1 Óo Koorinti máqusanaasa qiní qíkaqaafasaauqa óoqai Mooseefa Isipa máqusaindari maasá Yuda máqannaasa qikeekú qikaakú nífiqee nári máaqai fiqau. Qinée minára qímannimianaura. Misá Isipa máqusaindari sandéemarufanoo namuqáa nárí foo qímasee Ánutufa qufanoo qoonnámu fannoo misá nínaaqiannai aiqámausa ititáfufaqa ámiqimasee anirée Taatuqée námmari taqámareeqa fiqau.

2 Mi-qoonnamúnaki faqa mi-nammarína Taatuqée námmari táqoonara amaana námmari kíkiqusidanoo faqa Mooseefa mi-nammarínaki misá aiqáma ukúqnamáseenoo uqéeraseenoora foora másoofaqa aiqámausa Mooseenaindí kámmambiqau. 3-4 (Misá miqóoqari káasau maqa maaqaki fímarufanoo Ánutufa aiqáma kánanaana kananaana nárana maqásaa quqásoofaqa marasáidaqa néemariqau. Nammáriara nídufanoo Ánutufa Mooseenara qufanoo óonikiqari nammári qúmufaqa naqau.) Qinée Pauroosa minára maaqí qídaqa. Misá aiqámausa innaarúnaindaraana moodáa feemu naqau, aiqámausa innaarúnaindaraa nammari moodáa naqau. Mi-nammarífa innaarúnaindaraa óonikiqariara foora qúmimarufaqa naqau. Mi-oonífa ásauku mundírafa misá faqa kukéeqasee nímarufa márinau. 5 Misá miqíqa fídaqa sía minára írirai moómoosa uqanna mandóosana marasoofanoo Ánutufa qufaqa misá kúqufanoo misá irí fannoo mi-aadana maqa maaqánaki fúrufaramminau.

6-7 Mi-aiqama ainaináusa maasá aaquqímaqimaqarafa máridanoo, maasá faqa miná irisée sía misá naanna raanáura, sía mandá nídi mari ainainnara randáanauranoo sía misá naanna réeqa túmunnai áuqira afaannara faqa innaaru qianáura. Mooseena ákara minára maaqí qímasee qídanoo.

8 Qinée Pauroosa miqúnara qímannimianaura maasá sía misá naanna rámasee faiqí ánaasee narí úmmuara narí úmmuarianaura. Misá miqímarunara moodáa faasaana (tuenti tiri tauséena) núkudara foora téeqiqau moómoosa uqanna ráurukaqau. 9 Maasá sía misá naanna réeqa karaambáiqa amanamándee qáfaanauranoo. Misá akaqáusa miqímarunara sakáni fannoo nárímarufaqa kúqimariqau. 10 Ínnee sía misá naanna réeqa Ánutunara ninunúruaqa. Misá miqí marúnara kúqira qángiroo fannoo anirée moómoo nárinau.

11 Mi-aiqama ainaináusa akaqáusa aaquqímannimaqáaqeera misásaa kambíqanau. Maasá maqee máriasa aaquqímaqimaqáaqeera Ánutufa qumeé dadaaqufaqa miqóoqaraafa moó fannoo ákararinau. Maasá taikára aukuana adeedí ráinaqa márinara áaqaranara rufíaaqeera aaquqídaqa.

12 Faiqí moó fannoo naríara qeeqá afeekaikíranannai kikíqiqa máridee qínafa rufíaa, anée Isaraee máqannaasa naanna rámasee áqufinafaara. 13 Aiqáma nimanírafa ínnisaa áqufinafa aiqáma máqannaakí maqee maqee kambíqee mari ainainafa máridanoo. Ánutufa minára íridanoo narí dadaaqíra ufara kai íriannoo. Íridanoo firaa nimanirafa aniréenoo ínni úrinaaqareenoo rafáaqafínafa aniráinanoo Ánutufa afeeka níminaqa ínnee amaná mi-nimariránaki mári ínaqa miná úriaaqarée faranoo. Ánutufa ititáseenoo fímariaana uqafíqainana fí ruíqakinana finnáranoo.

14 Óo qifaaqasáa qiní qíqoondiuqa túmunnai áuqira afaannara innaaruqíranara níanasaa rufíaaqa. 15 Ínnee Koorinti máqusanaasa óoqeenáasa írirana faqaasa máriafanoo. Ínneeqá kai qiní ufa irisée óonumafi rainásee íriaqa. 16 Maasá áafaqa náidaqa káafakinaa nammariara Ánutunara dúfi dúfi qímasaidaqa mi-kaafánakinaana náidaqa ásauku mundírana fidíka náida fee qímasaidaqa maasá káqikaa feemu faqa ruqí ruqímasee náidaqa maasá ásauku mundírana amaqí náida qímifaqa náidee qídaqa mi-feemúna náidaqa. 17 Moodáa féemu kai márina maasá moómoosa ruqí ruqímasee néemarianara moodáara foora máridaqa.

18 Qeeburu máqannaasa moo núqu Isaraee máqannaasa náriqa aandáu̱ tatúfira óosanara íriaqa. Faiqí anaasee moó fannoo aandáu̱ maramáree Ánutuna aanáiqiki maru fasiqana amisoofanoo aandáu̱ tatúfinoo naríara akaqána marasée néemarufanoo aandáu̱ ákoofa narí áiku ásauku faqa múduka nanau. Misá qiqau, maasá Ánutuna tatúfira qáindasaa qaraana náida qímifaqa náidaqa miná faqa moodáanaki máridee qímariqau.

