2
Ásauku mundírafa auníriranasaa kúqunara minára kai qímanniminau.
1 Óo qiní qíkaqaafasaauqa qinée Pauroosa Koorinti máqusai óonuree Ánutuna ánoona ufa sía óoqai írirana faqaasa ufannái faqa sía úriqarara íriranannai faqa qímannimiqiafana. 2 Qinée qeeqá maaqí qímasee qímiriqa, qinée Koorinti máqannaasa qímannimidaqa qeeqá írirana aunúsee ásauku mundírana Yísunara kai qímannimianaura, mifá auníriranasaa kúqunara firaaqóo qímannimianauree qíqa. 3-4 Qinée minára iriséeqa ínnee iannái óonureeqa qeeqá ummooqukíranara iriséeqa máparaa ídaqa dáindiri rée marinaqa sía faiqí faiqi írirana faqaasa ufa faqa náufakiana faqa Yísunara qímannimiafannana. Qímannimi maríafananoo Ánutuna maraquna afeeka fannoo ámiqimasee qiní ufa ánoona uqannífiqanau. 5 Ínnee minára íriqa ínneeqa Yísuna saqárikirana sía írirana faqaasa íriranasaa fau mundínoo márinau. Ánutuna afeekasáa mundínoo máridanoo.
Ánutuna maraquna fannoo Pauroona dadaaqufanoo qímanniminau.
6 Qinée sía faiqí írirana marasée aiqámausa qímannimidaqa, akaqáusa Ánutunara firaaqóo mapukúsee írimariasa kúqaa qinée írira ufa misá qímannimidaqa. Sía maa-maqánasaaqaraasa íriranau misá qímannimidau, sía maa-maqánasaa rakísimari afeekáusa íriranau qímannimidau dóo misá afeeka taikáidanoo. 7 Qinée qímannimi marunna írirafa Ánutuna óoqai kukéeqara irirana innaarúnai asumu nímimarina qímannimidaqa mi-irirána faiqí sía nífu qáfaafa. Maa-maqa maaqáfa sía máru kamuqoo Ánutufa mi-irirána útaaqamáseenoo minánnai maasá narí aréenaranaki innaarúna ququsaki kéeqaaqeera útaaqanau. Qinée mi-irirána misá qímannimidaqa. 8 Óoqai maa-maqa maaqánasaa rakísirausa sía mi-irirána íriqau. Íriqau innaarúna aréenaranakinaa karaambáiqa sía qumáreefau aunírira saqarisaa árini. 9 Óoqai tamummáqara fasiqa minára maaqí qímasee ákara rínau.
Faiqí sía qáfee maru ainainnara sía íri maru ainainara sía faiqí moó fannoo minára kambíqaannoo fee qímaru ainainnara, miqíra ainaina kai Ánutufa deedaqammáseenoo naríara rímariasa kai nímiannoo.
10 Qinée Pauroosa minára maaqí qídaqa. Maasá ínni sáimbaqa Roomma máqannaasa námufaqa Ánutufa narí maraqunannai narí óoqai kukéeqara írirana qíminau. Ánutuna maraquna fannoo aiqáma ainainara randásee aiquqummásee qáfaidanoo. Sía akooqóo ainaina kai qáfaidanoo Ánutufa náaru kambíqaaninna kukéeqara ainaina farúmara foora unaurínoo márina miná faqa aiquqummásee írimarifa márunara Ánutufa narí óoqai kukéeqaqoo írirana ínni sáimbaqa qíminau. 11 Faiqí naundurákinaa maraquna fannoo mi-fasiqána aundurákinaa írirana aiqáma íridanoo. Miqí kai ínoo Ánutuna maraquna fannoo Ánutuna aundurákinaa ainainara aiqáma íridanoo. 12 Ínni sáimbaqa sía maa-maqa maaqánasaaqaraa maraquna mároosa máridaqa. Ínni sáimbaqa Ánutufa niqiqoo máraquna mároosa máridaqa Ánutufa minánnai innaarúnai asumu máreemariana faqa minásaaqaraa naundurá adíafaairana faqa níminau.
13 Qinée minára irisée maaqí qímasee qímannimidaqa, maasá sía faiqí írirana uqannífiqee maría íriranau qímannimidau, Ánutuna maraquna maasá uqaqífiqoo ufana ínni qímannimidaqa. Maasá innaarúnaindaraa ainainara Ánutuna maraquna mároo fasiqa anaaseesa qímannimidaqa mi-ufána kai ínni qímannimidaqa. 14 Ánutuna maraquna síai fasiqa anaaseesa sía amana Ánutuna maraquna faiqí ánaasee dadaaqímari afeekana nímimarina sía amana máreefaranoo. Misá mi-ainainná qáfamaseeqa sía minára íridaqa fúrufara ainainee qídaqa. Sía miná óosana íridaqa maraquna máree maríasa kai amaná miná óosana aiquqummáseeqa írifaranoo. 15 Maraquna máree maría fasiqanaaseesa innaarúnaindaraa ufa aina aiqáma rainá rainá másee írimarifaranoo. Maraquna síaisa káiqeesa sía amana maraquna faqaasa máree maríana óosana írifaranoo. 16 Óoqeenáa tamummaqara fasiqa minára maaqí qímasee ákara rínau.
Yáfee moó fannoo Karaambáiqa íriranakinaana íriannoo fee. Yáfee moó fannoo Karaambáiqa aamúaqira ufa amaná ámiannoo fee, sía amana moó fannoo miqíannoo.
Tamummáqara fasiqa ufara qinée Pauroosa minára maaqí qídaqa. Sía moo fannoo amana aamúaqira ufa Ánutuna ámiannoo mifá nímimarifa márinara. Maasá kai ásauku mundírana írirana dóo máreeqa.