1 Abaraqaammafa muqunnisoo qangirooqanda Soodoomma maqusai ooquree maqusa kooqiki qafoofanoo Rootafa miqoo ooqu faaqee marinau. Maridanoo Rootafa miqanda nindafeenoo maqeenoo oonu miqanda noorinni oorindari maqasaa rupaitama fufanoo maaqi qimasee qimanniminau. 2 Oo qini uriqarara qanda qinee inniqara dadaaqirara maridaqa. Innee qara qini maaqaki aniree niku nammari uqusee qini maaqaki faiqaaqa. Faiqee duna kananaana findi finaqa inneeqa finnannai fuaqa. Miqi qimasoofaqa miqanda qaoo qida qiqau. Saina maa qanda maqusa qambaana faiqaanaura.

3 Rootafa sandanainai qimaseenoo ufaqa miqanda mina faqa maaqaki keeqaqau. Ooru roofanoo Rootafa narí ainainira faiqiuqara qufaqa misa ooruku anoona sia qai feemuna faqa amiqira narana faqa suqasee nimufaqa naqau. 4 Namaseeqa faiqarara imarufaqa mi maqusaanaasa faiqí kumaaraa nauraiqi aiqama aniree Rootana maaqa fuseemma dati mambufaqa Rootana maaqi qimasee aaraqau. 5 Mi faiqi qanda faasai ani maaqaki keeqaa qanda yai fee maridaqee. Anee miqanda maasa qiminaqa mi qanda manda oosana nimia.

6 Rootafa misa ufa iriseenoo rauda mafinoo narí aanaaqianaindari kooqi ititasee qimanniminau. 7 Qinee qaoo qira ufa inni qimannimidaqa. Sia uqanna maa manda oosanna maraaqa. 8 Iriaqa, qeeqa qiraamuna qaara qanda sia faiqí faqa nuaqanda inni nimisaanaqa inneeqa iriranannai kai maraaqa. Maa fasiqa qanda qini maaqaki ani raafaqa aqoondi kammaqauna mariafaqa qinee amiqimmasee miqandasaa rakisidaqa.

9 Miqi qimasee qimannimisoofaqa misa aiqama maaqi qiqau. Anee moo maqannaafa maasaki ani marianafa. Yafee qifanee anee maasara qaoo qidanee. Anee nimaaraa. Sia nimaarainaqa sia ani aqoondiqara kai mandaikamma nimaqaanaura, ani faqa firaaqoo mandaikamma amaqaanaura. Miqi qimaseeqa misa Rootana afeeqa aquseeqa mina kooqi rufadaairara iqau.

10 Maaqakiqari Rootana aqoondiqara Rootana qumu rarisameeqee maaqaki aqusee kooqi ititaqau. 11 Ititaseeqa mi fasiqausa madaanai marusa aiqama nifu qimbasoofaqa kooqiara randoosia minnisaqau.

12 Minni soofaqa Rootana aqoondi qara iramiriqa qiqau. Maa anee marianna maqusanaki ani ati akaqausa maridee. Kai kaqi aneenna araamuqmaaka faqa airaamaku oondamara faqa aneenna atiuqa faqa aiqama nifiqee moosaa fua. 13 Maasa maa maqusana damunamma aquanaura. Karaambaiqa maa maqusanakina oosana oosana mandainaina kambiqaifanoo mi ufana iriseenoo maaqanda diqiqaifaqa maa maqusana kuridirara qumidaqa.

14 Rootafa iriseenoo narí araamuna qara nifaaqi qarara qutaaqamaqoo fasiqa qanda faqa qimanniminau. Doo anifaqa innisaimbaqa mootinai fuaqa. Anutufa maa maqusana damunirara qinoo. Miqi qufaqa mina airaamaku qara sia iriqau. Quteeti qidanoo mifoo qimasee kaqi mariqau.

15 Iaqoo faqa kananaana angirooqara Rootana kafaa fuki faaki qiqau. Doo kai kaqinana aneenna anaaqa faqa aneenna araamuna qara faqa nifiqee fua. Innee faqa maa maqusana namu faqa kuridifaara.

16 Rootafa iriseenoo oonauqee anauqee imarufanoo mina aqoondiqara mina asauku faqa mina anaaqa asauku faqa mina araamunaqara faqa qumaree rarisameeqee aanai ubeekaqau. Yaaweefa Rootanara amuqusufanoo miqinau. 17 Nifiqa quqasoofanoo angiroo moo fannoo qimanniminoo qinau. Innee sandamafuaqa kuqifaara. Fidaqa sia quandafi qafaaqa. Afaasasaa faqa sia kasooiaqa. Innee kuqifaara, aaqanai sandee ooru fuaqa.

