1 Abarammafa mariufanoo 99 aukuana marasoofanoo Karaambaiqa mina afusa kooroo mafi qimaminau. Qinee aiqama afeeka faqaa Anutusa maridaqa. Anee aiqama kari qini ufa qaindusidana andeeqara ainaina kai auqaa. 2 Qinee ani faqa qeeqa moodaanaki kira ufa qimasee anisaaqari asumu moomoo kambiqa nimaqaanaura.

3 Abarammafa mi ufana iriseenoo oorindari maqasaa mapamufufanoo Anutufa maaqi qimasee qimaminau. 4 Qinee maa moodaanaki kira ufana ani faqa qidaqa. Qinee kuqaa qima afeekaikidaqa. Anee moomoo maqannaasa ninaakufa marinnaranoo. 5 Doo maqee ani auqu Abarammafa marina maqee fuka auqu amiqa. Abaraqaammanee qianaura. Qinee ani moomoo maqannaa ninaakufaika maisaannanara ani auqu Abaraqaammanee qianaura. 6 Qinee ani faiqi asumu moomoo amianaqa misakiqari akaqausa karaambaiqa marifara. Ani asaifaqausa moomoo maridaqa moomoo maqannaa marifaranoo. 7 Qinee qeeqa qima afeekaikira ufa ani faqa ani asaifaqausa naaru kambiqainausa faqa qiafannana naaru marira moodaanaki kira ufara foora rakisianaura. Qinee ani faqa ani asaifaqausa Anutusa marianaura. 8 Anee asaqiraa faira foora maa maqanasaa mariannana qinee ani faqa ani asaifaqausa faqa nimianaura. Nimiananoo aiqama Kannaana maqa maaqa fannoo ani asaifaqausaindi kamminoo naaru naaru marinaqa qinee misa Anutusa marianaura.

9 Miqi qimaseenoo Anutufa kaifaa Abaraqaammana qimaminoo qinau. Anee faqa eedoo qimasee qini qima afeekai kira ufamau aneenna asaifaqausa naaru kambiqainausa faqa fuaqa. 10 Anee faqa ani asaifaqausamara faqa aiqama eedoo qimasee akoonaiqi faiqiuqa nifaaqa ati aukuaqa. 11-12 Maaqooqari aiqama akoonaiqi faiqiuqa maqasaifanoo 8 faasaana aiqaramafinaqa nifaaqa ati aukuaqa. Ainainira faiqiuqa inniki mariasa faiqi namu faqa nianaindaraasa feefaurumma quqaqaafaqa inniki mariasa faiqi namu faqa nifaaqa ati aukuaqa. Miqimmasaifanoo mifa qinee faqa innee faqa moodaanaki kirana uqannifiqaannoo. 13 Aiqama uqanna nifaaqa ati aukuaqa. Aukusaifanoo mifa inni nifaaqai qini moodaanaki kira ufa naaruara marianinnanara koorooiannoo. 14 Inniki qari akoonaiqi moo fannoo sia afaaqa ati aukinafa marinaqa sia qini faiqí aanaaseeki mariannoo fee qianaura. Mifa qini qima afeekaikira ufamau sia finara sia inniki mariani.

15 Kafaa Anutufa Abaraqaammana qimaminoo qinau, sia aneenna aanaaqara Sarai nammarinee qia. Maqee mina auqa Saraqa nammarifa mariannoo. 16 Qinee Saraqa nammarina amiqi amiqi maisaananoo faiqi akoonaiqi ani maqa amiannoo. Mifa moomoo maqannaasa ninoofa marinaqa mina faiqi namukiqari akaqausa karaambaiqauqa marifaranoo.

17 Abaraqaammafa mi ufana iriseenoo maqasaa mapamu finoo naanaidara qidanoo qinau. Amanee 100 aukuana marara fasiqa fannoo faiqi maqaannoo fee Saraqa nammarifa faqa 90 aukuana mararafa amanee faiqi maqaannoo fee. 18 Miqi qimaseenoo Abaraqammafa Anutuna qimaminoo qinau. Naqaa saina Isamaeerafa qini ainaina maraaqaana ifanee.

19 Miqi qufanoo Anutufa qimaminoo qinau. Ani anaaqa Saraqa nammarifa ani faiqi akoonaiqi maqasainana mina auqu Isakee nee qia. (Maasa ufakiqari Isakeena auqu naanaidara qiranee qimaqoofanoo.) Qinee ani faqa moodaanaki kira ufa quqaunafa Isakeenasaa faqa minasaaqari naaru naaru kambiqainausasaa faqa mariannoo. 20 Isamaeerana faqa anee qianandee, mina faqa amiqi amiqi ianaura. Mina faiqi namu moomoo uqanna kambiqeefara. Akoonaiqiuqa qisauku qara taikasee qikunni ooqu qaaraqanda 12 marasee uriqararausa marifara. Mina saaqari kambiqainausa firaa maqannaa marifaranoo. 21 Moo aukuana maa quqoonnanasaa kai Saraqa nammarifa ani faiqi Isakeena maqannoo. Qinee qeeqa moodaanaki kira ufa minasaa quqaqaana mariannoo. 22 Anutufa aiqama maa ufana Abaraqaammana qimamiseenoo doo quqasee finau.

23 Fifufanoo Abaraqaammafa Anutuna ufa mau finoo mi faasaanna kai narí faqa narí amaaku Isamaeerana faqa narí ainainira faiqiuqa faqa narí ainainiranaki marida maqaqoo faiqisa faqa aiqama nifaaqa ati aukinau. 24-25 Abaraqaammafa 99 aukuana marinoo narí afaaqa ati ateeka aqinau. Isamaeerafa 13 aukuana marasoofanoo mina afaaqa ati ateeka aqinau. 26-27 Moodaa faasaana kai Abaraqaammafa faqa narí amaaku Isamaeerafa faqa narí ainainira faiqiuqa aiqama nifaqa ati ateekaqau.