1 Ásauku mundírafa afaaqasáa aupúrarana narí apatasáa máranau. Ínnee miqíannee qímasee afeekaikámandee deedaqammásee máriaqa. Yísuna ufasáara nipatasáa nídafirana máreemariasa miqóoqari sía mandóosanna máree maríannai ubeekeefáranoo níkooqaina ámiqira aanai ubeekeefáranoo.

2 Nipatasáa nídafirana nárúqooqari ínnee maa-maqánasaa máridaqa ínniqa nídira mandainaina fannoo sía ínni mara quqáannoo, Ánutuna írirafá kai ínni maréeqee quqáani. 3 Óoqai ínni márirafa maaqímminoo márinau. Nári nifaaqa kooroo kooroo íranara faqa, faiqí ánaasee naríara naríara káaqa rírana faqa nammári námasee fúrufarimariana faqa faiqí ánaasee suqúfi mandá óosana máree maríana faqa moómoosa suqúfifaqa nammári néemariana faqa únnaqira ánutunara innaaru qímasee miná áuqusaa mandóosana máree maríana faqa ínnee mináuqaki kai indaarú maríqau. Dóo ínnee óoqaindari kísaaqasaa minakí kai máriusa máriafanoo dóo saaqa amanaikíqa mariafanoo maqee sía minakí máriaqa. 4 Óoqai ínnee faqa misá faqa mandóosana qámbaanai áqufiqa máriusa máriafanoo dóo maqee sía misá faqa fuafaqá misá tautíqa áanooqíqa aasaandaana mandúfa ínni qímannimaqaidaqa. 5 Kásooqaqee misá faqa Ánutuna áfusaa nári mandóosanara kooroomásee miná ákiqara máreefaranoo. Ánutufa káqi máriasara faqa kúqirausara faqa ufa iriséenoo raináranara deedaqammásee máridanoo.

6 Minára kai ámiqira fasaasa ufa Yísufa kúqirausa qímannimisoofaqa íriqau. Mi-kuqiráusa káqi maaqóo márufanoo Ánutufa aiqáma faiqí ánaasee ímariandee kai ínoo rainánnímaqásoofaqa kúqiqau. Mi-kuqiráusa nimana Ánutufara foora náaru náaru máriranaki máriaqeera ámiqira fasaasa ufa qímanniminau.

7 Dóo aiqáma ainaina taikárafa adeedíranoo máridanoo. Ínnee maqee maqee Ánutunara innaaru qíraree qímasee ínneeqa nimanara irisáida kai fuaqa maqee maqee aufarídaqa máriaqa. Ínnee sía miqíqa áaqara oosana máreeqa náqimasee Ánutunara innaaruqifáree. Sía amanaíkifara. 8 Aiqáma ámiqira ainaina úrinaaqararafa maafá máridanoo, sía nífaurunnoo kai únna qímasee naríara naríara ruaqa, nísaukunnoo dadaaqírana faqa nímuqusannai faqa naríara naríara ruaqa. Naríara naríara nímuqusirafa moómoo mandá óosana rafáaqafídanoo.

9 Ínnee narí máaqaki narí máaqaki kéeqafi nárana suqásee naráaree naráareemásaida náa. Ánaamuru faqa paqúrimandee miqí kai iaqa. Sía aundurá rumbée márinana miqía aundurá idukínoo márinana miqía. 10 Ánutufa áfaarinoo óosana óosana ainaina akoofásaikirana níminnana aqoónnana dadaaqíaneera níminoo sía ínneeqára kai maqéeiaqeera níminoo. Ínnee Ánutufa nímimari ainainnasaa ámiqira rakísiranara foora rakísidaqa náadu náadu níminna ainaina akoofásaikirana marasée minánnai niqoónausa dadaaqiaqa.

11 Amaana ufa qímannimimari fasiqafa Ánutuna ufa kái qímannimiani. Faiqí dadaaqímariasa Ánutufa nímimari afeekanannai afeekaikámasee niqoónausa dadaaqiaqa. Miqínanoo aiqáma ainainiranaki ásauku mundírana Yísunannai Ánutuna amooqíra ainaina kambíqafuannoo aiqáma areenarafa faqa afeeka faqa náaru náaru márianinafa mináindi Yísunaindi kai máridanoo. Kúqaa.

12 Óo qiní qífaaqasáa qíqoondiuqa, qinée Peetooroosa qímannimidaqa. Ínnee Yísuna ufara aupúrarana máree maríasa sía taútiaqa nánee moo mánda áinaina maasáki kambíqeenoo fee qímasee múnari mínari sía iaqa. 13 Káqi asasa kái iaqa. Maasá ásauku mundírana aupúrarana náida qímina máraidee kai qímasee asasiaqa. Miqífanoo innaarúnaindari miná káaqa aréenarafa faqa kooroomámbinaqa maasá asasírana qumbiqárausa márianaura. 14 Óo qiní qifaaqasáa qíqoondiuqa, qinée Peetooroosa qímannimidaqa. Ínnee Yísuna ufasáara aupúrarana máree maríasa asasiaqa káaqa aréenarana maraquna Ánutuna maraquna maasá náakinoo máridanoo fee qímasee asasiaqa. 15 Yísuna áuqusaara aupúrarana nímifaqa asasiaqa, mandóosana ákiaqara aupúrarana nímiranara eeráiriaqa. Ínnee Yísuna ufa írimariasa ínnikiqari sía moó fannoo fidíka ruqíasainanoo kúquani sándufa rukíarafa faqa sía máriani, úmmuarirafa faqa sía máriani, moosá mandáinainaki kéeqaranara ínnikiqari moó fannoo sía uqanna mi-mandoosanná marasée miná ákiaqara aupúrarana máraaqa. 16 Ínnee Yísuna ufara aupúrarana maraséeqa sía minára nisaurúaqa, Yísuna áuqu maasásaa márinara Ánutunara dúfi dúfi qiaqa.

17 Ánutufa aiqámausa ufa írira aukuana dóo ani máridanoo. Ánutufa narí faiqi námu ufa náaree íriannoo. Íridanoo misá faqa aupúrarana nímiannoo. Miqí qímasee níminanoo Ánutuna ufara níkooqee marisa náqi fee íannoo fee firaaqóo uqanna misá ufa nímiannoo. 18 Óoqeenáa tamummáqarausa ákara minára maaqímminoo máridanoo.

Tamummáqara fasiqa ufa miqí qímaqoofa máridanoo.

19 Minára iriséeqa Ánutuna íriranasaa aupúrarana máree maríasa nári ámiqira máriranannai nári nifaaqa nári áuquqoo fásiqanasaa nári nifaaqa ámiqimasee quqásee márifaranoo. Ínni áuqufa óoqai qíma afeekaikámmaqoofa márifanoo dóo miqóo kai fúannoo sía rakéeiannoo.