18 Rootafa iriseenoo maaqi qimasee qimaminau. Sia aneenna qiannannai diiqaa. 19 Anee firaqoo qiniara amuqusifana qini kuqiranakinaana maraananoo. Aaqana nianai marifaqa minni fimariananoo mi narirafa qini faqa darinaqa kuquanoora. 20 Anee kaqikaa maqusa muqunni qafaidanee. Mifa adeedi marifaqa amanee qinee minni sandaanauree. Kaqikaa maqusa uqanna maridanoo qinee minni oonureeqa asumu marianaura.

21 Miqi qimasoofanoo angiroo moo fannoo qimaminau. Doo amana qinee minara eedoo qidaqa. Sia qinee mi maqusana kuridianaura. 22 Doo kai kaqi sandaa. Anee oonu rainaqa miqoo qeeqa qunna ainaina auqaanaura. Rootafa mi maqusanara kaqikaa maqusee qunara misa mi maqusana auqu Sooara fee qidaqa.

23 Mi kananaanna suani afu maqee uri marufanoo Rootafa Sooara maqusai oonu ranau. 24 Oonuroofanoo Karaambaiqa ida namu faqa koorootaqasaaqari qeemari idanara foora irana namufaqa quqasoofanoo aakuara foora Soodoomma maqusasaa faqa Koomoora maqusasaa faqa aqufinau. 25 Aqufinoo mi arumunaki maru maqusausa faqa aiqama faiqí anaasee faqa andanda faqa naru taikanau. 26 Rootana anaaqa narí afaaqi faqa sandee fidanoo oonu quandafinoo afu maqeenoo doo miqoo ooruku kammafi kisaaqa saqariara foora rakiqanoo marinau.

27 Moo kananaana Abaraqaammafa findimeeqeenoo Karaambaiqa faqa ufa quqoo ooqu finau. 28 Miqooqari Abaraqaammafa mara muami qafoofanoo Soodoomma faqa Koomoora faqa mi afaasanasaa maru maqusausaki ida muna fannoo firaafa uqanna ooru fufanoo qafanau.

29 Anutufa mi afaasanasaa maru maqusausa faqa maqa maaqa faqa kurididanoo Abaraqaammanara iriseenoo Rootafa mariu maqusausa naridanoo Rootana kai mareeqee kaqinni quqanau.

30 Rootafa Sooara maqusara rufiaseenoo narí araamuna qara nifiqeenoo amuaqu namusaa ooni aamara marunaki ooru marinau. 31 Mariufanoo mina araamuna indaaruqaafa inaaqianaana maaqi qimasee qimaminau. Doo maasa qikoofa asooqa maridanoo. Sia maa saqanna anindiri marasee faiqi mara qimifaqa maqara fasiqauqa maridaqa. Aiqama faiqí auqeeu oosanafa sia anindiriki maridanoo. 32 Doo aninaqa anindiri uainna nammari auquseeqa nári nikoona amiananoo moomoo namaseenoo furu farinaqa anindiri mina faqa sakasee faiqaa. Miqi masaifanoo anindiri nikoofa anindiri faiqi mara qiminaqa anindiri faiqi namu findifiqa mariaqa.

33 Miqi qimaseeqa mi eendanaki miqanda uainna nammari moomoo nári nikoona amisoofanoo neeneeseenoo furufara masoofanoo anasaafa naaree narí akoona faqa sakasee faiqanau. Uainna nammari fannoo mina furu fara masoofanoo narí araamuna auqoo ainainara sia irinau.

34 Kananaana anasaafa narí auna qimaminoo qinau. Faasai eendaki qinee qeeqa qikoona faqa sakasee faiqeeqa. Doo fafaa eendaki anindiri uainna moomoo kaifaa amiananoo namaseenoo furu farinana anee faqa mina sakasee faiqaa. Miqimasee aninidiri qeeqa qikoona faiqi maqasaana faiqí asumu kaqi mariaqa. 35 Miqi qimasee doo mi eendanaki miqanda uainna nammari moomoo nári nikoona amisoofanoo furu faramma soofanoo auna fannoo narí akoona faqa sakaseenoo faiqanau. Rootafa uainna nammari namseenoo furu faridanoo narí araamuna auqoo ainainara sia irinau.

36 Miqimmasee Rootana araamuna qara nári nikoona faqa faiqoonannai nimuaqu qaikiqau. 37 Miqimasee marufanoo indaaruqaa araamana fannoo faiqi akoonaiqi maqaseenoo mina auqu Mooaba nee qinau. Mariu fanoo Mooabafa findifinoo Mooaba maqannaasa nikoofaikamminoo marinau. 38 Auna fannoo mifa faqa faiqi akoonaiqi maqaseenoo mina auqu Beenaami fee qinau. Mariu fanoo Beenaamifa findifinoo Amoona maqannaasa nikoofaikamminoo marinau.