufa narí áfaarira óosana ínni faqa nímiani.

24 Maasá aiqámausa ásauku mundírana Yísunaki máriasara irisée qiní qímuqusirafa ínniki máriani.