19 Dóo qiní ufa óosana náqi fee ínoo máridanoo fee dóo maqee mi-ufána koorooianáura. ínni maqúsanaasa nárana maraséeqa túmunnai áuqira afaanna ámidee qímasee tatúfimariafanoo. Mi-tumunánnai áuqimaria afaannána amana sía ánoonau káqi fífau túmu kai máridanoo. Mi-narana tatufiráfa faqa sía ánoonau, káqi nárana kai máridanoo. 20 Sía Yísunara írimaria fasiqauqa mi-fifau naranná marasée sía Ánutunau amisée dúfi dúfi qídau, áfaannauqa nimisée dúfi dúfi qídaqa miqídaqa. Ínnee Yísuna ufa írimariasa áfaanna náida nímimaria naranara ínnee sía miná naaqéera qídaqa qíkooqaidanoo.

21 Ínnee karaambáiqa áafaqa náidaqa Yísuna káafakinaana nammári námasee sía amana quándakina áfaanauqa káafakinaa nammari neefáranoo, ínnee Yísuna áafaqa náidaqa karaambáiqa qaindásaaqaraa feemu námasee sía quándaki áfaannauqa qaindásaaqaraa feemu neefáranoo. 22 Ínnee Yísuna áafaqa námasee quándaki áfaanauqa áafaqa námasaifanoo karaambáiqa Yísuna qáfamaseenoo rairaiqíannoo. Ínnee Yísufa ínniara rairaiqíanifee qímasaida fatá fáta ídee miqídee, ínnee maasára karaambáiqa úraaqáraidee qída fee miqídee, sía amana karaambáiqa úriqaréefaranoo firaa nariranaki áqufifoora.

23 Akaqáusa minára maaqí qídaqa. Maasá amaná aiqáma óosana ámiqirana faqa mandáikirana faqa mináuqa máraanauree qiafaqa qinée Pauroosa minára maaqí qídaqa. Kúqaa aiqáma nána ainaina amaná máraanaura, sía aiqáma ainaina ámiqirafa máridanoo. Akaqáusa maaqí qídaqa aiqáma óosana amaná maasá máraanauree qiafaqa qinée minára aiqáma óosana sía faiqí ánaasee dadaaqímaria óosanafa márifanoo fee qídaqa akaqána kurídirafa máridanoo. 24 Sía moó fannoo narí áidi marí ainainna narí íriranaki úriqaranoo máriani aqoónausa nídimari ainainá kai narí íriranaki úriqaranoo máriani.

25 Ínnee Koorinti máqusanaasa aandáu̱ máree makéetai fímariana akaqáandau arusée aukúsee túmunnai áuqira afaannara dúfi dúfi qímasee makéetaki quqásaafaqa feefaurídaqa. Akaqáandau káqi arusée aukú quqásaafa feefaurídaqa. Ínnee Yísuna ufa írimariasa makéetaki kéeqafi ínneeqa aandáu̱ márararee qímasee óonuree sía túmunnai áuqira afaannara dúfi dúfi qínnanara irámasee eeráiriaqa káqi mána mána máraaqa. Aninná karaambáiqa saqárikiananoo aninná áakirafa márina sía minára irisée eeráiriaqa, káqi máraaqa. 26 Óoqeenáa tamummaqara fasiqauqa ákara minára maaqí qínoo máridanoo.

27 Qinée Pauroosa minára aiqáma ainaina káqi naaqée qídaqa. Ínni Koorinti máqusanaasaki Yísunara sía írimariasa moómoo máridaqa. Misákiqari moó fannoo aníara maí anirée qiní faqa nárana náannee qínana áidinana káqi miná faqa óonuree miná faqa nárana náa. Anée mi-naranna aandauná naanéera aneenná áakiranara káqi kaaqóo óonumafi írinana sía eeráiria káqi náa. 28 Anée mi-naranná naanée qínanoo moo fasiqa fannoo qímaminoo túmunnai áuqira afaanara dúfi dúfi qíra nárana máridanoo qínana anée aní qímami fasiqana áakiranara irisée sía náa. 29 Sía aninná áakiranarau qídau aní qímami fasiqana áakiranara qídaqa. Ínnikiqari moó fannoo máa̱ qúnnufana irisée maaqí qíannoo, nánaree qinée mooná áakiranara íriananoo fee mifá qiní ititáqimaqaannoo fee. 30 Dóo qinée qeeqá náranara Ánutunara dúfi dúfi qímaseeqa nánaree moó fannoo anirée qiní nárana aandáu̱ra qáoo qíannoo fee.

31 Qinée Pauroosa minára maaqí qídaqa Ínnee nárana nammári aiqáma ainaina néemarianara sía fee naanáuree, naanáuree, nána ainaina innáree, Ánutuna amooqíra ufa kambíqee márimau kai fuaqa. 32 Ínni márirafa káqi mána mánifaqa níndafamaseeqa Yuda máqannaasee ánaamuru fee Yísuna ufa íri maríasee ínni níqafamasee nóori runífaara. Ínnee minára irisée mi-oosannára eeráiriaqa. 33 Ínnee qiní daanna raaqa sía qinée qeeqá dídirana qeeqá qifaaqa ámiqi ámiqiranara íridaqa aiqámausara iriséeqa misá nídiranamau fídaqa, aiqámausa innaarúna ásumu máraaqeera miqídaqa.